Tinhlayo 9:1-23
9 Hi wheti ya ku sungula+ ka lembe la wumbirhi loko se va hume ka tiko la Gibita, Yehovha a vulavule na Moxe na a li mananga ya Sinayi a ku:
2 “Vayisrayele va fanele va lulamisela swifuyu swa ku tlangela Paxkwa+ hi nkama lowu wu nga vekiwa.+
3 Hi diya 14 ka wheti leyi nimadlambu mi fanele mi yi lulamisela hi nkama lowu wu nga vekiwa. Mi ta yi lulamisela hi ku landza minawu ni mayendlelo hinkwawu ya yona.”+
4 Se Moxe a byela Vayisrayele swaku va lulamisela swifuyu swa ku tlangela Paxkwa.
5 Kutani va lulamisela swifuyu swa ku tlangela Paxkwa hi diya 14 ka wheti ya ku sungula nimadlambu, amananga ya Sinayi. Vayisrayele va yendle hi ku landza hinkwaswu leswi Yehovha a nga swi rhuma Moxe.
6 A ku ni vanhu lava a va nga tenganga hi mhaka ya leswi va nga khumba ntsumbu,+ a va swi kotanga ku lulamisela swifuyu swa ku tlangela Paxkwa hi siku lolelo. Se vanhu volavo va ya ka Moxe na Aroni hi siku lolelo,+
7 va fika va ku: “A hi tenganga hi mhaka ya leswi hi nga khumba ntsumbu. Se hi mhaka muni hi fanele hi tsimbisiwa ku nyikela gandzelo ni Vayisrayele ka Yehovha hi nkama lowu nga vekiwa ke?”+
8 Moxe a ku: “Nyimani kolanu ni ya twa leswi Yehovha a nga ta ni byela swona hi n’wina.”+
9 Kutani Yehovha a byela Moxe a ku:
10 “Byela Vayisrayele u ku: ‘Hambiloko munhu mun’wani ka n’wina kumbe vatukulu va n’wina o tichakisa hi mhaka ya ku khumba ntsumbu,+ kumbe a yendzile a ya kule, a fanele a lulamisela xifuyu xa ku yendlela Yehovha fexta* la Paxkwa.
11 Va fanele va xi lulamisela hi diya 14 ka wheti ya wumbirhi+ nimadlambu. Va fanele va xi dla ni mapawu ya ku kala fermentu ku patsa ni matsavu ya ku bava.+
12 Va fanele va xi dla xi hela va nga xi siyi anze mundzuku,+ naswona a va fanelanga va tshova marhambu ya xona.+ Va fanele va tlangela Paxkwa hi ku landza minawu hinkwayu leyi nga vekiwa.
13 Loko munhu a tengile naswona a nga yendzanga a ya kule kambe a nga na mhaka ni ku lulamisela Paxkwa, a fanele a dlayiwa,+ hikusa a nga mu yendlelanga Yehovha gandzelo hi nkama lowu nga vekiwa. Munhu wa kona a ta tihlamulela hi mhaka ya xidjoho xa yena.
14 “‘Munhu wa tiko lin’wani lweyi a tshamaka na n’wina, na yena a fanele a lulamisela xifuyu xa ku yendlela Yehovha fexta la Paxkwa.+ A fanele a yendla hi ku landza nawu wa Paxkwa ni mayendlelo ya kona.+ Ku ta tirha nawu wun’we ka n’wina ni ka munhu wa tiko lin’wani lweyi a tshamaka na n’wina.’”+
15 Hi siku la ku nyimisiwa ka tabernakela,+ rhefu a li funengeta tabernakela ku nga tende la Wumboni, kambe nimadlambu a li tikomba li fana ni ndzilu henhla ka tabernakela anze li xa.+
16 A ku yendleka leswi nkama ni nkama: Rhefu a li funengeta tabernakela ninhlikanhi kasi nimadlambu a li tikomba li fana ni ndzilu.+
17 Loko rhefu li suka henhla ka tende, Vayisrayele a va suka hi ku hantlisa+ naswona lomu rhefu a li ta fika li nyima kona, Vayisrayele a va ta fika va gwimba matende kolanu.+
18 Vayisrayele a va suka loko Yehovha a va byela, naswona a va gwimba matende hi ku landza leswi Yehovha a a va byela swona.+ Loko rhefu li tshama henhla ka tabernakela, na vona a va nga suki.
19 Loko rhefu li tshama masiku ya manyingi henhla ka tabernakela, Vayisrayele na vona a va yingisa Yehovha va nga fambi.+
20 Minkama yin’wani rhefu a li tshama masikunyana henhla ka tabernakela. A va tshama ka matende hi ku landza leswi Yehovha a nga va byela swona, naswona a va suka hi ku landza leswi Yehovha a va byelaka swona.
21 Minkama yin’wani rhefu a li tshama ku sukela nimadlambu anze nimixo ntsena, naswona loko rhefu li suka nimixo, na vona a va suka. Loko rhefu li suka, na vona a va suka ku nga na mhaka swaku i nhlikanhi kumbe i wusiku.+
22 Hambiloko rhefu li tshama masiku mambirhi, wheti kumbe masiku ya manyingi henhla ka tabernakela, Vayisrayele a va tshama na va gwimbe matende naswona a va nga suki. Kambe loko li suka, na vona a va suka.
23 A va gwimba matende hi ku landza leswi Yehovha a a va byela swona, naswona a va suka hi ku landza leswi Yehovha a a va byela swona. Va yingise Yehovha hi ku yendla leswi Yehovha a nga swi byela Moxe.
Tinhlamunselu ta le hansi
^ Kumbe: “nkhuvu wa”.
