Tipisalema 68:1-35
Ka mayextru. Pisalema Ya Davhida. Pisalema. Lisimu.
68 Xikwembu a xi humelele, valala va xona a va hangalake,Lava xi nyenyaka a va baleke.+
2 Va hlongole va nyamalala ku fana ni ximusi;Ku fana ni mafurha* lawa ma dereteraka loko ma twa ndzilu,Lava ku biha a va helisiwe phambheni ka Xikwembu.+
3 Kambe lava ku lulama a va tsake;+A va tsake swinene phambheni ka Xikwembu;A va tsake hintamu swinene.
4 Yimbelelelani Xikwembu; yimbelelani mi dzunisa vito la xona.+
Yimbelelelani Lweyi a hundzaka hi mananga.*
Vito la yena+ i Yehovha!* Tsakani phambheni ka yena!
5 Papayi wa vana lava nga feliwa hi vapsali* ni muvhikeli* wa vavasati lava nga feliwa hi vavanuna+I Xikwembu lexi tshamaka ka ndhawu ya xona ya ku kwetsima.+
6 Xikwembu xi va nyika kaya lava kalaka va nga na wa ku va pfuna;+Xi chunsa swib’ochwa xi tlhela xi yendla swaku swi humelela awuton’wini.+
Kambe lava va ku woma tinhloko* va boheka ku tshama mananga.+
7 Xikwembu xa mina, nkama u nga rhangela vanhu va wena,+Nkama u nga famba mananga, (Sela)
8 Misava yi tsekatsekile;+Tilo li nise mpfula hi mhaka ya Xikwembu;Ntshava ya Sinayi yi tsekatsekile hi mhaka ya Xikwembu, Xikwembu xa Israyele.+
9 Xikwembu xa mina u nise mpfula yayikulu;U va nyike matimba vanhu* va wena lava nga karhala.
10 Va tshame ka matende ya wena;+U pfune swisiwana hi mhaka ya wunene la wena, wena Xikwembu.
11 Yehovha a rhumisile;Vavasati lava chumayelaka mahungu ya ku tsakisa i ntlawa wawukulu wa masonchwa.+
12 Tihosi ta masonchwa ta baleka,+ ti baleka swi phela!
Wansati lweyi a nga sala kaya a pambuleliwa leswi nga tekiwa nyimpini.+
13 Hambileswi n’wina vavanuna a mi yetlele kusuhi ni ndzilu wa le ka matende,*Ku ta va ni tuva leli nga ni timpapa ta prataLeli nga ni timpapa ta woru la lisima hintamu.
14 Nkama Lweyi Wa Matimba Hinkwawu a nga hangalasa tihosi,+Ku we gamboko* aZalmoni.*
15 Ntshava ya Baxani+ i ntshava ya Xikwembu;*Ntshava ya Baxani yi ni tindhawu ta tinyingi ta ku leha.
16 Hi mhaka muni n’wina tintshava leti nga ni tindhawu ta tinyingi ta ku leha, mi yi txuvuka hi tihlo la ku bihaNtshava leyi Xikwembu xi nga yi langa* swaku xi tshama ka yona?+
Phela Yehovha a ta tshama kolanu hi masiku ni masiku.+
17 Tinyolo* ta nyimpi ta Xikwembu, i mamiliyoni ya manyingi.+
Yehovha a te ka ndhawu ya ku kwetsima a huma aSinayi.+
18 Wena u khwele u ya henhla;+U teke swikarawa;U teke vavanuna swaku va va tinyiko,+Hambi lava nga ni nkanu,+ swaku wena Yehovha Xikwembu u ta tshama xikarhi ka vona.
19 A a dzunisiwe Yehovha, lweyi siku ni siku a hi rhwalelaka mindzhwalu ya hina,+Xikwembu xa ntiyiso lexi hi ponisaka. (Sela)
20 Xikwembu xa ntiyiso i Xikwembu lexi hi ponisaka;+Naswona Yehovha Hosi Leyi Nga Tlakuka wa hi ponisa ka lifu.+
21 Ina, Xikwembu xi ta pfotlosa tinhloko ta valala va xona,Nhloko ya mun’wani ni mun’wani lweyi a kalaka a nga tshiki ku djoha.+
22 Yehovha a te: “Ni ta va humesa Baxani;+Ni ta va tsavula xikarhi ka lwandle,
23 Leswaku nkondzo wa wena wu ta kandzihela ngati ya valala va wena,+Ni timbyana ta wena ti ta nampsela ngati ya valala va wena.”
24 Xikwembu xa mina, va vona vanhu va wena na va longoloka,Ku longoloka ka vanhu va Xikwembu xa mina, Hosi ya mina, loko va ya ka ndhawu ya ku kwetsima.+
25 Vayimbeleli a va rhange phambheni, ndzhaku ka vona a ku ni vachayi va switende;*+Lani xikarhi a ku ni tintombhi na ti ba swingomana.+
26 Dzunisani Xikwembu xikarhi ka xitshungu;*Dzunisani Yehovha, n’wina lava taka hi ka Xihlovo xa Israyele.+
27 Kolanu ku na Benjamini+ wamutsongo, wa va hlula,Ni varhangeli va Yuda ni xitshungu xa vona lexi huwelelaka hi ku tsaka,Varhangeli va Zebuloni, varhangeli va Naftali.
28 Xikwembu xa n’wina xi hlaye swaku mi ta va ni matimba.
Kombisa matimba ya wena, Xikwembu xa mina, lexi nga hi pfuna.+
29 Tihosi ti ta ku tisela tinyiko,+Hi mhaka ya tempele ya wena leyi nga Yerusalema.+
30 Laya swiharhi leswi tshamaka xikarhi ka tihlanga,Tihomu+ ni swihon’wani leswi swi nga hlengeletana,Anze loko vanhu va khizama va tisa* prata.
Kambe u hangalasa vanhu lava tsakisiwaka hi nyimpi.
31 Swibya swa bronzi swi ta ta* hi Gibita;+Kuxi a ta hantlisela ku nyika Xikwembu tinyiko.
32 Yimbelelelani Xikwembu n’wina mimfumu ya misava,+Yimbelelani mi dzunisa Yehovha, (Sela)
33 Lweyi a fambaka henhla ka tilo leli ku nga khale na li li kona.+
Vonani! Wa dzindza hi rito la yena, rito la yena la matimba.
34 Dzunisani Xikwembu hikusa xi ni matimba.+
Wukulu la xona li henhla ka Israyele,Ni matimba ya xona ma voneka ka matilo.*
35 Xikwembu xi lava ku chaviwa ni ku hloniphiwa ka ndhawu ya xona leyi kwetsimaka.+
I Xikwembu xa Israyele,Lexi nyikaka vanhu va xona matimba.+
A ku dzunisiwe Xikwembu.
Tinhlamunselu ta le hansi
^ Ku nga mafi lawa ma nga ni kola, lawa ma kumekaka lomu tinyoxi ti hambelaka kona wulombe.
^ Kumbexana: “ka marhefu.”
^ Kumbe: “Yah.” Yah i magomiselo ya vito leli nge Yehovha.
^ Hi Xiheberu: “vapapayi”.
^ Hi Xiheberu: “muyavanyisi”.
^ Kumbe: “lava terekaka”.
^ Hi Xiheberu: “tshomba”.
^ Kumbexana: “swib’ala swa tinyempfu”.
^ Kumbe: “neve”. I minchumu ya ku basa yi ku baa ku fana ni jelu.
^ Kumbe: “a swi fana ni loko ku we neve aZalmoni.”
^ Kumbe: “ntshava yayikulu.”
^ Kumbe: “lavaka”.
^ Kumbe: “Tin’qolo; Makalichi”.
^ I nchumu xa ku chaya muzika.
^ Hi Xiheberu: “maasembleya.”
^ Kumbexana: “kandzihela”.
^ Kumbexana: “vanyimeli va ta ta na va huma”.
^ Hi Xiheberu: “ka marhefu.”
