Vaheberu 3:1-19
3 Kutani vamakwerhu va ku kwetsima, lava nga vitaniwa leswaku va ya tilweni,+ pimisani hi mupostolo ni muprista wamukulu lweyi hi kombisaka lipfumelo ka yena ku nga Yesu.+
2 A a tshembekile ka Lweyi a nga mu langa,+ ku fana na Moxe lweyi na yena a a tshembekile ka yindlo hinkwayu ya Xikwembu.+
3 Hikusa Yesu a voniwa na a faneliwa hi ku dzunisiwa ngopfu+ ku tlula Moxe, ku fana ni leswi lweyi a yakaka yindlo a hloniphiwaka ngopfu ku tlula yona.
4 Phela yindlo yin’wani ni yin’wani yi yakiwa hi munhu, kambe lweyi a nga yendla minchumu hinkwayu i Xikwembu.
5 Moxe a a li mutirhi wa ku tshembeka ka yindlo hinkwayu ya Xikwembu, ntirho wa yena a wu li wumboni la swilo leswi a swi ta vuliwa ka masiku lama taka,
6 kambe Kreste a a tshembekile tanihi n’wana+ lweyi a hlayisaka yindlo ya Xikwembu. Hina hi yindlo ya xona+ loko hikakunene hi khoma swi tiya ka ku vulavula na hi chunsekile ni ka ntshembo lowu hi tibumaka hi wona anze ku fika magamu.
7 Kutani swi fana ni leswi nga vuliwa hi moya wa ku kwetsima wu ku:+ “Loko namuntlha mi yingisa rito la yena,
8 mi nga tlanyaliseni timbilu ta n’wina ku fana ni nkama lowu vavhovho va n’wina va nga ni kwatisa hintamu; ku fana ni nkama lowu va nga ni ringa amananga,+
9 lomu va nga ni ringa hambiloko se va vone mintirho ya mina ku ringana 40 wa malembe.+
10 Leswi hi swona swi nga yendla swaku vanhu va nkama wolowo va ni nyenyentsa ni za ni ku: ‘Va tshamela ku lahleka ka timbilu ta vona naswona a va ti tivanga tindlela ta mina.’
11 Kutani ni fungile na ni kwatile ni ku: ‘A va nge ngheni ku humuleni ka mina.’”+
12 Tivoneleni vamakwerhu, hi ku chava swaku ku nga tshuki ku humelela munhu ka n’wina lweyi a nga vaka ni mbilu ya ku biha ya ku kala lipfumelo, hi ku suka ka Xikwembu lexi hanyaka;+
13 kambe tamani mi tiyisana siku ni siku, loko ma ha twa ku vuliwa swaku “Namuntlha,”+ leswaku ku nga vi ni munhu ka n’wina lweyi a nonon’hwisiwaka mbilu hi matimba lama kanganyisaka ya xidjoho.
14 Hikusa hi ta kuma leswi Kreste a nga swi kuma loko ntsena hi khoma swi tiya ka ntshembo lowu a hi li na wona ku sunguleni,+ anze ku fika magamu.
15 Hikusa Matsalwa ma li: “Loko namuntlha mi yingisa rito la yena, mi nga tlanyaliseni timbilu ta n’wina ku fana ni nkama lowu vavhovho va n’wina va nga ni kwatisa hintamu.”+
16 Kasi i vamani lava nga twa marito lawa kambe va tlhontha Xikwembu swaku xi kwata hintamu ke? A hi vona hinkwavu lava nga huma Gibita na va rhangeliwa hi Moxe ke?+
17 Naswona i vamani lava nga nyenyentsa Xikwembu ku ringana 40 wa malembe ke?+ A hi vona lava nga djoha, lava nga fela mananga?+
18 Se i vamani lava xi nga va fungela swaku a va nga ta nghena ku humuleni ka xona? A hi vona lava ku kala va nga yingisi ke?
19 Phela se ha swi vona swaku a va nghenanga hi mhaka ya ku kala lipfumelo.+
