Karta Leli Tsaleliwaka Vakolosa 2:1-23
2 Hikusa ni lava mi swi tiva swaku ni lwa nyimpi yayikulu swinene hi mhaka ya n’wina ni hi lava nga Lawudikiya+ ni hinkwavu lava kalaka va nge se tshama va ni vona.
2 Ni lava swaku timbilu ta vona ti tiyisiwa,+ va khomana swi tiya hi lirhandzu+ va tlhela va va ni tshomba hinkwalu leli kumiwaka hi mhaka ya ku twisisa ni wutivi la ntiyiso, leswaku va ta xi tiva kahle xihundla xa ku kwetsima xa Xikwembu, ku nga Kreste,+
3 lweyi tshomba hinkwalu la wutlharhi ni la wutivi swi nga fihliwa ka yena.+
4 Ni vula leswi leswaku ku nga vi ni munhu lweyi a zamaka ku mi kanganyisa hi marito ya ku lava ku mi kholwisa.
5 Hambileswi ni kalaka ni nga li kona, ni pimisa hi n’wina ni tlhela ni tsaka loko ni vona swaku mi yendla swilo hi nawu*+ naswona mi ni lipfumelo la ku tiya ka Kreste.+
6 Kutani leswi mi nga va ni lipfumelo ka Kreste Yesu Hosi ya hina, tamani mi hanya ku fana na yena,
7 mi tiya ku fana ni timintsu, mi yakiwa henhla ka yena,+ mi tiyisa lipfumelo+ hilani mi nga djondzisiwa hi kona, mi tlhela mi khensa Xikwembu swinene.+
8 Tivoneleni swaku ku nga vi ni munhu lweyi a mi phasaka hi wutlharhi la misava leyi* ni marito ya wukanganyisi,+ leswi sekeliwaka ka swihena swa vanhu, ka swilo swa masungulo swa misava ku nga li ka Kreste;
9 hikusa wumunhu hinkwalu la Xikwembu li le ka yena.+
10 Kutani mi ni minchumu hinkwayu hi mhaka ya yena, lweyi a nga nhloko ya mfumu hinkwawu ni matimba hinkwawu.+
11 Leswi mi nga ni wuxaka na yena, na n’wina mi tsemile nsuvu;* a hi ku tsema nsuvu ka ku yendliwa hi mavoko ya vanhu, kambe mi tseme nsuvu hi ku susa* muzimbha wa n’wina lowu nga ni xidjoho,+ hikusa hi leswo vadjondzisiwa va Kreste va tsemisaka xiswona nsuvu.+
12 Hikusa mi lahliwe na yena ka ku tsakamisiwa ka yena,+ naswona leswi mi nga ni wunghanu na yena mi tlhele mi pfuxiwa+ xikan’we na yena hileswi mi nga ni lipfumelo ka ntirho wa matimba wa Xikwembu lexi nga mu pfuxa ka lava nga fa.+
13 Naswona Xikwembu xi mi hanyisile xikan’we na yena hambileswi a mi file ka swidjoho swa n’wina ni hileswi a mi nga tsemanga nsuvu.+ Xi hi rivalele swidjoho swa hina hinkwaswu hi timpsalu+
14 kutani xi tima papela la ku tsaliwa hi voko+ leli a li ni minawu+ leyi a yi lwa na hina.+ Xi li suse ndleleni hi ku li gongondzela ka mhandzi ya nxaniso.*+
15 Xi hlule mimfumu ni tihosi hi mhandzi ya nxaniso xi va yendla swikarawa xi tlhela xi va danisa phambheni ka vanhu, kuva xi kombisa swaku xi va hlulile.+
16 Se mi nga pfumeleli munhu a mi yavanyisa hi mhaka ya leswi mi swi dlaka ni leswi mi swi phuzaka+ kumbe hi ku tlangela masiku ya mafexta, ya ku huma ka n’weti+ kumbe ya savata.+
17 Swilo leswo i ndzhuti wa swilo leswi nga ta ta,+ kambe leswi swi nga swa ntiyiso swi lumba Kreste.+
18 Ku nga vi ni munhu lweyi a mi pfalelaka ku kuma hakelo,+ lweyi a rhandzaka ku tiyendla n’wamunene ni ku gandzela tintsumi* kumbe “lweyi a tibumaka” hi minchumu leyi a nga yi vona.* Munhu yelweyo a tibyela mahala hi mhaka ya mimpimiso ya yena ya ku kala yi nga hetisekanga,
19 naswona a nga khomeleli swi tiya ka lweyi a nga nhloko,+ lweyi muzimbha hinkwawu wu wundliwaka hi yena wu tlhela wu tlhanganisiwa wu va wun’we hileswi swi wu tlhanganisaka, ni hi minsiha leyi tlhanganisaka marhambu, kutani wu kula hi matimba ya Xikwembu.+
20 Loko mi file na Kreste naswona mi swi tshikile swilo swa masungulo swa misava,+ hi mhaka muni mi hanya ingaku ma ha li vanhu va misava hi ku tama mi landzela minawu ya kona leyi nge:+
21 “Mi nga khomi, mi nga nampsi, mi nga khumbi?”
22 Minawu leyo yi vulavula hi swilo leswi nga ta helisiwa loko se swi tirhisiwile naswona i minawu ya ku djondzisiwa hi vanhu.+
23 Hambiloko swilo leswi swi tikomba swi li wutlharhi, kambe a swi va pfuni hi nchumu vanhu swaku va lwisana ni ku navela ka ku biha ka muzimbha wa vona.+ Leswo swi yendleka hi mhaka ya leswi va tilangelaka ndlela leyi va lavaka ku gandzela Xikwembu hi yona, va tiyendla ingaku va tiveka hansi kutani va xanisa muzimbha wa vona.
Tinhlamunselu ta le hansi
^ Kumbe: “hi ku hleleka”.
^ Kumbe: “filozofiya”.
^ Kumbe: “hambile circuncisão.”
^ Hi Xigriki: “hlivila”.
^ Vona Ntlhamuselo.
^ Kumbe: “lweyi a gandzelaka ku fana ni tintsumi”.
^ Lani, Pawulo a tirhise rito leli vulavulaka hi swihena swa vahedeni leswi fambisanaka ni mindhavuko.
