Varoma 13:1-14
13 Munhu mun’wani ni mun’wani a fanele a yingisa lava fumaka,+ hikusa a nga kona lweyi a nga fumaka na a nga pfumeleliwanga hi Xikwembu.+ Tihosi leti nga kona ti vekiwe hi Xikwembu ka switshamu swa tona leswi nga pimiwa.+
2 Lweyi a yalaka ku yingisa tihosi a lwisana ni Xikwembu. Lava yalaka ku ti yingisa va ta yavanyisiwa.
3 Tihosi a ti chaviwi hi lava yendlaka swaswinene kambe ti chaviwa hi lava yendlaka swa ku biha.+ Ma swi lava ku kala mi nga ti chavi tihosi? Tamani mi yendla swaswinene+ kutani ti ta mi dzunisa hi mhaka ya swona.
4 Tihosi leti ti tirhela Xikwembu swaku ti mi yendlela swaswinene. Kambe loko mi yendla swa ku biha, ti chaveni hikusa ti ni matimba* ya ku mi khatisa naswona a ti nyikiwanga mahala. Ti tirhela Xikwembu swaku ti khatisa lava yendlaka swa ku biha.
5 Swa laveka swaku mi ti yingisa, ku nga li hi mhaka ya ku chava ku khatisiwa ntsena kambe ni hi mhaka ya lipfalu la n’wina.+
6 Hi leswo swi yendlaka mi hakela rhesa,* hikusa i vatirhi va Xikwembu atikweni, lava nkama hinkwawu va tirhelaka xikongomelo lexi.
7 Nyikani hinkwavu leswi va fanelaka: Lweyi a lavaka rhesa mu nyikeni rhesa;+ lweyi a lavaka ku hakeliwa mu hakeleni; lweyi a lavaka ku yingisiwa* mu yingiseni;+ lweyi a lavaka ku hloniphiwa mu hlonipheni.+
8 Mi nga devheni munhu nchumu, devhani ku rhandzana;+ hikusa lweyi a rhandzaka munhu mun’wani a yendla leswi laviwaka hi nawu.+
9 Hikusa a minawu leyi nge: “U nga tshuki u mbuyeta,+ u nga tshuki u dlaya,+ u nga tshuki u yiva,+ u nga tshuki u navela swa van’wani,”+ ni minawu hinkwayu leyi nga kona, swi katsakanyiwa hi nawu lowu nge: “U fanele u rhandza vanhu van’wani ku fana ni leswi u tirhandzisaka swona.”+
10 Lweyi a nga ni lirhandzu a nga yendleli van’wani swa ku biha;+ hikusa lweyi a nga ni lirhandzu a wu hetisisa kahle nawu.+
11 Mi fanele mi swi yendla leswi hikusa ma swi tiva swaku nkama wa ku pfuka wurhongweni+ se wu fikile. Phela ku ponisiwa ka hina ku kusuhi swinene ku tlula nkama lowu hi nga va vapfumeli.
12 Wusiku se li kusuhi ni ku hela; siku li kusuhi. Se a hi tshikeni ku yendla mintirho ya munyama,+ hi yambala matlharhi ya ku vonakala.+
13 A hi hanyeni hi ndlela yayinene+ ku fana ni loko ku li nhlikanhi, hi nga yi ka mafexta ya ku kala ma nga lawuleki, hi nga vi swidakwa, hi nga gelezi, hi nga vi ni mahanyelo ya tingana,*+ hi nga holovisani hi tlhela hi va ni wukwele.+
14 Kambe tekelelani Hosi Yesu Kreste*+ naswona mi nga tshameleni ku pimisa hi ndlela ya ku yendla xidjoho.+
Tinhlamunselu ta le hansi
^ Hi Xigriki: “xipada”.
^ Kumbe: “impoxtu; tinemba”.
^ Hi Xigriki: “ku chaviwa”.
^ Hi Xigriki: “asélgeia”. Vona Ntlhamuselo.
^ Hi Xigriki: “yambalani Hosi Yesu Kreste”.
