Varoma 16:1-27
16 Ni kombela mi hoyozela Febe, makwerhu wa xisati lweyi a tirhaka ni bandla la le Kenikreya.+
2 Ni kombela mi mu yamukela Hosini hi ndlela leyi fanelaka vakwetsimi, ni ku mu pfuna hi swin’wani ni swin’wani leswi a nga ha lavaka ku pfuniwa hi swona,+ hikusa na yena a pfune vanhu va vanyingi ku patsa na mina.
3 Ni runguleleni Prisila na Akila+ lava ni tirhaka na vona ka ntirho wa Kreste Yesu,
4 lava nga veka wutomi la vona nghozini hi mhaka ya mina.+ A hi mina noxe ni va khensaka kambe ni mabandla hinkwawu ma nga ka matiko ya ku hambanahambana ma va khensa.
5 Naswona ni runguleleni bandla leli tlhanganaka kaya ka vona.+ Rungulani Epayineto lweyi ni mu rhandzaka, a nga yena wa ku sungula ku pfumela ka Kreste le Aziya.
6 Rungulani Mariya lweyi a nga mi tirhela hintamu.
7 Rungulani maxaka ya mina+ Androniku na Yuniya lava a va li na mina djele; i vavanuna lava tiviwaka hintamu hi vapostolo naswona va nga rhanga va landzela Kreste nkama wa wunyingi ku tlula mina.
8 Ni runguleleni Ampliyatu lweyi ni mu rhandzaka Hosini.
9 Rungulani Urbanu lweyi hi tirhaka na yena ka ntirho wa Kreste na Stako lweyi ni mu rhandzaka.
10 Rungulani Apele lweyi a nga tshembeka ka Kreste. Rungulani vandjangu wa Arixtobulu.
11 Rungulani xaka la mina Herodiyoni. Rungulani vandjangu wa Narsizu lava nga vadjondzisiwa va Hosi.
12 Rungulani Trifena na Trifoza, vavasati lava tirhaka hi matimba Hosini. Rungulani Persida lweyi hi mu rhandzaka hileswi a nga tirha hintamu aHosini.
13 Rungulani Rufu lweyi a nga langiwa hi Hosi ni mamani wa yena lweyi a nga mamani ni le ka mina.
14 Rungulani Asinkritu, Filego, Herme, Patroba, Hermasi ni vamakwerhu lava nga na vona.
15 Rungulani Filologo na Juliya, Neriya ni makwavu wa yena wa xisati, Olimpu ni vamakwerhu* hinkwavu lava nga na vona.
16 Xowetanani hi lirhandzu.* Mabandla hinkwawu ya Kreste ma mi xoweta.
17 Se na mi kombela vamakwerhu, leswaku mi tivonela ka lava pfuxaka ku yavana ni ku djikisa van’wani lipfumelweni hi ku djondzisa swa ku hambana ni leswi mi nga swi djondza; fambelani kule na vona.+
18 Hikusa vanhu va ku tshamisa leswo a va tirheli Hosi ya hina Kreste kambe va tirhela makhwirhi* ya vona vinyi, naswona va kanganyisa timbilu ta lava kalaka va nga na nandzu hi marito ya vona ya ku tsakisa ni hi mavulavulelo ya vona ya ku tikomba ingaku i manene.
19 Vanhu hinkwavu va swi tiva swaku ma yingisa, swoleswo swa ni tsakisa. Ni lava swaku mi tlhariha, mi yendla swaswinene mi tlhela mi fambela kule ni swa ku biha.+
20 Swoswinyana Xikwembu xi ta mi nyika matimba ya ku pfotlosa Sathana.+ Ni navela swaku timpsalu tatikulu ta Hosi ya hina Yesu ti va na n’wina.
21 Wa mi rungula Timotiya lweyi a tirhaka na mina, ni maxaka ya mina Lukiyo, Yaso na Sozipatro na vona va mi rungula.+
22 Mina Tersiyo, lweyi ni nga tsala karta leli, na mi rungula Hosini.
23 Wa mi rungula Gayo+ lweyi a nga ni yamukela kaya ka yena, lweyi bandla hinkwalu li tlhanganaka kaya ka yena. Eraxto lweyi a tamelaka male ya doropa ni makwavu wa yena Kwartu na vona va mi rungula.
24 * ——
25 Xikwembu xi nga mi nyika matimba hi mhaka ya mahungu ya ku tsakisa lawa ni mi byelaka wona, ku nga mahungu lawa ni ma chumayelaka hi Yesu Kreste. Mahungu lawa ma fambisana ni ku pfuliwa ka xihundla xa ku kwetsima+ lexi nga fihliwa ku sukela khale ka khaleni.
26 Kambe swoswi se hi kombiwile xihundla lexi. Kutani hi ku tirhisa Matsalwa ya wuprofeta, vamatiko hinkwavu va djondze hi xihundla lexi xa ku kwetsima. Leswi swi fambisana kahle ni nawu wa Xikwembu lexi hanyaka hi masiku ni masiku. Ku navela ka xona hi leswaku vamatiko hinkwavu va xi tshemba ni ku xi yingisa;
27 ku dzuneka a ku ve ka Xikwembu hi ku tirhisa Yesu Kreste, lexi nga xona ntsena xi nga tlhariha+ hi masiku ni masiku. Amen.
Tinhlamunselu ta le hansi
^ Hi Xigriki: “vakwetsimi”.
^ Hi Xigriki: “beju la ku kwetsima.”
^ Kumbe: “ku navela ka”.
^ Vona Xiyengetelo A3.
