Varoma 4:1-25
4 Loko swi tshamise leswo, hi nga vula swaku vhovho wa hina Abrahamu a kume yini ke?
2 Loko Abrahamu a a vuliwe wa ku lulama hi mhaka ya mintirho ya yena, a a ta va ni xa ku tibuma hi xona, kambe ku nga li ka Xikwembu.
3 Kasi tsalwa li li yini ke? Li li: “Abrahamu a ve ni lipfumelo ka Yehovha,* hi mhaka leyo a vuliwe wa ku lulama.”+
4 Ka lweyi a tirhaka, leswi a swi kumaka a hi nyiko* kambe i muholo wa ntirho wa yena.
5 Kasi lweyi a kalaka a nga tirhi kambe a ni lipfumelo ka Lweyi* a nga vulaka swaku munhu a lulamile, a ta voniwa na a lulamile hi mhaka ya lipfumelo la yena.+
6 Phela hi leswo Davhida a nga swi vula loko a vulavula hi ku tsaka loku munhu a nga na kona loko Xikwembu xi mu vona na a lulamile hambi a nga swi balhelanga, loko a ku:
7 “Va tsaka lava mintirho ya vona ya ku biha yi nga rivaleliwa ni lava swidjoho swa vona swi nga mbhonyiwa.*
8 Wa tsaka munhu lweyi Yehovha* a nga ta kala a nga swi khumbuki swidjoho swa yena.”+
9 Se ina ka, ku tsaka loku ko kumiwa hi lava nga tsema nsuvu* ntsena kumbe ku kumiwa ni hi lava kalaka va nga tsemanga ke?+ Hikusa hi li: “Abrahamu a vuliwe wa ku lulama hi mhaka ya lipfumelo.”+
10 A vuliwe wa ku lulama hi nkama muni? Loko se a tsemile nsuvu kumbe na a nge se tsema? Na a nge se tsema.
11 Xikwembu xi mu byele swaku a tsema nsuvu.+ Leswo a swi ta kombisa swaku xi mu vona na a lulamile hileswi a nga va ni lipfumelo na a nge se tsema nsuvu. Kutani a ve papayi wa hinkwavu lava nga va ni lipfumelo+ na va nge se tsema nsuvu naswona vanhu lava, Xikwembu xi va vona na va lulamile.
12 A tlhele a va papayi wa vana lava nga tsema nsuvu. Kambe ku nga li wa lava nga tsemiwa ntsena kambe ni wa lava nga ni lipfumelo la ku fana ni leli papayi wa hina Abrahamu+ a a li na lona na a nge se tsema nsuvu.
13 Hikusa Abrahamu kumbe vana* va yena a va tshembisiwanga ku dla tshomba la misava+ hi mhaka ya nawu, kambe hileswi va nga vuliwa va ku lulama hi mhaka ya lipfumelo la vona.+
14 Se loko ku li leswaku lava dlaka tshomba la misava va li kuma hi mhaka ya nawu, lipfumelo a li nga ta pfuna nchumu naswona leswi Abrahamu a nga tshembisiwa swona a swi nga ta pfuna nchumu.
15 Phela Nawu wu yendla swaku munhu a kwateliwa hi Xikwembu+ kambe lani ku kalaka ku nga na nawu a wu nge vuli swaku wu tluliwile.+
16 Hi leswo swi yendlaka hi kuma xitshembiso xa Xikwembu hi mhaka ya lipfumelo, hikusa i timpsalu tatikulu ta xona.+ Vana* hinkwavu va Abrahamu+ va nga xi kuma xitshembiso lexi, ku nga li lava yingisaka Nawu ntsena kambe ni lava nga ni lipfumelo la ku fana ni la Abrahamu papayi wa hina hinkwerhu.+
17 (Hilani swi nga tsaliwa hi kona: “Ni ku yendle papayi wa matiko ya manyingi.”)+ Xitshembiso lexi, vhela a xi ta hetiseka naswona Abrahamu a a kholwa ka Xikwembu lexi pfuxaka lava nga fa xi tlhela xi vitana swilo swa ku kala swi nga li kona ingi hiloko swi li kona.
18 Hambileswi a swi tikomba ingi a swi nga ha ta koteka swaku a va ni vana, kambe hi mhaka ya lipfumelo Abrahamu a kholwile swaku a ta va papayi wa matiko ya manyingi, hilaha a nga byeliwa hi kona: “Vana va wena va ta va vanyingi hintamu.”+
19 Naswona hambileswi lipfumelo la yena li kalaka li nga holanga, a pimise swaku a a nga ha ta swi kota ku va ni vana (hi mhaka ya leswi se a a ni kolomuyani ka 100 wa malembe)+ ni hileswi Sara a a gugile hintamu swaku a va ni vana.+
20 Kambe hi mhaka ya xitshembiso xa Xikwembu, a nga kanakananga nikutsongo ni lipfumelo la yena a li holanga; kambe a ve ni matimba hi mhaka ya lipfumelo la yena, a dzunisa Xikwembu
21 a tlhela a kholwa swaku leswi xi nga swi tshembisa xi ta swi kota ku swi yendla.+
22 Kutani “a voniwe na a lulamile hi mhaka ya leswo.”+
23 Kambe marito lama nge: “A voniwe na a lulamile” a ma nga tsaleliwanga yena ntsena,+
24 kambe ma tsaleliwe na hina hi nga ta voniwa na hi lulamile hi mhaka ya leswi hi pfumelaka ka Lweyi a nga pfuxa Hosi ya hina Yesu ka lava nga fa.+
25 A nyikeliwile swaku a dlayiwa hi mhaka ya minandzu ya hina+ naswona a pfuxiwile swaku Xikwembu xi ta hi vula va ku lulama.+
Tinhlamunselu ta le hansi
^ Vona Xiyengetelo A5.
^ Kumbe: “timpsalu tatikulu”.
^ Ku nga Xikwembu.
^ Kumbe: “rivaleliwa.”
^ Vona Xiyengetelo A5.
^ Kumbe: “hamba circuncisão”.
^ Hi Xigriki: “mbewu”.
^ Hi Xigriki: “Mbewu”.