Vayavanyisi 1:1-36
1 Loko Yoxuwa se a file,+ Vayisrayele va vutise Yehovha va ku:+ “I mani lweyi a nga ta rhanga a ya lwa ni Vakanana?”
2 Yehovha a va hlamula a ku: “Ku ta rhanga vana va Yuda.+ Ni ta nyikela Vakanana ka mavoko ya vona.”
3 Vana va Yuda va kombela vana va Simiyoni lava a va li maxaka ya vona, va ku: “A hi fambeni xikan’we ka ndhawu leyi hi nga nyikiwa yona+ hi ya lwa ni Vakanana, na hina hi ta famba na n’wina ka ndhawu leyi mi nga nyikiwa yona.” Se vana va Simiyoni va famba na vona.
4 Nkama vana va Yuda va nga ya ku lweni, Yehovha a nyikele Vakanana ni Vaperezi ka mavoko ya vona,+ se va hlula 10.000 wa vavanuna aBezeki.
5 Va kuma Hosi Adonibezeki aBezeki, se va lwa na yena va gama va hlula Vakanana+ ni Vaperezi.+
6 Nkama Adonibezeki a nga baleka, va mu hlongolisa va mu khoma va mu tsema tintiho tatikulu ka mavoko* ni ka minenge.
7 Se Adonibezeki a ku: “Ku ni 70 wa tihosi leti nga tsemiwa tintiho tatikulu ta mavoko ni ta minenge leti a ti rholela swakudla hansi ka meza wa mina. Xikwembu xi ni yendle leswi ni nga swi yendla ka tona.” Se vana va Yuda va mu yisa Yerusalema+ a gama a ya fela kona.
8 Vavanuna va Yuda va tlhela va ya lwa ni doropa la Yerusalema+ va gama va li hlula; va dlaya vanhu hi xipada va tlhela va hisa ni doropa la kona hi ndzilu.
9 Vavanuna va Yuda va gama va ya lwa ni Vakanana lava a va tshama ka ndhawu ya tintshava ni le Negebi ni Xefela.+
10 Vavanuna va Yuda va tlhela va famba va ya lwa ni Vakanana lava a va tshama aHebroni (vito la khale la Hebroni a ku li Kiriyati-Ariba), va gama va dlaya Xexayi, Ayimani na Talmayi.+
11 A nkama va nga suka lanu va ye va ya lwa ni lava tshamaka ka doropa la Debiri.+ (Vito la khale la Debiri a ku li Kiriyati-Sefa.)+
12 Se Kalebe+ a ku: “Lweyi a nga ta lwa ni doropa la Kiriyati-Sefa a li hlula, ni ta mu nyika n’wana wa mina Akixa swaku a va nsati wa yena.”+
13 Se Otiniyele+ n’wana wa Kenazi,+ makwavu wamutsongo wa Kalebe a lwile ni doropa leliyani a li hlula. A gama Kalebe a mu nyika n’wana wa yena Akixa swaku a va nsati wa yena.
14 A nkama na a muka, Akixa a byele Otiniyele swaku a kombela masimu ka papayi wa yena Kalebe. Se Akixa a xika ka mbongolo ya yena.* Kalebe a mu vutisa a ku: “U lava yini?”
15 Akixa a mu hlamula a ku: “Ni kombela u ni katekisa, leswi u nga ni nyika ndhawu ya Negebi;* ni kombela u ni nyika ni Guloti-Mayimi.”* Se Kalebe a mu nyika Guloti wa le Henhla ni Guloti wa le Hansi.
16 Se a vatukulu va Mukena,+ lweyi a a li papayi wa nsati wa Moxe+ ni vana va Yuda, va suka ka doropa la minsinya ya mintxindzu*+ va ya tshama mananga ya Yuda, ka tlhelo la sul* la Aradi.+ Se va tshama ni vanhu lava va nga va kuma kolanu.+
17 A vana va Yuda va famba ni vana va Simiyoni ku nga maxaka ya vona, va ya lwa ni Vakanana lava a va tshama ka doropa la Zefati, va li helisa.+ Va gama va chula doropa leliyani vito la Orma.*+
18 Vana va Yuda va gama va teka doropa la Gaza+ ni tindhawu ta lona, doropa la Axikeloni+ ni tindhawu ta lona ni doropa la Ekroni+ ni tindhawu ta lona.
19 Yehovha hi yena a a pfuna vana va Yuda. Se va teke ndhawu leyi nga ni tintshava va tshama ka yona, kambe a va swi kotanga ku hlongola lava a va tshama ka tindhawu leti nga ka nkova, hikusa vanhu va kona a va ni tinyolo* ta nyimpi leti nga ni minchumu ya nsimbi ya ku tsemana ka maroda.+
20 Doropa la Hebroni va li nyike Kalebe hi ku ya hi leswi Moxe a nga mu tshembisa swona,+ se a yo vhela a hlongola vana vanharhu va Anaki+ kolanu.
21 Kambe vana va Benjamini a va va hlongolanga Vayebusi lava a va tshama Yerusalema. Se Vayebusi va tama va tshama ni vana va Benjamini aYerusalema ku ta fikela swoswi.+
22 Hi nkama wolowo, vatukulu va Yosefa+ va ye va ya lwa ni vanhu lava tshamaka Betele; naswona a va pfuniwa hi Yehovha.+
23 Se vatukulu va Yosefa va rhuma vavanuna swaku va ya kambela doropa la Betele, khale doropa leli a li vitaniwa Luzi.+
24 Vavanuna volavo va vone wanuna mun’wani na a huma hi ka doropa. Se va mu byela leswi: “Hi kombela u hi komba ndlela ya ku nghena ka doropa leli, loko u hi komba a hi nga ta ku dlaya.”
25 A gama a va komba ndlela ya ku nghena ka doropa, loko se va nghenile va dlayetela vanhu hi xipada, kambe wanuna lwiyani a nga va komba ndlela a va mu dlayanga, va mu tshike a famba ni ndjangu wa yena.+
26 Wanuna lwiyani a ye ka tiko la Vaheti a fika a yaka doropa leli a nga li chula swaku i Luzi. Doropa lelo la ha vitaniwa hi ndlela yoleyo ninamuntlha.
27 Vana va Manasi a va ma tekanga madoropa lawa: Beti-Xoni ni swidoropani swa le kusuhi, Tanaki+ ni swidoropani swa le kusuhi, Dori ni swidoropani swa le kusuhi, Ibileyami ni swidoropani swa le kusuhi ni Mejido ni swidoropani swa le kusuhi.+ Vakanana va tame va tshama hi nkanu ka madoropa lawa.
28 Vayisrayele a va va hlongolanga+ Vakanana, kambe a nkama va nga va ni ntamu va va yendle swikarawa swa vona.+
29 Vana va Efrayimi na vona a va va hlongolanga Vakanana lava a va tshama Jezeri. Vakanana va tame va tshama na vona Jezeri.+
30 Vana va Zebuloni a va va hlongolanga Vakanana lava a va tshama Kitironi ni Nahaloli.+ Vakanana va tame va tshama ni vana va Zebuloni, se a vana va Zebuloni va yendle swaku Vakanana va va swikarawa swa vona.+
31 Vana va Aseri a va va hlongolanga Vakanana lava a va tshama Ako, Sidoni,+ Alabi, Akizibi,+ Eliba, Afiki+ ni Reyobo.+
32 Va tame va tshama na vona hikusa a va nga va hlongolanga.
33 Vana va Naftali a va va hlongolanga Vakanana lava a va tshama Beti-Xemexi ni Beti-Anati,+ kambe va tame va tshama na vona ka tiko lolelo.+ Va yendle swaku Vakanana lava va va swikarawa swa vona.
34 Vaamori va sindzise vana va Dani swaku va tshama ka ndhawu ya tintshava, a va va pfumelelanga swaku va xika.+
35 Se Vaamori va tame va tshama ka Ntshava ya Eresi, Ayiyaloni+ ni Xalibimi.+ Kambe a nkama vatukulu va Yosefa a va ya va va ni ntamu va yendle swaku Vaamori va va swikarawa swa vona.
36 Ndhawu ya Vaamori a yi sukela ka ntshava ya Akrabimi,+ yi tlhela yi sukela Sela yi gama yi khupuka yi ya gangeni.
Tinhlamunselu ta le hansi
^ Ku nga mapolegari.
^ Kumbexana: “a sungule hi ku ba mavoko swaku papayi wa yena a swi vona swaku a lava ku vulavula na yena.”
^ Kumbe: “sul.”
^ Leswi vulaka “Swihlovo Swa Mati.”
^ Kumbe: “mapalmera”.
^ Kumbe: “dzongeni”.
^ Leswi vulaka “Ku Helisiwa.”
^ Kumbe: “tin’qolo; makalichi”.