Vayavanyisi 10:1-18
10 Loko Abimeleki se a file, Xikwembu xi veke Tola n’wana wa Puwa, ntukulu wa Dodo, wa lixaka la Isakara a va muyavanyisi wa Vayisrayele swaku a va ponisa.+ Tola a a tshama Xamiri ka ndhawu ya tintshava ya Efrayimi.
2 A yavanyise Vayisrayele 23 wa malembe. A gama a fa a ya lahliwa Xamiri.
3 Loko Tola se a file, Xikwembu xi veke Yayiri wa Mujiliyadi swaku a va muyavanyisi wa Vayisrayele. A yavanyise Vayisrayele 22 wa malembe.
4 A a ni 30 wa vana lava a va famba hi 30 wa timbongolo, naswona a va ni 30 wa madoropa, lawa ninamuntlha ma ha vitaniwaka Avhoti-Yayiri.+ Madoropa lawa ma ka tiko la Jiliyadi.
5 Se Yayiri a gama a fa a ya lahliwa aKamoni.
6 Vayisrayele va tlhela va sungula ku yendlela Yehovha swilo swa ku biha,+ va sungula ku tirhela swikwembu leswi vitaniwaka Vabali,+ swifaniso swa Axitoreti, swikwembu swa le Siriya,* swikwembu swa le Sidoni, swikwembu swa Vamowabu,+ swikwembu swa Vaamoni+ ni swikwembu swa Vafilista.+ Va tshike Yehovha va nga ha mu tirheli.
7 Kutani Yehovha a va kwatela swinene Vayisrayele, se a va tshika va fumiwa hi Vafilista ni Vaamoni.+
8 Se Vafilista ni Vaamoni va hlupha Vayisrayele ku ku mphum hi lembe lolelo. Phela va hluphe Vayisrayele hinkwavu lava a va tshama ka tlhelo la Yordani 18 wa malembe. Vayisrayele lava hi lava a va li ka tiko leli khale a ku li tiko la Vaamori aJiliyadi.
9 Vaamoni na vona a va tsemakanya Yordani swaku va ya lwa ni lixaka la ka Yuda, la ka Benjamini ni la ka Efrayimi; Vayisrayele a va hlupheka swinene.
10 Se va kombela Yehovha swaku a va pfuna,+ va ku: “Hi ku djohelile hi ku ku tshika wena Xikwembu xa hina, hi ya tirhela swikwembu leswi vitaniwaka Vabali.”+
11 Kambe Yehovha a hlamula Vayisrayele a ku: “A hi mina ni nga mi ponisa ka Vagibita,+ ka Vaamori,+ ka Vaamoni, ka Vafilista,+
12 ka Vasidoni, ka Vaamaleki ni ka Vamidiyani nkama a va mi hlupha? A nkama a mi ni rilela mi ni kombela swaku ni mi pfuna, a ni mi ponisanga ka vona?
13 Kambe hi n’wina lava, mi ni tshikile mi ya tirhela swikwembu swin’wani.+ Se na mina a ni nga ta mi ponisa.+
14 Fambani ka swikwembu swa n’wina leswi mi nga swi langa, kombelani swona swaku swi mi pfuna.+ A swi mi ponise ka mahlomulu ya n’wina.”+
15 Kambe Vayisrayele va byela Yehovha va ku: “Hi ku djohelile. Yendla leswi u swi lavaka hi hina. Kambe ho kombela ntsena swaku u hi ponisa namuntlha.”
16 Va vhela va teka swikwembu swa matiko leswi a va li na swona va swi txukumeta. Kutani va sungula ku tirhela Yehovha,+ a za a va twela wusiwana hi leswi a va hluphisiwa swona.+
17 Hi ku famba ka nkama, Vaamoni+ va tilulamisela swaku va ta lwa nyimpi. Se va ya gwimba matende ya vona aJiliyadi, na vona Vayisrayele va tilulamisela swaku va ta lwa nyimpi, kutani va ya gwimba matende ya vona aMizpa.
18 Vanhu va le Jiliyadi ni varhangeli va kona va vutisana va ku: “Se hi ta rhangeliwa hi mani loko hi ya lwa ni Vaamoni?+ Munhu wa kona a a ve murhangeli wa vanhu hinkwavu lava tshamaka Jiliyadi.”
Tinhlamunselu ta le hansi
^ Kumbe: “Aramu”.
