Vayavanyisi 11:1-40
11 Yefta+ wa Mujiliyadi a a li sonchwa la matimba. Yena a a li n’wana wa nghwavani, naswona papayi wa yena a ku li Jiliyadi.
2 Kambe na yena nsati wa Jiliyadi a mu psalele vana va madjaha. Nkama vana volavo va nga kula, va hlongola Yefta va mu byela va ku: “A lani ka ndjangu wa papayi a wu nga ta kuma tshomba la, hikusa u psaliwe hi wansati mun’wani.”
3 Se Yefta a baleka vamakwavu va yena a ya tshama ka tiko la Tobi. Se vavanuna lava a va nga na mintirho va tipatsa na yena va famba na yena.
4 Hi ku famba ka nkama, Vaamoni va lwa ni Vayisrayele.+
5 Se a nkama Vaamoni a va lwa ni Vayisrayele, madoda ya le Jiliyadi ma tsutsume ma landza Yefta ka tiko la Tobi,
6 ma fika ma byela Yefta ma ku: “Tani u ta va murhangeli wa hina swaku hi ta kota ku lwa ni Vaamoni.”
7 Kambe Yefta a hlamula madoda ya Jiliyadi a ku: “A hi n’wina a mi ni nyenya mi tlhela mi ni hlongola kaya ka papayi?+ Leswi swoswi se mi nga nghozini, hi mhaka muni mi ta ka mina?”
8 Se madoda ya Jiliyadi ma mu hlamula ma ku: “Hi swona! Hi za hi ta lani hi mhaka ya swoleswo. Loko wo pfumela ku famba na hina hi ya lwa ni Vaamoni, hi wena u nga ta hi rhangela ka tiko hinkwalu la Jiliyadi.”+
9 Yefta a hlamula madoda ya Jiliyadi a ku: “Leswi mi ni tlhelisaka kaya swaku ni ya lwa ni Vaamoni, loko Yehovha o ni pfuna swaku ni va hlula, vhela ni ta va murhangeli wa n’wina!”
10 Madoda ya Jiliyadi ma byela Yefta ma ku: “Yehovha a a ve mboni xikarhi ka hina, loko ho kala hi nga yendli leswi u nga swi vula.”
11 Se Yefta a famba ni madoda ya Jiliyadi. Vanhu va fika va mu yendla murhangeli wa vona a tlhela a rhangela masonchwa. Kutani Yefta a phindha marito hinkwawu lawa a nga ma byela madoda aphambheni ka Yehovha aMizpa.+
12 Se Yefta a rhuma vanhu va ya ka hosi ya Vaamoni+ va ya yi byela va ku: “Ni yo ku wonhela yini u zaka u ta ni hlasela ka tiko la mina?”
13 Kutani hosi ya Vaamoni yi hlamula vanhu lava nga rhumiwa hi Yefta yi ku: “Ni za ni ku hlasela, hi mhaka leswi Vayisrayele va nga teka tiko la mina nkama va nga huma Gibita.+ Va teke tiko la mina ku sukela aArinoni+ ku ya fika aYaboki ni Yordani.+ Swoswi ni tlheliseli tiko la mina hi ku rhula.”
14 Kambe Yefta a tlhela a rhuma vanhu va ya ka hosi ya Vaamoni
15 va ya yi byela va ku:
“Yefta a li: ‘Vayisrayele a va zanga va teka tiko la Vamowabu+ ni la Vaamoni,+
16 hikusa nkama Vayisrayele va nga huma Gibita, va fambe hi mananga va hundza hi ka Lwandle la Ku Pshuka,+ anze va ya fika Kadexi.+
17 Se Vayisrayele va rhuma vanhu va ya ka hosi ya Edomu,+ va fika va ku: “Hi kombela u hi tshika hi tsemakanya hi ka tiko la wena,” kambe hosi ya Edomu yi yala. Va tlhela va rhuma vanhu va ya ka hosi ya Mowabu,+ kambe na yona a yi pfumelanga. Hi leswi nga yendla Vayisrayele va tama va tshama Kadexi.+
18 A nkama a va li ku fambeni amananga, a va zanga va nghena ka tiko la Edomu+ ni la Mowabu. Va fambe hi ka tlhelo la le wuxeni ka tiko la Mowabu,+ se va fika va gwimba matende aArinoni. A va zanga va nghena ka tiko la Mowabu,+ hikusa tiko la Mowabu a li sukela kolahayani aArinoni.
19 “‘Vayisrayele va gama va rhuma vanhu va ya ka Sihoni hosi ya Vaamori, lweyi a a fuma aExiboni, va fika va ku: “Hi kombela u hi tshika hi tsemakanya hi ka tiko la wena, hi ya ka tiko la hina.”+
20 Kambe Sihoni a nga pfumelanga swaku Vayisrayele va tsemakanya hi ka tiko la yena, hikusa a a nga va tshembi; naswona a nhlengelete masonchwa ya yena hinkwawu, va ya gwimba matende aYahazi va lwa ni Vayisrayele.+
21 Kutani Yehovha Xikwembu xa Vayisrayele a nyikela Sihoni ni masonchwa ya yena hinkwawu ka mavoko ya Vayisrayele, va za va va hlula. Se Vayisrayele va teka tiko hinkwalu leli Vaamori a va tshama ka lona ka ndhawu yoleyo.+
22 Va teka ndhawu hinkwayu ya Vaamori ku sukela aArinoni ku ya fika aYaboki ni ku sukela mananga ku ya fika Yordani.+
23 “‘Phela i Yehovha Xikwembu xa Vayisrayele lweyi a nga hlongola Vaamori phambheni ka Vayisrayele,+ ku nga vanhu va yena. Se namuntlha leswi, u lava ku va hlongola?
24 Hambi wena a wu swi teki hinkwaswu leswi Kemoxi+ xikwembu xa wena a ku nyikaka swona ke? Kutani munhu lweyi Yehovha Xikwembu xa hina a mu hlongolaka phambheni ka hina, na hina hi ta mu hlongola.+
25 Se wena wo mu tlula Balaki+ n’wana wa Zipori, hosi ya Mowabu? U tshama u twa swaku a holovisane ni Vayisrayele kumbe a lwa na vona ke?
26 Ka 300 wa malembe hinkwawu lawa Vayisrayele va nga ma heta na va tshama Exiboni ni ka swidoropani leswi nga kusuhi na kona,+ ni Arowa ni ka swidoropani leswi nga kusuhi na kona ni nkama a va tshama ka madoropa hinkwawu lawa ma nga kusuhi ni nambu wa Arinoni, hi mhaka muni u nga ma tekanga madoropa wolawo?+
27 Phela mina a ni dlanga xa wena, kambe wena wa phazama leswi u ni hlaselaka. Leswi Yehovha a nga Muyavanyisi+ Wamukulu a a yavanyisi namuntlha axikarhi ka Vayisrayele ni Vaamoni.’”
28 Kambe hosi ya Vaamoni a yi swi yingisanga leswi yi nga byeliwa hi lava nga rhumiwa hi Yefta.
29 Moya wa ku kwetsima wa Yehovha wu va na Yefta,+ se a tsemakanya tiko la Jiliyadi ni la Manasi, a ya ka doropa la Mizpe aJiliyadi.+ Loko a suka ka doropa la Mizpe aJiliyadi a yela Vaamoni.
30 Kutani Yefta a tshembisa+ Yehovha a ku: “Loko wo ni pfuna ni hlula Vaamoni,
31 lweyi a nga ta huma hi ka nyanghwa wa yindlo ya mina a ni tlhangaveta loko ni vuya hi ku lweni ni Vaamoni, a ta va wa wena Yehovha+ naswona ni ta mu nyikela a va gandzelo la ku hisiwa.”+
32 Yefta a gama a ya lwa ni Vaamoni. Se Yehovha a mu pfuna swaku a va hlula.
33 A dlaye vanhu ku sukela aArowa a famba anze Miniti, a za a ya fika ni Abel-Keramimi. Phela a dlaye vanhu va vanyingi a tlhela a teka ni 20 wa madoropa. Vayisrayele va va hlulise swoleswo Vaamoni.
34 Yefta a game a tlhela kaya ka yena aMizpa.+ A nkama a nga fika, a tlhangavetiwa hi n’wana wa yena wa ntombhi na a chaya xingomana a tlhela a txina. Phela a a nga na n’wana mun’wani, a ko va yena ntsena.
35 Nkama a nga mu vona, a handzula mpahla ya yena a gama a ku: “Yoo, n’wananga! U ni tshove mbilu, hikusa hi wena ni faneleke ni ku nyikela. Phela se ni mu tshembisile Yehovha, a ni nge he swi koti ku tlhela ndzhaku.”+
36 Kambe a mu hlamula a ku: “Papayi, loko u mu tshembisile Yehovha, yendla leswi u nga mu tshembisa swona;+ hikusa Yehovha a ku pfunile swaku u hlula* Vaamoni valala va wena.”
37 A gama a byela papayi wa yena a ku: “Ni kombela u ni yendlela nchumu xin’we ntsena: Ni tshike ni ya tshama tiwheti timbirhi ka tintshava, ni rila ni vanghanu va mina va tintombhi, hikusa a ni nga ha ta chadiwa.”
38 Se Yefta a ku: “Famba!” Kutani a mu tshika a famba a ya rila tiwheti timbirhi ka tintshava ni vanghanu va yena va tintombhi, hikusa a a nga ha ta chadiwa.
39 Loko tiwheti timbirhi se ti helile, a tlhela a ya ka papayi wa yena. Papayi wa yena a yendla leswi a a swi tshembisile hi yena.+ Ntombhi leyi a yi zanga yi famba masangu wutomi la yona hinkwalu. Se ku gama ku huma nawu* aIsrayele:
40 Lembe ni lembe, tintombhi ta Vayisrayele a ti fanele ti ya pfuxela n’wana wa Yefta wa Mujiliyadi 4 wa masiku hi lembe swaku ti mu tiyisa.
