Vayavanyisi 12:1-15
12 Se vavanuna va Efrayimi va hlengeletana va tsemakanya nambu va ya Safoni,* va gama va byela Yefta va ku: “Hi mhaka muni u nga hi vitananga nkama u nga ya lwa ni Vaamoni?+ Hi ta ku hisa ka yindlo ya wena.”
2 Kambe Yefta a va hlamula a ku: “Mina ni vanhu va mina hi lwe hintamu ni Vaamoni. Ni mi vitanile swaku mi ta ni pfuna, kambe a mi tanga.
3 Nkama ni nga vona swaku a mi nga ta ni pfuna, ni veke wutomi la mina nghozini ni famba ni ya lwa ni Vaamoni,+ kutani Yehovha a va nyikela ka mavoko ya mina. Se hi mhaka muni n’wina namuntlha mi ta mi ta lwa na mina?”
4 Kutani Yefta a hlengeleta vavanuna hinkwavu va Jiliyadi,+ swaku va ya lwa ni vavanuna va lixaka la Efrayimi. Se vavanuna va Jiliyadi va hlula vavanuna va lixaka la Efrayimi, lava a va ku: “N’wina vanhu va Jiliyadi, mi tshama ka tindhawu ta Efrayimi na Manasi, kambe mi ntlawa lowu nga baleka ka lixaka la Efrayimi.”
5 Vavanuna va Jiliyadi va teka tindhawu leti ku tsemakanyiwaka hi ka tona aYordani,+ va gama va veka vavanuna kolanu swaku va nga tshiki vavanuna va lixaka la Efrayimi va baleka. Loko wanuna wa lixaka la Efrayimi a kombela ku tsemakanya swaku a baleka, vavanuna va Jiliyadi a va mu vutisa va ku: “U wa lixaka la Efrayimi?” Loko a ku: “Ihim,”
6 a va gama va ku: “Hi kombela u ku Xiboleti.” Kambe yena a a ku: “Siboleti,” hikusa a swi mu karhatela ku hlaya swaku “Xiboleti”. Se a va gama va mu khoma va ya mu dlaya aYordani. Hi nkama wolowo ku dlayiwe 42.000 wa vanhu va lixaka la Efrayimi.
7 Yefta wa Mujiliyadi a yavanyise Vayisrayele 6 wa malembe, a gama a fa a ya lahliwa ka doropa la yena aJiliyadi.
8 Kutani Ibizani lweyi a a ta hi Betlehema a sungula ku yavanyisa Vayisrayele.+
9 A a ni 30 wa vana va madjaha ni 30 wa vana va tintombhi. A pfumelele swaku vana va yena va tintombhi va chadiwa hi vavanuna va ku a hi va lixaka la yena a tlhela a chadisa 30 wa vana va yena va madjaha. A yavanyise Vayisrayele 7 wa malembe.
10 Se Ibizani a fa, a lahliwa Betlehema.
11 Kutani Eloni wa lixaka la Zebuloni a sungula ku yavanyisa Vayisrayele; a va yavanyise 10 wa malembe.
12 Se Eloni wa lixaka la Zebuloni a fa, a gama a lahliwa aAyiyaloni ka tiko la Zebuloni.
13 Kutani Abidoni n’wana wa Hilileli wa Mupiratoni a sungula ku yavanyisa Vayisrayele.
14 A a ni 40 wa vana va madjaha ni 30 wa vatukulu va madjaha, lava a va famba hi 70 wa timbongolo. A yavanyise Vayisrayele 8 wa malembe.
15 Se Abidoni n’wana wa Hilileli wa Mupiratoni a fa, a gama a lahliwa aPiratoni ka tiko la Efrayimi ka ntshava ya Vaamaleki.+
Tinhlamunselu ta le hansi
^ Kumbexana: “a va tlulela ka tlhelo la norte”.
