Vayavanyisi 13:1-25
13 Vayisrayele va tlhela va sungula ku yendlela Yehovha swilo swa ku biha,+ se Yehovha a va tshika va fumiwa hi Vafilista,+ 40 wa malembe.
2 Hi nkama wolowo, a ku ni wanuna mun’wani wa lixaka la ka Dani+ lweyi a a tshama Zora;+ vito la yena a ku li Manowa.+ Nsati wa yena a a nga na vana hikusa a a nga psali.+
3 Siku lin’wani ntsumi ya Yehovha yi humelela ka wansati lweyi, yi mu byela yi ku: “Hambileswi u kalaka u nga na vana hi mhaka ya leswi u kalaka u nga psali, u ta kuma nyimba, se u psala* n’wana wa djaha.+
4 U nga tshuki u phuza byala+ naswona u nga dli minchumu ya ku kala yi nga basanga.+
5 Phela u ta kuma nyimba, se u psala n’wana wa djaha. A misisi ya yena a yi fanelanga yi tsemetiwa,+ hikusa a ta va Munaziri* wa Xikwembu ku sukela ka siku leli a nga ta psaliwa hi lona; hi yena a nga ta ponisa Vayisrayele ka Vafilista.”+
6 Se wansati a famba a ya byela nuna wa yena a ku: “Ni teliwe hi mutirheli wa Xikwembu xa ntiyiso, leswi a a tshamise swona a swi hlamalisa; a a fana ni ntsumi ya Xikwembu xa ntiyiso. A ni mu vutisanga swaku a a ta hi kwini, na yena a nga ni byelanga vito la yena.+
7 Yena a ni byele swaku: ‘Phela u ta kuma nyimba! Se u psala n’wana wa djaha. U nga nwi byala naswona u nga dli minchumu ya ku kala yi nga basanga, hikusa n’wana lweyi u nga ta mu psala a ta va Munaziri* wa Xikwembu ku sukela siku leli a nga ta psaliwa hi lona anze siku leli a nga ta fa hi lona.’”
8 Kutani Manowa a kombela Yehovha a ku: “Ni rivaleli Yehovha. Ha ku kombela wena Xikwembu xa ntiyiso swaku u tlhela u rhuma mutirheli wa wena lweyi a wu mu rhumile, swaku a ta hi tlhamusela leswi hi faneleke hi mu kulisisa xiswona n’wana lweyi a nga ta psaliwa.”
9 Xikwembu xa ntiyiso xi swi yingisile leswi Manowa a nga swi kombela. Se ntsumi ya Xikwembu xa ntiyiso yi tlhela yi vuya ka nsati wa yena na a li handle ka doropa; nuna wa yena Manowa a a nga li na yena.
10 Nsati wa Manowa a yo vhela a ku vhuthu, a tsutsuma a ya byela nuna wa yena a ku: “Phela wanuna lwiyani a nga ni tela siku leliyani a tlhele a vuya.”+
11 Kutani Manowa a vhela a famba ni nsati wa yena. A nkama a nga fika lani wanuna lwiyani a a li kona, a mu vutisile a ku: “Hi wena u nga vulavula ni nsati wa mina?” A mu hlamula a ku: “Ina, hi mina.”
12 Se Manowa a ku: “Leswi u nga swi vula a swi yendleke hi ndlela yoleyo! Kutani hi kombela u hi byela swaku hi ta mu kulisisa ku yini n’wana lweyi ni leswaku a ta yendla yini?”+
13 Se ntsumi ya Yehovha yi byela Manowa yi ku: “Nsati wa wena a fanele a yendla hinkwaswu leswi ni nga mu byela swona.+
14 A nga tshuki a dla nchumu lexi taka hi ka nsinya wa mawuvha, a nga tshuki a phuza byala,+ naswona a nga tshuki a dla minchumu ya ku kala yi nga basanga.+ A fanele a yendla hinkwaswu leswi ni nga mu byela swona.”
15 Se Manowa a byela ntsumi ya Yehovha a ku: “Hi kombela u nyimanyana hi ta ku dlayela ximbutani.”+
16 Kutani ntsumi ya Yehovha yi hlamula Manowa yi ku: “Hambi no tshama a ni nga ta dla swakudla swa wena; kambe loko u lava ku nyika Yehovha gandzelo la ku hisiwa, u nga li nyikela.” Kambe Manowa a a nga swi tivi swaku a ku li ntsumi ya Yehovha.
17 Manowa a gama a vutisa ntsumi ya Yehovha a ku: “Hi wena mani vito la wena,+ swaku loko leswi u nga swi vula swi yendleka hi ta ku dzunisa?”
18 Ntsumi ya Yehovha yi mu hlamula yi ku: “Hi mhaka muni u ni vutisa vito la mina? Phela vito la mina la hlamalisa.”
19 Se Manowa a teka ximbutani ni gandzelo la swakudla a swi tlhateka henhla ka ribye swaku a swi nyikela ka Yehovha. Kutani Xikwembu xi yendla masingita, na Manowa ni nsati wa yena na va swi vona.
20 A nkama ndzilu a wu pfurha ka altari wu ya tilweni, Manowa ni nsati wa yena va vone ntsumi ya Yehovha na yi famba hi ka ndzilu lowu a wu pfurha ka altari wu ya tilweni. Se va khizama va txuvuka hansi.
21 Ntsumi ya Yehovha a ya ha tlhelanga yi humelela ka Manowa ni nsati wa yena. Kutani hi kona Manowa a nga tsumbula swaku phela a ku li ntsumi ya Yehovha.+
22 Manowa a gama a byela nsati wa yena a ku: “Phela hi ta fa hikusa hi vone Xikwembu.”+
23 Kambe nsati wa yena a mu hlamula a ku: “Phela loko Yehovha a wo lava ku hi dlaya, ina a nga li yamukelanga gandzelo la ku hisiwa+ ni gandzelo la swakudla leli hi nga li nyikela. Naswona ina a nga hi kombanga swilo leswi hinkwaswu ni ku hi byela swilo leswi hinkwaswu.”
24 Hi ku famba ka nkama wansati lweyi a psala n’wana wa djaha, a mu chula swaku i Samsoni.+ A nkama djaha leli a li ya li kula, Yehovha a a tama a li katekisa.
25 Se moya wa ku kwetsima wa Yehovha wu sungula ku tirha ka Samsoni+ nkama a a li aMahani-Dani+ axikarhi ka Zora ni Exitayoli.+
Tinhlamunselu ta le hansi
^ Kumbe: “veleka”.
^ Leswi vulaka “A Nga Nyikeliwa kumbe A Nga Vekiwa Tlhelweni”.
^ Leswi vulaka “A Nga Nyikeliwa kumbe A Nga Vekiwa Tlhelweni”.
