Vayavanyisi 14:1-20
14 Se Samsoni a ya Timina; nkama a nga fika seniyani, a vona wansati wa Mufilista,
2 a gama a tlhela a ya ka vapsali va yena a fika a ku: “Ni navele wansati wa Mufilista aTimina, ni kombela swaku mi ya ni tekela yena swaku a va nsati wa mina.”
3 Kambe vapsali va yena va mu hlamula va ku: “Ko kala ku nga na wansati lweyi u nga mu chadaka ka maxaka ya hina ni ka vanhu va hina,+ u zaka u lava ku ya teka wansati ka Vafilista lava kalaka va nga xi tirheli Xikwembu?”* Kambe Samsoni a byela papayi wa yena a ku: “Famba u ya ni tekela yena hikusa hi yena a ni tsakisaka.”
4 Vapsali va yena a va nga se swi tsumbula swaku leswi swi ta hi ka Yehovha, hikusa A* a lava ndlela ya ku lwa ni Vafilista. Phela hi nkama wolowo Vafilista hi vona a va fuma Vayisrayele.+
5 Kutani Samsoni ni Vapsali va yena va famba va ya Timina. A nkama a nga fika ka masimu lawa a ku byaliwe mawuvha aTimina, ku humelela nghonyama yi mu tela na yi bonga.
6 Se moya wa ku kwetsima wa Yehovha wu tirha ka yena,+ a yi khoma a yi handzula hi le xikarhi ku fana ni loko munhu a handzula ximbutani hi xikarhi hi mavoko. Kambe a nga va byelanga vapsali va yena leswi a nga swi yendla.
7 Kutani Samsoni a famba a ya vulavula ni wansati lwiyani, hikusa a a nga gwenti hi yena.+
8 Nkama a nga tlhela a ya Timina swaku a ya teka wansati lwiyani a muka na yena,+ a djika a ya kamba nghonyama liyani a nga yi dlaya. Se a fika a kuma swaku ku ni tinyoxi ta tinyingi ni wulombe andzeni ka yona.
9 Kutani a teka wulombe hi mavoko a li dla na a famba. A nkama a nga tlhangana ni vapsali va yena, a va nyika lalitsongo na vona va dla. Kambe a nga va byelanga swaku a li kume ka nghonyama leyi a nga yi dlaya.
10 Papayi wa Samsoni a yela wansati lweyi, se Samsoni a hamba fexta kolahayani, hikusa hi leswi madjaha a ma tolovele ku swi yendla.
11 A nkama va nga mu vona, va mu tisele 30 wa vavanuna.
12 Kutani Samsoni a va byela leswi: “Ni kombela ku mi byela nchumu. Loko mo swi kota ku ni byela ntlhamuselo ya nchumu lowu ka 7 wa masiku lawa ya fexta, ni ta mi nyika 30 wa tinguvu ni 30 wa timpahla.
13 Kambe loko mi nga swi koti ku ni byela ntlhamuselo wa kona, hi n’wina mi nga ta ni nyika 30 wa tinguvu ni 30 wa timpahla.” Se vavanuna lava va ku: “Hi byeli nchumu wa kona; hi lava ku wu twa.”
14 A va byela a ku:
“Ka lexi dlaka ku hume lexi dliwaka,Naswona ka lexi nga ni matimba ku hume nchumu wa ku tsokombela.”+
Ku hundze masiku manharhu na va nga swi koti ku mu tlhamusela swaku a a lava ku vula yini hi leswi a nga va byela swona.
15 Hi siku la wu 4 va byela nsati wa Samsoni va ku: “Xenga nuna wa wena+ a hi tlhamusela swaku marito lawa ma vula yini. Loko u nga yendli leswo hi ta ku hisa hi ndzilu, wena ni ndjangu wa papayi wa wena. Mi nga tshuka mi hi rhamba mi gama mi ta hi tekela minchumu ya hina lani?”
16 Se nsati wa Samsoni a tshamela ku mu rilela a ku: “Wena wa ni nyenya we; a wu ni rhandzi.+ U byele vanhu va ka hina minchumu kambe mina a wu ni byelanga swaku swi hlaya swaku yini.” Kutani Samsoni a ku: “Phela hambi hi vapsali va mina a ni va byelanga! Se hi mhaka muni a ni fanele ni byela wena?”
17 A tame a mu rilela masiku hinkwawu ya fexta la 7 wa masiku. Samsoni a za a karhala a mu byela hi siku la wu 7 leswi marito lawayani a ma hlaya swona, hikusa a a mu sindzisa. Loko se a mu byelile a yo vhela a ya byela vavanuna va doropa la yena.+
18 Kutani hi siku la wu 7 na li nga se pela, vavanuna va doropa va mu byela va ku:
“I ntxini xa ku tsokombela ku tlula wulombe,Naswona i ntxini xi nga ni matimba ku tlula nghonyama?”+
A va hlamula a ku:
“Loko a mi nga byeliwanga hi nsati wa mina,*+Ina mi nga yi tivanga ntlhamuselo ya leswi ni nga mi byela.”
19 Kutani moya wa ku kwetsima wa Yehovha wu sungula ku tirha ka yena.+ A suka a ya Axikeloni+ a fika a dlaya 30 wa vavanuna, a gama a va tekela mpahla a ya nyika vavanuna lavayani va nga mu tlhamusela leswi a nga va byela.+ A gama a muka kaya ka papayi wa yena na a kwate hintamu.
20 Nsati wa Samsoni+ a game a sala a chadiwa hi mun’we ka vavanuna lavayani va 30.+
Tinhlamunselu ta le hansi
^ Kumbe: “va ku kala va nga tsemanga nsuvu.”
^ Swi tikomba na swi kombetela ka Xikwembu.
^ Hi Xiheberu: “loko a mi nga rimanga hi xihon’wani xa mina”.
