Vayavanyisi 15:1-20
-
Samsoni a hakelisa ka Vafilista (1-20)
15 Hi ku famba ka nkama, hi nkama wa ku tshoveliwa ka trigu, Samsoni a teka ximbutani a famba na xona a ya pfuxela nsati wa yena. Se a tibyela leswi: “Ni lava ku nghena ka kwartu la nsati wa mina.” Kambe papayi wa nsati wa yena a nga pfumelanga swaku a nghena.
2 Kutani papayi wa nsati wa yena a ku: “A ni pimisa swaku a wu mu rhandzi.+ Se ni mu nyikele ka wanuna mun’wani*+ swaku a va nsati wa yena. A makwavu wa yena wamutsongo a nga sasekanga ku mu tlula ke? Ni kombela u teka yena a va nsati wa wena.”
3 Samsoni a ku: “Swoswi Vafilista va nga ni soli loko ni va hlasela.”
4 Se Samsoni a ya khoma 300 wa timbyana ta khwati.* A ti teka a ti bohanisa mintxila hi timbirhimbirhi, a gama a teka tinhonga a ti veka xikarhi ka mintxila ya tona.
5 A tlhavika ndzilu ka tinhonga a gama a tshika timbyana toleto ti famba ka masimu ya Vaflista. A hise minchumu hinkwayu ku sukela ka tinyandza ta trigu, trigu la ku a li nge se tshoveliwa, masimu ya mawuvha anze ka minsinya ya mawolivhera.
6 Vafilista va vutisa va ku: “I mani a nga yendla leswi?” Va va hlamula va ku: “I Samsoni mukon’wani wa Mutimina, hikusa va teke nsati wa yena va mu nyika wanuna mun’wani.”*+ Se Vafilista va famba va ya hisa wansati yelweyo ni papayi wa yena hi ndzilu.+
7 Samsoni a va byela a ku: “Hambileswi mi nga yendla leswi, a ni nga ta tshika ku mi hakelisa.”+
8 Se a dlaya Vafilista va vanyingi a gama a famba a ya tshama ka mhakwa* lowu nga ka ribye leli vitaniwaka Etami.
9 Hi ku famba ka nkama Vafilista va game va ya gwimba matende ya vona aYuda, va gama va sungula ku djikadjika aLehi.+
10 Kutani vavanuna va Yuda va va vutisa va ku: “Hi mhaka muni mi hi hlasela?” Va va hlamula va ku: “Hi ta hi ta khoma* Samsoni, swaku hi ta mu yendla leswi na hina a nga hi yendla swona.”
11 Se 3.000 wa vavanuna va Yuda va yela Samsoni lani a a li kona ka mhakwa lowu nga ka ribye la Etami, va fika va ku: “Wo kala u nga swi tivi swaku hina hi fumiwa hi Vafilista?+ Kutani hi mhaka muni u hi yendle leswi?” Samsoni a va hlamula a ku: “Ni va yendle leswi na vona va nga ni yendla swona.”
12 Va byela Samsoni va ku: “Hi tele ku ta ku khoma* swaku hi ta ku nyikela ka Vafilista.” Samsoni a va byela a ku: “Ni kombela mi funga swaku a mi nga ta ni vavisa.”
13 Va mu byela va ku: “A hi nga ta ku vavisa, naswona a hi nga ta ku dlaya kambe hi to ku boha hi ku nyikela ka vona.”
Kutani va mu boha hi magoda mambirhi ya nyuwani, va gama va mu humesa ka ribye.
14 Nkama a nga fika aLehi, Vafilista va mu tlhangaveta na va kulungela hi ku tsaka. Moya wa ku kwetsima wa Yehovha wu sungula ku tirha ka yena,+ se a tsema magoda lawa a va mu bohe hi wona ka mavoko ma wa hansi ingaku ko va tingoti loko ti psha hi ndzilu.+
15 A gama a kuma rhambu* la mbongolo* leyi a ya ha ku fa; a li teka a dlaya 1.000 wa vavanuna hi lona.+
16 Se Samsoni a ku:
“Ni dlaye valala hi rhambu la mbongolo, ni va hlengeleta va va tinyandza!
Ni dlaye 1.000 wa vavanuna+ hi rhambu la mbongolo.”
17 A nkama a nga gama ku vula leswo, a txukumete rhambu* leli a a li khomile a gama a chula ndhawu yoleyo a ku i Ramati-Lehi.*+
18 A gama a twa torha lalikulu, se a huwelela ka Yehovha a ku: “Hi wena u nga ni pfuna mina mutirheli wa wena swaku ni hlula. Se u ta ni tshika ni fa hi torha, swaku ni nyikeliwa ka vanhu lava kalaka va nga ku tirheli?”*
19 Xikwembu xi pfula xikhele aLehi, ku gama ku sungula ku huma mati ka xona.+ A nkama a nga gama ku nwa mati, a sungula ku tlhela a va ni matimba. Hi leswo swi nga mu yendla a chula ndhawu liyani a ku i Eni-Akori.* Ndhawu leyi ya ha li kona ninamuntlha aLehi.
20 Samsoni a yavanyise Vayisrayele 20 wa malembe ka nkama lowu a va fumiwa hi Vafilista.+
Tinhlamunselu ta le hansi
^ Ku nga mun’we ka vavanuna lavayani va 30 lava a va li na yena siku a nga mu chada.
^ Lani ku vulavuliwa hi timhungubye.
^ Ku nga mun’we ka vavanuna lavayani va 30 lava a va li na yena siku a nga mu chada.
^ Ku nga mbhovo lowu kumekaka ka ntshava kumbe ka ribye.
^ Kumbe: “boha”.
^ Kumbe: “boha”.
^ Kumbe: “rhambu la xihlaya; rhambu la maxilar”.
^ Kumbe: “mbongolo ya xinuna”.
^ Kumbe: “rhambu la xihlaya; rhambu la maxilar”.
^ Leswi vulaka “Ganga La Rhambu La Xihlaya.”
^ Kumbe: “va ku kala va nga tsemanga nsuvu.”
^ Leswi vulaka “Xikhele Xa Mati Xa Lweyi A Huwelelaka.”
