Vayavanyisi 17:1-13
-
Swifaniso swa Mikiya ni muprista wa yena (1-13)
17 A ku ni wanuna mun’wani lweyi a a tshama ka ndhawu ya tintshava ya Efrayimi,+ vito la yena a ku li Mikiya.
2 Se a byela mamani wa yena a ku: “Wa ha swi khumbuka 1.100 wa swikhemu swa prata leswi va nga ku yivela, u gama u ku a a rhukiwe lweyi a nga swi yiva na ni swi twa? Prata lolelo li na mina phe. Hi mina a ni li yivile.” Se mamani wa yena a ku: “Yehovha a a ku katekise n’wananga.”
3 Se a gama a teka 1.100 wa swikhemu swa prata a swi tlhelisa ka mamani wa yena, kambe mamani wa yena a ku: “A prata leli ni ta li nyika Yehovha swaku wena n’wananga u tiyendlela swifaniso hi lona;+ se a prata leli li ta va la wena.”
4 Loko se a tlhelisile prata ka mamani wa yena, mamani wa yena a teke makilu* mambirhi ya lona a nyika munhu lweyi a yendlaka minchumu hi prata. Se munhu lweyi wa ku yendla swifaniso a yendla swifaniso swimbirhi, swi gama swi ya vekiwa kaya ka Mikiya.
5 Mikiya a a ni yindlo leyi a a gandzela swifaniso ka yona. Se a yendla efodi*+ ni swifaniso,*+ a gama a langa mun’we ka vana va yena swaku a va muprista wa yena.+
6 Ka masiku wolawo a ku nga na hosi aIsrayele.+ Mun’wani ni mun’wani a a tiyendlela ku rhandza.*+
7 A ku ni djaha la Betlehema+ aYuda, leli a li ta hi ka ndjangu wa ka Yuda. A li li Mulevhi+ naswona se a li ni nkamanyana na li tshama seniya.
8 Djaha leli li gama li suka ka doropa la Betlehema aYuda, li famba li lava ndhawu ya ku tshama ka yona. A nkama a li famba li lava ndhawu ya ku tshama ka yona, li fike ka munti wa Mikiya,+ lowu nga ka ndhawu ya tintshava ya Efrayimi.
9 Mikiya a li vutisa a ku: “U ta hi kwini?” Li mu hlamula li ku: “Ni Mulevhi. Ni ta hi Betlehema aYuda, ni famba ni lavetela ndhawu ya ku tshama ka yona.”
10 Mikiya a li byela leswi: “Tshama na mina u va papayi* wa mina ni muprista wa mina. Ni ta ku nyika 10 wa swikhemu swa prata hi lembe, ni mpahla ni swakudla.” Se djaha leli la Mulevhi li nghena.
11 Djaha leli la Mulevhi li pfumela ku tshama na Mikiya, a li hlayisa ku fana ni vana va yena.
12 Mikiya a veka djaha leli la Mulevhi swaku li va muprista wa yena+ li tlhela li tshama kaya ka yena.
13 Mikiya a gama a ku: “Swoswi na swi tiva swaku Yehovha a ta ni katekisa, hikusa muprista wa mina i Mulevhi.”
Tinhlamunselu ta le hansi
^ Kumbe: “200 wa tixikele”. Vona Xiyengetelo B14.
^ Kumbe: “swifaniso swa materafimi; swikwembu swa ndjangu; swifaniso swa mavunhwa”.
^ Vona Ntlhamuselo.
^ Kumbe: “leswi a a pimisa swaku swi lulamile.”
^ Kumbe: “mutsundzuxi”.
