Vayavanyisi 18:1-31
18 Ka masiku wolawo a ku nga na hosi aIsrayele,+ naswona va lixaka la ka Dani+ a va lava ndhawu ya ku tshama ka yona, hikusa a va nga se li kuma tshomba la vona xikarhi ka tinxaka ta Israyele.+
2 Se va ka Dani va rhumela 5 wa vavanuna va lixaka la ka vona, swaku va ya kambela tiko va tlhela va djikadjika ka lona va li vona kahle. Va lange vavanuna va ku kala va nga chavi nchumu va le Zora ni Exitayoli.+ Se va va byela va ku: “Fambani mi ya djikadjika ka tiko mi li vona kahle.” Se va famba va gama va fika va yetlela ka munti wa Mikiya+ lowu nga ka ndhawu ya tintshava ya Efrayimi.
3 A nkama a va li kusuhi ni munti wa Mikiya, va twa rito la djaha leliyani la Mulevhi. Se va li yela va fika va li vutisa va ku: “I mani a nga ku tisa lani? U tirha yini lani? I ntxini xi ku yendlaka u tshama lani?”
4 Djaha leli li va byela leswi Mikiya a nga li yendlela swona li ku: “A ni thole swaku ni va muprista wa yena.”+
5 Va gama va li byela leswi: “Hi kombela u hi vutisela ka Xikwembu swaku tindlela ta hina ti ta hi basela lomu hi yaka kona kumbe a ti nga ta basa.”
6 Se li va hlamula li ku: “Fambani hi ku rhula. Yehovha a ta va na n’wina.”
7 Se vavanuna lavayani va 5 va famba va ya fika Layixi.+ Va fika va kuma swaku vanhu va doropa lolelo a va fana ni Vasidoni, a va tshamisekile naswona a swi nga lavi swaku va pfuniwa hi vanhu van’wani. A va rhulile, a va nga pimiseli munhu swa ku biha+ naswona a ku nga na tihosi leti a ti va hlupha. A va tshama kule swinene ni Vasidoni naswona a va nga twani ni vanhu van’wanyani.
8 Nkama va nga tlhelela aZora ni Exitayoli,+ vanhu va ka vona va va vutisile va ku: “Mi kume swa ku yini?”
9 Va hlamula va ku: “Hi li vone kahle tiko la vona, i linene hintamu. Se a hi fambeni hi ya lwa na vona, kasi ma ha tshamela yini? Mi nga ha hlweli, fambani mi ya teka tiko.
10 A nkama mi nga ta fika, mi ta swi vona swaku vanhu va kona a va pimiseli munhu swa ku biha+ naswona va ni tiko lalikulu. Xikwembu xi mi nyike lona naswona li ni hinkwaswu mi swi lavaka.”+
11 Se 600 wa vavanuna va lixaka la ka Dani lava nga tilulamisela ku lwa nyimpi va suka Zora ni Exitayoli,+
12 va ya gwimba matende aKiriyati-Yerimi+ aYuda. Hi leswi nga yendla swaku ndhawu leyo, leyi nga awupeladlambu ka Kiriyati-Yerimi, yi vitaniwa Mahani-Dani*+ ku ta fika ninamuntlha.
13 Loko va suka kolanu va ya ka ndhawu ya tintshava ya Efrayimi, va gama va ku swee akaya ka Mikiya.+
14 Se 5 wa vavanuna lava nga ya kambela tiko la Layixi+ va byela vanhu va ka vona va ku: “Indjhe ma swi tiva swaku ka tiyindlo leti ku ni efodi,* xifaniso xa ku yendliwa hi prata, xifaniso xa ku yendliwa hi nsimbi ni swifaniso swin’wani?*+ Se pimisani swaku mi ta yendla yini.”
15 Va vhela va nyima kolanu. Se a vavanuna lavaya va 5 va ya ka yindlo ya djaha la Mulevhi+ leyi a yi li kusuhi ni yindlo ya Mikiya, va fika va li pfuxela.
16 Hi nkama wolowo, 600 wa vavanuna va lixaka la ka Dani+ lava nga tilulamisela ku lwa nyimpi va fika va nyima ka xipfalu.
17 Vavanuna lavayani va 5 lava nga ya kambela tiko+ va fika va nghena ndlwini, va teka efodi,*+ xifaniso xa prata,+ xifaniso xa nsimbi+ ni swifaniso swin’wani.* (Muprista+ a a nyime ka xipfalu ni 600 wa vavanuna lava a va tilulamisele ku lwa nyimpi.)
18 Va nghene kaya ka Mikiya va teka efodi,* xifaniso xa prata, xifaniso xa nsimbi ni swifaniso swin’wani.* Se muprista a va vutisa a ku: “Kasi mi yendletela yini?”
19 Va mu hlamula va ku: “Pfala nomo u ku whii, u famba na hina hi ta ku veka u va papayi* wa hina ni muprista wa hina. Ku yampsa yini ka ku va muprista wa ndjangu wa munhu mun’we+ ni ku va muprista wa lixaka la Israyele,+ leli nga ni mindjangu ya yinyingi?”
20 Kutani muprista a tsaka, a vhela a teka efodi,* xifaniso xa prata, xifaniso xa nsimbi ni swifaniso swin’wani*+ a famba na vona.
21 Se va suka va famba, va rhangisa vana, swifuyu ni swilo swa vona swa lisima.
22 A nkama va ka Dani se a va fambe mpfhukanyana na va suka kaya ka Mikiya, vavanuna lava a va tshama kusuhi ni kaya ka Mikiya va hlengeletanile va va hlongolisa.
23 A nkama a va huwelela va vitana vanhu va ka Dani, va ka Dani va ndzulukile va byela Mikiya va ku: “Hi yo ku wonhela yini, u zaka u hi tela ni vanhu va vanyingi?”
24 Yena a va hlamula a ku: “Mi teke swikwembu swa mina leswi ni nga swi yendla mi tlhela mi teka ni muprista wa mina. A na ha salanga ni nchumu. Kutani hi mhaka muni mu ni vutisa mi ku: ‘Hi yo ku wonhela yini?’”
25 Va ka Dani va mu hlamula va ku: “U nga hi vangeli guwa hikusa vavanuna lava nga kwata va nga mi hlasela, se va ku dlaya wena ni ndjangu wa wena.”
26 Kutani vanhu va ka Dani va tifambela; funtshi leswi Mikiya a nga vona swaku a a nga ta va hlula, a yo vhela a tlhela kaya ka yena.
27 Loko se va teke swikwembu leswi Mikiya a nga swi yendla va tlhela va teka ni muprista wa yena, va ye Layixi,+ ku nga doropa la vanhu va ku rhula, va ku kala va nga pimiseli munhu swa ku biha.+ Va fika va va dlaya hi xipada va tlhela va hisa doropa la vona hi ndzilu.
28 A nga kona lweyi a a ta ponisa vanhu va doropa leli hikusa a li li kule swinene ni Sidoni naswona vona a va nga twanani ni vanhu van’wani; a doropa leli a li li ka nkova wa Beti-Reyobo.+ Se va ka Dani va li pfuxeta va tshama ka lona.
29 Va tlhele va chula doropa leliyani vito la Dani,+ ku nga vito la papayi wa vona, lweyi a a li n’wana wa Israyele.+ Khale a doropa leli a li vitaniwa swaku i Layixi.+
30 Kutani va ka Dani va tlhele va teka xifaniso xa prata+ va xi nyimisa ka doropa leliyani, va gama va veka Yonatani+ n’wana wa Jerixomu+ lweyi a a li n’wana wa Moxe ni vana va yena swaku va va vaprista va vanhu va lixaka la ka Dani. Va tame va va vaprista anze siku leli vanhu va tiko lolelo va nga yisiwa awukaraweni.
31 Va nyimise xifaniso xa prata lexi Mikiya a nga xi yendla swaku va ta xi gandzela. Phela xi tshame kolanu masiku hinkwawu lawa tabernakela* ya Xikwembu xa ntiyiso a yi li Xilo.+
Tinhlamunselu ta le hansi
^ Leswi vulaka “Ndhawu Leyi Va Ka Dani Va Nga Gwimba Kona Matende”.
^ Vona Ntlhamuselo.
^ Kumbe: “swifaniso swa materafimi; swikwembu swa ndjangu; swifaniso swa mavunhwa.”
^ Kumbe: “swifaniso swa materafimi; swikwembu swa ndjangu; swifaniso swa mavunhwa.”
^ Vona Ntlhamuselo.
^ Vona Ntlhamuselo.
^ Kumbe: “swifaniso swa materafimi; swikwembu swa ndjangu; swifaniso swa mavunhwa.”
^ Kumbe: “mutsundzuxi”.
^ Vona Ntlhamuselo.
^ Kumbe: “swifaniso swa materafimi; swikwembu swa ndjangu; swifaniso swa mavunhwa”.
^ Hi Xiheberu: “yindlo”.
