Vayavanyisi 19:1-30
-
Nandzu wa va ka Benjamini wa ku pfinya wansati aJibiya (1-30)
19 Ka masiku wolawo, nkama a ku nga na hosi aIsrayele,+ Mulevhi lweyi a a tshama ka ndhawu ya le kule ya tintshava ya Efrayimi+ a teke nsati wa yena wamutsongo* wa le Betlehema+ aYuda.
2 Kambe wansati lweyi a mbuyetile a gama a mu tshika a ya kaya ka papayi wa yena aBetlehema aYuda a fika a tshama 4 wa tiwheti.
3 Se nuna wa yena a mu landza swaku a ya mu baba a vuya; a fambe ni mutirhi wa yena wa xinuna ni timbongolo timbirhi. Nkama a nga fika, nsati wa yena a mu nghenise ndlwini ka papayi wa yena. Papayi wa yena a vhela a tsaka loko a mu vona.
4 Kutani papayi wa nsati wa yena a mu kombela leswaku a tshama na yena masiku manharhu; a va dla va phuza va tlhela va yetlela kolanu.
5 Hi siku la wu 4 va pfuke nimpundzu swinene swaku va tilulamisela kuva va famba, kambe papayi wa nsati wa yena a mu byela a ku: “Sungula hi ku dla swaku u ta kuma matimba, hi kona u nga ta gama u famba.”
6 Se va tshama va dla va tlhela va phuza; loko va gamile, papayi wa wansati lweyi a byela mukon’wani wa yena a ku: “Ni kombela u tlhela u yetlela kola wusiku la namuntlha, u tikhorisa.”
7 A nkama wanuna lweyi a nga pfuka swaku a tilulamisela ku famba, papayi wa nsati wa yena a mu baba swaku a nga fambi, kutani a tlhela a yetlela kolanu siku lolelo.
8 Hi siku la wu 5 a pfuke nimpundzu swinene swaku a tilulamisela ku famba, kambe papayi wa nsati wa yena a te: “Ni kombela u sungula hi ku dla swaku u ta kuma matimba.” Se va dla na va hungata anze nimadlambu.
9 A nkama Mulevhi a a lava ku famba ni nsati wa yena ni mutirhi wa yena, papayi wa nsati wa yena a ku: “Dlambu se li lava ku pela. Ni kombela mi tlhela mi yetlela swaku mi tikhorisa. Mi ta famba mundzuku nimpundzu.”
10 Kambe, wanuna lweyi a nga pfumelanga ku tlhela a yetlela, a yo vhela a ku vhuthu a khoma ndlela a famba a ya ka doropa la Yebusi, ku nga Yerusalema.+ A fambe ni nsati wa yena, mutirhi wa yena ni timbongolo ta yena ta timbirhi.
11 Dlambu se a li ya ku peleni nkama a va li kusuhi ni ku fika Yebusi, se mutirhi wa wanuna lwiyani wa Mulevhi a ku: “A hi nge nyimi ka doropa la Vayebusi hi yetlela kona?”
12 Kambe Mulevhi a mu hlamula a ku: “A hi nge nyimi ka doropa la vanhu va ku a hi Vayisrayele. A hi fambeni hi ta ya hi ya nyima Jibiya.”+
13 Se a byela mutirhi a ku: “A hi fambe; hi ta ya hi ya yetlela aJibiya kumbe aRama.”+
14 Va gama va famba. A nkama a va li kusuhi ni ku fika ka doropa la Jibiya lani a ku tshama va ka Benjamini, dlambu se a lo pela.
15 Kutani va nghena ka doropa la Jibiya swaku va yetlela kona. Va fika va tshama ka ndhawu ya ku pfuleka leyi vanhu va tolovelaka ku tshama ka yona axikarhi ka doropa, kambe a ku na munhu lweyi a nga va yamukela swaku va yetlela kaya ka yena.+
16 Se nkama na li sungula ku pela, ku fika wanuna wa ku guga lweyi a a ta hi masin’wini. A a li wa ndhawu ya tintshava ya Efrayimi+ naswona a a tshama Jibiya; kambe lava a va tshama ka doropa leli, a va li va ka Benjamini.+
17 A nkama a nga vona wanuna lweyi na a li ka ndhawu ya ku pfuleka leyi vanhu va tolovelaka ku tshama ka yona axikarhi ka doropa, wanuna lweyi wa ku guga a mu vutisa a ku: “U ta hi kwini naswona u ya kwini?”
18 A mu hlamula a ku: “Hi ta hi Betlehema aYuda, hi ya ka ndhawu ya le kule ya tintshava ya Efrayimi, lani ni nga psaliwa kona. A ni ye Betlehema aYuda+ kambe swoswi ni ya ka yindlo ya Yehovha* kambe a ku na munhu lweyi a ni yamukelaka kaya ka yena.
19 Hi ni byanyi la linyingi swaku timbongolo ta hina+ ti dla, se mina ni nsati wa mina ni mutirhi wa mina hi ni pawu+ ni vhinyu. Swakudla hi na swona kambe ho pfumala ndhawu ya ku yetlela.”
20 Se wanuna lwiyani wa ku guga a ku: “Rhula mbilu u nga karhateki! Ni ta ku nyika leswi u swi pfumalaka. Kambe u nga yetleli lani.”
21 Kutani a famba na yena kaya ka yena, a fika a nyika timbongolo ta yena swakudla. Va gama va hlamba minenge, va dla va tlhela va phuza.
22 A nkama a va li ku dleni, ku fika vavanuna van’wanyani va doropa leli, va timbilu ta ku biha va fika va nyima matlhelweni ka yindlo va bukutela xipfalu, va byela wanuna lweyi wa ku guga wa n’winyi wa munti va ku: “Humesa wanuna lweyi a nga nghena ka yindlo ya wena swaku hi ta famba masangu na yena.”+
23 Se n’winyi wa munti a huma a fika a ku: “Ihim, vamakwerhu, ni kombela mi nga swi yendli swilo leswi swa ku biha ka wanuna lweyi a nga ni yendzela. Mi nga yi yendli nsila leyo.
24 Hi lweyi n’wana wa mina wa ntombhi wa ku kala a nga se tshama a famba masangu. Ni nsati wa wanuna lweyi, hi lweyi. Ni ta mi nyika vona swaku mi yendla leswi mi swi lavaka hi vona.+ Kambe mi nga yi yendli nsila leyi ka wanuna lweyi.”
25 Kambe vavanuna lava a va mu yingisanga. Se wanuna lwiyani wa Mulevhi a teka nsati wa yena a va nyika yena.+ Va mu pfinya wusiku hinkwalu anze li xa, va gama va mu tshika a famba loko li ya ku xeni.
26 Nimpundzu hintamu, wansati lweyi a fika a wa ka xipfalu xa yindlo ya wanuna lwiyani wa ku guga lani nuna wa yena a a li kona, a yetlele kolanu anze li xa.
27 Nkama nuna wa yena a nga pfuka nimixo, a pfula swipfalu swa yindlo swaku a ta ya phambheni ni liyendzo la yena, a vona nsati wa yena na a yetlele ka nyanghwa wa yindlo. Mavoko ya yena na ma li nyanghweni.
28 Se a mu byela a ku: “Pfuka hi famba.” Kambe a nga mu hlamulanga nchumu. Se wanuna lweyi a mu teka a mu tlhateka henhla ka mbongolo a muka.
29 A nkama a nga fika kaya ka yena, a teke xikhwa* a tsemelela nsati wa yena ku huma 12 wa mapedasu, a gama a rhumela pedasu lin’we lin’we ka tinxaka hinkwatu ta Israyele.
30 Hinkwavu lava nga swi vona va ku: “A ku se tshama ku yendleka swa ku fana ni leswi, naswona a hi se tshama hi swi vona swa ku fana na swona ku sukela ka siku leli Vayisrayele va nga huma aGibita ku ta fikela namuntlha. Pimisani kahle hi mhaka leyi, mi bula hi yona+ swaku hi tiva swaku hi ta yendla yini.”
Tinhlamunselu ta le hansi
^ Vona Ntlhamuselo.
^ Kumbexana: “ni tirha ka yindlo ya Yehovha”.
^ Ku nga xikhwa lexi a xi tirhiseliwa ku dlaya swiharhi.
