Vayavanyisi 20:1-48
-
Ku lwa ni lixaka la ka Benjamini (1-48)
20 Se vavanuna hinkwavu va tiko la Israyele ku sukela Dani+ anze Berxeba ni va tiko la Jiliyadi,+ va hlengeletana phambheni ka Yehovha aMizpa.+
2 Varhangeli va vanhu ni tinxaka hinkwatu ta Israyele va nyima phambheni ka nhlengeletanu ya vanhu va Xikwembu, a ku ni 400.000 wa masonchwa ya ku famba hi minenge lawa a ma tamele swipada.+
3 Kutani va ka Benjamini va twa leswaku vavanuna va tiko la Israyele va ye Mizpa.
Se vavanuna va tiko la Israyele va vutisa wanuna wa Mulevhi va ku: “Hi nga hi byela, swi yendlekise ku yini swilo leswi swa ku biha?”+
4 Se wanuna wa Mulevhi,+ lweyi a nga dlayeliwa nsati a va hlamula a ku: “Ni fike ka doropa la Jibiya+ lomu ku tshamaka va ka Benjamini, swaku mina ni nsati wa mina wamutsongo* hi ya yetlela kona.
5 Se vanhu* va Jibiya va ni hlasela, va fika va nyima matlhelweni ka yindlo leyi a ni li ka yona niwusiku. A va lava ku ni dlaya kambe va pfinye nsati wa mina a gama a fa.+
6 Se ni teka ntsumbu wa nsati wa mina ni wu tsemelela, ni gama ni rhumela mapedasu ya wona ka tiko hinkwalu leli nga tshomba la Vayisrayele,+ hikusa leswi va nga swi yendla swi danisa hintamu aIsrayele.
7 Se n’wina Vayisrayele mi yi vonisa ku yini mhaka leyi?”+
8 Se vanhu hinkwavu va twanana va ku: “A hi nge muki ka matende ya hina kumbe kaya ka hina.
9 Swoswi a hi yendleni leswi ka doropa la Jibiya: A hi hoxeni swiribyani* hi langa vavanuna lava nga ta lwa na lona.+
10 Hi ta tlhela hi yendla leswi ka tinxaka hinkwatu ta Israyele: Ka 100 wa vavanuna hi ta teka 10, ka 1.000 hi ta teka 100, ka 10.000 hi ta teka 1.000. Vavanuna lava va ta hlengeleta swakudla swa masonchwa lawa ma nga ta lwa ni doropa la Jibiya leli ku tshamaka va ka Benjamini, hi mhaka ya minchumu ya ku danisa leyi va nga yi yendla aIsrayele.”
11 Se vavanuna hinkwavu va tiko la Israyele va tlhangana swaku va ya lwa ni doropa lolelo.
12 Tinxaka ta Israyele ti rhuma vavanuna swaku va ya ka vavanuna hinkwavu va lixaka la Benjamini, va fika va ku: “Hi mhaka muni ku yendleke swilo swa ku biha xikarhi ka n’wina?
13 Swoswi humesani vavanuna lava nga yendla swilo leswi swa ku biha aJibiya+ swaku hi ta va dlaya, leswaku ku helisiwa swilo swa ku biha aIsrayele.”+ Kambe vanhu va ka Benjamini va yalile ku yendla leswi tinxaka letin’wani ta Israyele ti nga va byela swona.
14 Se va ka Benjamini va huma ka madoropa ya vona, va tlhangana va ya Jibiya swaku va ya lwa ni vavanuna va Israyele.
15 Hi siku lolelo va ka Benjamini va hlengeleta 26.000 wa vavanuna va madoropa ya vona lava a va ni swipada ni 700 wa vavanuna va Jibiya.
16 Axikarhi ka masonchwa lawa a ku ni 700 wa vavanuna lava a va tirhisa voko la ximatsi. Vavanuna lava a va kota ku txopa maribye hi xibalakatsa naswona hambi nsisi a va nga wu phukwi.
17 Vavanuna va tiko la Israyele va hlengelete 400.000 wa vavanuna lava nga ni swipada,+ lava va swi tivaka kahle ku lwa nyimpi. Ka vavanuna lava, a ku nga patsiwi va lixaka la ka Benjamini.
18 Vayisrayele va gama va ya Betele va ya vutisa Xikwembu+ va ku: “I vamani va nga ta hi rhangela nkama hi nga ta ya hi ya lwa ni va ka Benjamini?” Yehovha a ku: “Mi ta rhangeliwa hi va ka Yuda.”
19 Kutani hi mundzuku ka kona Vayisrayele va pfuka nimixo va ya gwimba matende ya vona akusuhi ni doropa la Jibiya swaku va ta li hlasela.
20 Vavanuna va Israyele va huma swaku va ya lwa ni va ka Benjamini, se va tilulamisela ku lwa nyimpi na vona aJibiya.
21 Kutani vanhu va ka Benjamini va huma Jibiya va ya lwa ni Vayisrayele. Hi siku lolelo va dlaye 22.000 wa vavanuna va Israyele,
22 kambe masonchwa ya Vayisrayele a ma nga chavi. Se ma tlhela ma tilulamisela ku ya lwa ka ndhawu leyi va nga lwa ka yona ka siku la ku sungula.
23 Kutani Vayisrayele va ya Betele va fika va rila phambheni ka Yehovha anze nimadlambu, va gama va vutisa Yehovha va ku: “Hi fanele hi tlhela hi ya lwa ni vamakwerhu va ka Benjamini?”+ Yehovha a va hlamula a ku: “Fambani mi ya lwa na vona.”
24 Se hi siku la wumbirhi Vayisrayele va tlhela va ya lwa ni va ka Benjamini.
25 Va ka Benjamini na vona va huma aJibiya swaku va ya tlhangana na vona hi siku la wumbirhi, va tlhela va dlaya 18.000 wa Vayisrayele+ lava a va ni swipada.
26 Se vavanuna hinkwavu va Israyele va ya Betele. Va fike va rila va tlhela va tshama phambheni ka Yehovha+ naswona hi siku lelo a va dlanga nchumu+ anze nimadlambu, va tlhela va nyikela magandzelo ya ku hisiwa+ ni magandzelo ya ku kombela ku rhula+ phambheni ka Yehovha.
27 Vavanuna va Israyele va gama va vutisa Yehovha+ swaku va ta yendla yini, hikusa areka ya ntwananu ya Xikwembu xa ntiyiso a yi li kolanu ka masiku wolawo.
28 Feniyasi+ lweyi a a li n’wana wa Eliyazari a tlhela a va ntukulu wa Aroni hi yena a a tirha ka areka ka masiku wolawo. Vavanuna va Israyele va vutisa va ku: “Hi fanele hi tlhela hi ya lwa ni vamakwerhu va ka Benjamini kumbe hi nga yi ke?”+ Yehovha a va hlamula a ku: “Fambani mi ya lwa na vona hikusa mundzuku ni ta va nyikela ka mavoko ya n’wina.”
29 Kutani Vayisrayele va veka vavanuna swaku va tumbela+ ka matlhelo hinkwawu ya Jibiya.
30 Hi siku la wunharhu Vayisrayele va famba va ya lwa ni va ka Benjamini, va tilulamisela ku lwa ni doropa la Jibiya, ku fana ni leswi va nga swi yendlisa xiswona ka masiku laman’wani.+
31 A nkama va ka Benjamini va nga huma va ya tlhangana na vona, va va yisa kule ni doropa+ ku fana ni masiku laman’wani, va sungula ku hlasela ni ku dlaya vavanuna va Israyele ka tindlela tatikulu. Ka tindlela leti, yin’we a yi ya Betele kasi leyin’wanyani a yi ya Jibiya. Va dlaye kolomu ka 30 wa vavanuna va Israyele.+
32 Se va ka Benjamini va ku: “Ha va hlula ku fana ni le ku sunguleni.”+ Kambe Vayisrayele va ku: “Hi ta yendla ingaku ho baleka swaku hi va yisa kule ni doropa va ta ka tindlela tatikulu.”
33 Kutani vavanuna hinkwavu va Vayisrayele va huma ka tindhawu leti a va li ka tona va tilulamisela ku lwa aBali-Tamari, ni vavanuna lavan’wani va Vayisrayele lava a va tumbelile va huma lomu a va li kona akusuhi ni Jibiya.
34 10.000 wa vavanuna va tiko la Israyele va ya Jibiya naswona nyimpi a yi hisa. Kambe va ka Benjamini a va nga swi tivi swaku a va li kusuhi ni ku kumana ni khombo.
35 Se Yehovha a hlula va ka Benjamini+ phambheni ka Vayisrayele naswona hi siku lolelo Vayisrayele va dlaye 25.100 wa vavanuna va ka Benjamini, lava a va ni swipada.+
36 Va ka Benjamini a va pimisa swaku vavanuna va Israyele va ta hluliwa hileswi a va baleka,+ kambe a va yendla ingaku vo baleka hikusa a va tshemba vavanuna lava a va tumbelile akusuhi ni Jibiya.+
37 Se Vavanuna va tiko la Israyele lava a va tumbelile va nghena hi ku hantlisa ka doropa la Jibiya, va hangalaka ni doropa hinkwalu va dlaya vanhu hinkwavu hi xipada.
38 Vavanuna va tiko la Israyele a va twanane ni vavanuna lava a va tumbelile swaku va ta vona hi ximusi loko se va hise doropa.
39 A nkama Vayisrayele a va li ku balekeni, vavanuna va ka Benjamini va dumele kolomuyani ka 30 wa vavanuna va tiko la Israyele+ va tlhela va va dlaya, va gama va ku: “Swa tikomba swaku ha va hlula ku fana ni nkama lowuyani.”+
40 Se ku sungula ku tuvika ximusi xaxikulu ka doropa hi ku ya hi leswi a va twanane swona. A nkama vavanuna va ka Benjamini va nga ndzuluka, va vona swaku doropa hinkwalu lo psha.
41 Se vavanuna va Israyele va ndzuluka va sungula ku va hlasela. Vavanuna va Benjamini va sungula ku chava hikusa a va swi vona swaku khombo se a li va fikelile.
42 Vavanuna va ka Benjamini va baleka Vayisrayele va ya mananga, Vayisrayele va gama va va txatxa; ni vavanuna va madoropa ya kusuhi va huma va va pfuna ku va dlaya.
43 Va rhendzela va ka Benjamini, va tlhela va tama va va hlongolisa. Va va hlula phambheni ka doropa la Jibiya ka tlhelo la le wuxeni.
44 Hi wugamu ku dlayiwa 18.000 wa tinhenha ta lixaka la ka Benjamini.+
45 Vavanuna va ka Benjamini va baleka va ya mananga ka ribye la Rimoni,+ se Vayisrayele va dlaya 5.000 wa vavanuna ka tindlela tatikulu, va tama va va hlongolisa anze Jidomi; va tlhela va dlaya 2.000 wa vavanuna van’wani.
46 Hinkwavu lava nga dlayiwa hi siku lolelo ka va ka Benjamini a ku li 25.000 wa tinhenha leti a ti ni swipada.+
47 Kambe 600 wa vavanuna va baleka va ya mananga ka ribye la Rimoni, va tshama kolanu 4 wa tiwheti.
48 Se vavanuna va Israyele va tlhela va hlasela va ka Benjamini hi xipada ni minchumu ya vona hinkwayu leyi nga sala. Va dlaye vanhu ni swifuyu swa kona va tlhela va hisa madoropa hinkwawu lawa a va hundza hi ka wona.
