Vayavanyisi 3:1-31
3 Yehovha a tshike matiko man’wani ma sala swaku a ma tirhisela ku ringa Vayisrayele lava a va nga se tshama va lwa nyimpi ni Vakanana.+
2 (A yendle leswo swaku vatukulu va Vayisrayele lava a va ta psaliwa, lava a va nga se tshama va lwa nyimpi, va ta tiva nyimpi.)
3 Matiko ya kona a ma patsa 5 wa tihosi ta Vafilista,+ Vakanana hinkwavu, Vasidoni+ ni Vahivhi+ lava a va tshama ka Ntshava ya Lebanoni+ ku sukela ka Ntshava ya Bali-Hermoni anze Lebo-Amati.*+
4 Matiko lawa a ma ringa Vayisrayele swaku ku ta voniwa swaku va yi yingisa minawu leyi Yehovha a nga yi nyika vapapayi va vona hi ku tirhisa Moxe, kumbe a va yi yingisi.+
5 Vayisrayele a va tshama ni Vakanana,+ Vaheti, Vaamori, Vaperezi, Vahivhi ni Vayebusi.
6 Naswona Vayisrayele a va chada ni vana va tintombhi va matiko lawa, va tlhela va pfumelela vana va vona va tintombhi swaku va chadiwa hi madjaha ya matiko lawayani. Leswo swi yendle swaku va sungula ku tirhela swikwembu swa Vakanana.+
7 Kutani Vayisrayele va sungula ku yendlela Yehovha swilo swa ku biha, va khohlwa Yehovha Xikwembu xa vona va ya gandzela timhandzi ta Axera*+ ni swikwembu leswi vitaniwaka Vabali.+
8 Se Yehovha a va kwatela swinene Vayisrayele, a gama a va nyikela ka Kuxani-Risatahimi hosi ya le Mezopotamiya.* Vayisrayele va tirhele Kuxani-Risatahimi ku ringana 8 wa malembe.
9 Nkama Vayisrayele va nga kombela Yehovha swaku a va pfuna,+ Yehovha a rhumele Otiniyele+ n’wana wa Kenazi, makwavu wamutsongo wa Kalebe, swaku a ya va ponisa.+
10 Moya wa ku kwetsima wa Yehovha wu va na Otiniyele,+ se a va muyavanyisi wa Vayisrayele. A nkama a nga ya nyimpini, Yehovha a mu pfunile swaku a hlula Kuxani-Risatahimi hosi ya le Mezopotamiya.
11 Ku game ku va ni ku rhula ka tiko hinkwalu 40 wa malembe. Se Otiniyele n’wana wa Kenazi a gama a fa.
12 Vayisrayele va tlhela va sungula ku yendlela Yehovha swilo swa ku biha.+ Se Yehovha a yendla swaku Egiloni hosi ya Mowabu+ a va hlula, hikusa a va yendlele Yehovha swilo swa ku biha.
13 Egiloni a vitana Vaamoni+ ni Vaamaleki+ leswaku va mu pfuna ku ya lwa ni Vayisrayele. Va dumele Vayisrayele va gama va teka doropa leli nga ni minsinya ya mintxindzu.*+
14 Vayisrayele va tirhela Egiloni hosi ya Mowabu 18 wa malembe.+
15 Se Vayisrayele va kombela Yehovha swaku a va pfuna,+ Yehovha a va nyika Ehudi+ n’wana wa Gera, wa lixaka la Benjamini,+ lweyi a a tirhisa voko la ximatsi+ swaku a va ponisa.+ Vayisrayele va game va rhuma Ehudi swaku a ya hakela rhesa* ka Egiloni hosi ya Mowabu.
16 Ehudi a a tiyendlele xipada lexi tsemaka hi ka matlhelo hinkwawu. Xipada lexi a xi lehe kolomuyani ka 38 wa masentimetru, a a xi veke ka masenge hi ka tlhelo la xinene a gama a xi mbhonya hi mpahla.
17 A fike a nyika Egiloni hosi ya Mowabu a rhesa. Egiloni a a kuluke hintamu.
18 Nkama Ehudi a nga gama ku hakela a rhesa, a game a tifambela ni lava a va rhwale leswi a nga hakela hi swona rhesa.
19 Kambe nkama va nga fika ka ndhawu leyi a yi ni swifaniso aJiligali,+ a tlhele ka hosi a fika a ku: “Wena hosi ni ni xihundla ni lavaka ku ku byela xona.” Se hosi yi byela vatirhi va yona hinkwavu yi ku: “Humani handle!” Se va huma.
20 Ehudi a tshinelela hosi na yi ti tshamelile ka kwartu la yona la le henhla la ku pepa, a fika a ku: “Ni ni mhaka leyi taka hi ka Xikwembu ni lavaka ku ku byela yona.” Loko hosi yi twa leswo, yi sekeleka ka xitshamu xa yona.
21 Se Ehudi a yo vhela a tlomula xipada ka masenge* hi voko la yena la ximatsi, a tlhava hosi ka khwirhi.
22 Xipada hinkwaxu xi nghena ni xikhomo xa kona, se xi tala hi mafurha hikusa a nga xi tlomulanga ka khwirhi la hosi. Se ku huma chaka.
23 Ehudi a game a pfala swipfalu a swi khiya, a gama a huma hi ka vharanda a famba.
24 Loko a fambile, vatirhi va hosi va yile ka kwartu la yona va fika va kuma swaku swipfalu swi khiyiwile. Va gama va ku: “A hosi devhi yo tirhuma.”
25 Phela va nyimile hintamu va za va karhala. Kambe loko va vona swaku a hosi a yi pfuli swipfalu va teka makhiya va pfula, nkama va nga nghena, va kuma swaku a hosi a yi wile hansi na yi file!
26 A nkama vatirhi va hosi a va ha djikadjika, Ehudi a balekile. A hundza hi ka ndhawu leyi a yi ni swifaniso swa ku vatliwa*+ a ya Seyira.
27 Nkama a nga fika ka ndhawu ya tintshava ya Efrayimi+ a sungule ku chaya limhondzo.+ Se Vayisrayele va ngirimela va famba na yena, yena a va rhangela.
28 A va byela a ku: “A hi fambeni, hikusa Yehovha a nyikele Vamowabu, valala va n’wina ka mavoko ya n’wina.” Va gama va mu landza, va fika va teka tindhawu leti vanhu va tolovelaka ku tlulela hi ka tona Yordani, swaku Vamowabu ni vanhu van’wani va nga tsemakanyi.
29 Se va dlaya kolomuyani ka 10.000 wa vavanuna va Vamowabu+ lava a va ni ntamu naswona a va nga chavi nchumu, ni mun’we ka vona a nga balekanga.+
30 Vayisrayele va hlule Vamowabu hi siku lolelo; ku game ku va ni ku rhula ka tiko hinkwalu 80 wa malembe.+
31 Ehudi a game a pfaletiwa hi Xamugari+ n’wana wa Anati. Xamugari a dlaye 600 wa vavanuna va Vafilista,+ hi nhonga* ya ku khayima hi yona tihomu;+ naswona a tlhele a ponisa Vayisrayele.
Tinhlamunselu ta le hansi
^ Kumbe: “ka nyanghwa wa Amati.”
^ Vona Ntlhamuselo.
^ Hi Xiheberu: “Aramu-Naharayimi.”
^ Kumbe: “mapalmera.”
^ Kumbe: “impoxtu; tinemba”.
^ Ka tlhelo la xinene.
^ Kumbexana: “ka ndhawu leyi a ku txeliwa maribye”.
^ A ku li nhonga leyi a yi ni nsimbi ya ku lotiwa.
