Vayavanyisi 6:1-40
6 Vayisrayele va tlhela va sungula ku yendlela Yehovha+ swilo swa ku biha, se Yehovha a va nyikela ka mavoko ya Vamidiyani 7 wa malembe.+
2 Vamidiyani va sungula ku va hlupha hintamu Vayisrayele.+ Se hi mhaka ya ku chava Vamidiyani, Vayisrayele va yendle tindhawu ta ku ya tumbela ka tona ka tintshava, ka mimhakwa* ni ka tindhawu leti swi karhataka ku fika ka tona.+
3 Loko Vayisrayele va byala, Vamidiyani ni Vaamaleki+ ni vanhu lava taka hi ka tlhelo la le wuxeni+ a va ta, va ta va hlasela.
4 A va fika va gwimba matende va wonhetela hinkwaswu leswi va nga swi byala anze Gaza, naswona a va nga va siyeli nchumu xa ku va dla hambi nyempfu, hambi homu kumbe mbongolo.+
5 Hikusa a va ta ni swifuyu swa vona ni matende ya vona, na va li vanyingi ingaku vo va mintete+ naswona vona ni makamela ya vona a va li vanyingi hintamu,+ a va tela ku ta wonhetela tiko va li hahlulela.
6 Se Vayisrayele va va swisiwana hintamu hi mhaka ya Vamidiyani, va za va kombela Yehovha swaku a va pfuna.+
7 Nkama Vayisrayele va nga kombela swaku Yehovha a va pfuna hi mhaka ya Vamidiyani,+
8 Yehovha a rhume muprofeta ka Vayisrayele, lweyi a nga fika a va byela a ku: “Yehovha Xikwembu xa Israyele a li: ‘Ni mi humese Gibita lomu a mi li swikarawa.+
9 Ni mi ponisile ka mavoko ya Vagibita ni ka vanhu hinkwavu lava a va mi hlupha, naswona ni va hlongolile phambheni ka n’wina, ni tlhela ni mi nyika tiko la vona.+
10 Ni te: “Hi mina Yehovha Xikwembu xa n’wina.+ Mi nga swi gandzeli* swikwembu swa Vaamori lava mi tshamaka ka tiko la vona.”+ Kambe a mi ni yingisanga.’”*+
11 Se ntsumi ya Yehovha yi fika+ yi tshama hansi ka nsinya wawukulu lowu a wu li Ofira. Nsinya lowu a wu li wa Yowaxi wa Muabiyezeri.+ N’wana wa yena Gidiyoni+ a a ye ku huleni ka trigu ka ndhawu ya ku kamela ka yona vhinyu swaku Vamidiyani va nga swi voni.
12 Ntsumi ya Yehovha yi humelela ka yena yi ku: “Yehovha a na wena,+ wena sonchwa la matimba.”
13 Se Gidiyoni a ku: “Ni rivaleli hosi ya mina, loko Yehovha a li na hina, hi mhaka muni hi humeleliwa hi makhombo lawa?+ Yi kwini mintirho ya yena ya ku hlamalisa leyi vapapayi va hina va nga hi byela hi yona,+ va ku: ‘Yehovha a hi humese Gibita?’+ Phela swoswi Yehovha a hi tshikile+ naswona a hi nyikele ka Vamidiyani.”
14 Yehovha a mu hlamula a ku: “Famba, u ta ponisa Vayisrayele ka Vamidiyani hi matimba lawa u nga na wona.+ Kasi a hi mina ni ku rhumaka ke?”
15 Se Gidiyoni a ku: “Ni rivaleli Yehovha. Ni ta swi kotisa ku yini ku ponisa Vayisrayele? Phela ndjangu wa mina hi lowu wawutsongo wa kona ka lixaka la Manasi, naswona ka papayi wa mina hi mina wamutsongo wa kona.”
16 Se Yehovha a mu hlamula a ku: “U ta dlaya Vamidiyani ingaku wo dlaya munhu mun’we, hikusa ni ta va na wena.”+
17 Se Gidiyoni a ku: “Loko u ni tsakela ni kombe swaku hi wena u vulavulaka na mina.
18 Ni kombela swaku u nga suki lani anze ni vuya ni swakudla leswi ni nga ta swi lulamisela swaku ni ta ku nyika.”+ Se yena a byela Gidiyoni a ku: “Famba, u ta ni kuma kola loko u vuya.”
19 Gidiyoni a famba a ya sweka ximbutani a tlhela a teka 11 wa makilu* ya mpupu+ a hamba pawu la ku kala li nga na fermentu. A teka nyama a yi chela ka ndzhava, a murhu a wu chela ka panela; a gama a famba na swona a ya mu phamela hansi ka nsinya wawukulu.
20 Se ntsumi ya Xikwembu xa ntiyiso yi mu byela yi ku: “Teka nyama leyo ni pawu la ku kala li nga na fermentu u swi veka kolanu ka ribye lalikulu, u gama u swi chela murhu.” A vhela a yendla swoleswo.
21 A ntsumi ya Yehovha yi khumba nyama ni pawu la ku kala li nga na fermentu hi nhonga leyi a yi li ka voko la yona. Se ku huma ndzilu hi ka ribye wu hisa nyama ni pawu la ku kala li nga na fermentu.+ Ntsumi ya Yehovha yi gama yi nyamalala.
22 Se Gidiyoni a swi tsumbula swaku a ku li ntsumi ya Yehovha.+
A gama a ku: “Yehovha Hosi Leyikulu, ni file minoo; hikusa ni vone ntsumi ya wena,+ wena Yehovha!”
23 Se Yehovha a mu hlamula a ku: “Rhula mbilu. U nga chavi;+ a wu nga ta fa.”
24 Gidiyoni a vhela a yakela Yehovha altari kolanu, naswona altari leyi ni swoswi ya ha vitaniwa Yehovha-Xalomi.*+ Ya ha kumeka Ofira ka ndhawu ya Vaabiyezeri.
25 Hi wusiku lolelo Yehovha a mu byela a ku: “Teka xihon’wani xa papayi wa wena, xihon’wani xa wumbirhi lexi nga ni 7 wa malembe, u tlhela u dilizela altari leyi papayi wa wena a nga yi yakela Bali, u tsema ni mhandzi ya Axera* leyi nga kusuhi na yona.+
26 Se loko u gamile ku yakela Yehovha Xikwembu xa wena altari ka ndhawu ya ku vhikeliwa hi maribye, teka xihon’wani xa wumbirhi u xi hisa hi tihunyi ta mhandzi ya Axera leyi u nga yi tsema swaku xi va gandzelo la ku hisiwa.”
27 Se Gidiyoni a teka 10 wa vavanuna ka vatirhi va yena, a yendla leswi Yehovha a nga mu byela swona. A swi yendle niwusiku hikusa a a chava ku voniwa hi maxaka ya papayi wa yena ni vanhu lava va tshamaka ka doropa.
28 A nkama vanhu lava tshamaka ka doropa va nga pfuka nimpundzu swinene, va kume swaku a altari ya Bali yi dilizeliwile ni mhandzi ya Axera leyi a yi li tlhelweni ka yona yi tsemiwile ni leswaku xihon’wani xa wumbirhi xi hisiwile ka altari leyi a ya ha ku yakiwa.
29 Se va vutisana va ku: “I mani lweyi a nga yendla leswi?” Loko se va swi kambisisile, va te: “I Gidiyoni n’wana wa Yowaxi a nga yendla leswi.”
30 Se vanhu lava tshamaka ka doropa va byela Yowaxi va ku: “Humesa n’wana wa wena swaku hi ta mu dlaya, hikusa a dilizelele altari ya Bali a tlhela a tsema ni mhandzi ya Axera leyi a yi li tlhelweni ka yona.”
31 Yowaxi+ a va hlamula a ku: “Kasi mi lwela Bali hi mhaka muni? Hi mhaka muni mi mu vhikela? Lweyi a nyimelelaka Bali a fanele a dlayiwa mixo lowu.+ Loko Bali lweyi a li xikwembu, a a tilweli,+ leswi ku nga ni munhu lweyi a nga diliza altari ya yena.”
32 Ku sukela hi siku lolelo, a vitana Gidiyoni a ku i Yerubali,* a gama a ku: “Bali a a tilweli, leswi ku nga ni munhu lweyi a nga diliza altari ya yena.”
33 Vamidiyani hinkwavu,+ Vaamaleki+ ni vanhu lava taka hi ka tlhelo la le wuxeni va patsana va va ntlawa wun’we wa masonchwa,+ va gama va tsemakanya nambu va fika va gwimba matende ya vona ka Nkova wa Yezreyeli.
34 A moya wa ku kwetsima wa Yehovha wu va na Gidiyoni+ a chaya limhondzo,+ se Vaabiyezeri+ va mu landza.
35 Se a rhuma vanhu va ya ka lixaka hinkwalu la Manasi, na vona va vhela va mu landza. A tlhela a rhuma van’wani ka lixaka hinkwalu la Aseri, Zebuloni ni la Naftali na vona va famba va ya tlhangana na yena.
36 Gidiyoni a byela Xikwembu xa ntiyiso a ku: “Loko ku li swaku u ta tirhisa mina swaku u ponisa Vayisrayele, hi ku ya hi leswi u nga swi tshembisa,+
37 swoswi ni ta famba ni ya veka mavoya ya nyempfu ka ndhawu leyi hi phepheraka ka yona minchumu. Se loko mberha* yo tsakamisa mavoya ya nyempfu kambe misava leyi nga matlhelweni ka wona yi nga tsakami, ni ta swi tiva swaku u ta tirhisa mina swaku u ponisa Vayisrayele hi ku ya hi leswi u nga swi tshembisa.”
38 Swi yendlekise swoleswo. Loko a pfuka nimpundzu swinene hi mundzuku ka kona, a kuma swaku mavoya ya nyempfu ma tsakamile. Se a ma kama, a tata xibaziyani hi mati ya kona.
39 Gidiyoni a tlhela a byela Xikwembu xa ntiyiso a ku: “No kombela u nga ni kwateli, i xa wugamu lexi ni lavaka ku xi kombela. Ni kombela u ni kholwisa swaku hikakunene u ta ni pfuna. Ni kombela swaku a mberha yi tsakamisa a ndhawu hinkwayu leyi hi phepheraka ka yona minchumu, kambe mavoya ya nyempfu ma nga tsakami.”
40 Ka wusiku lolelo, Xikwembu xi yendla leswi a nga swi kombela. A mberha yi tsakamisa ndhawu leyi va phepheraka ka yona minchumu kambe mavoya ya nyempfu ma nga tsakami.
Tinhlamunselu ta le hansi
^ Ku nga mimbhovo leyi kumekaka ka tintshava kumbe ka maribye.
^ Hi Xiheberu: “chavi”.
^ Hi Xiheberu: “a mi yingisanga rito la mina.”
^ Hi Xiheberu: “efa lin’we”. Vona Xiyengetelo B14.
^ Leswi vulaka swaku “Yehovha I Ku Rhula.”
^ Vona Ntlhamuselo.
^ Leswi vulaka swaku “Bali A A Lweli Mhaka Ya Yena”.
^ Kumbe: “mub’etho”.
