Vayavanyisi 7:1-25
7 Yerubali ku nga Gidiyoni,+ ni vanhu hinkwavu lava a va li na yena, va pfuka nimpundzu swinene va ya gwimba matende ka Xihlovo xa Aroda, na kuve Vamidiyani a va gwimbe matende ya vona ka tlhelo la norte,* ka nkova lowu nga hansi ka ganga la More.
2 Se Yehovha a byela Gidiyoni a ku: “Masonchwa lawa u nga na wona i manyingi hintamu, a ni nge va nyikeli Vamidiyani ka mavoko ya wona,+ hikusa ma nga gama ma tibyela ma ku: ‘Hi va hlule hi ntamu wa hina.’+
3 Se ni kombela u ma byela u ku: ‘Lweyi a chavaka a tlhela a rhurhumela a a muki.’”+ Se Gidiyoni a ma kambela. Ku gama ku tlhela 22.000 wa masonchwa, ku sala 10.000 ntsena.
4 Yehovha a tlhela a byela Gidiyoni a ku: “Masonchwa lawa u nga na wona ma ha li manyingi hintamu. Famba na wona lani ku nga ni mati swaku ni ta ku pfuna ku ma kambela. Loko ni ku byela ni ku: ‘Lweyi a ta famba na wena,’ vhela a ta famba na wena, kambe loko ni ku byela ni ku: ‘Lweyi a nga ta famba na wena,’ a nga ta famba na wena.”
5 Se a famba na wona lani ku nga ni mati.
Yehovha a byela Gidiyoni a ku: “Hambanisa lava khaka mati hi mavoko, va ku loko va phuza va fana ni timbyana, ka lava phuzaka mati na va khizamile.”
6 Lava nga phuza mati hi mavoko ku ve 300 wa vona. Kasi lavan’wani hinkwavu va phuze mati na va khizamile.
7 Se Yehovha a byela Gidiyoni a ku: “Ni ta tirhisa 300 wa masonchwa lawa ma nga phuza mati hi mavoko swaku ni mi ponisa naswona ni ta nyikela Vamidiyani ka mavoko ya n’wina.+ Masonchwa laman’wani a ma muke.”
8 Se masonchwa lawa ya 300 ma teka swakudla ni timhondzo leti a ti li ni masonchwa laman’wani. Gidiyoni a gama a mukisa masonchwa laman’wani ya Israyele, a sala ni lawa ya 300 ntsena. Vamidiyani a va gwimbe matende ka nkova lowu nga hansi ka ganga.+
9 Ka wusiku lolelo Yehovha a byela Gidiyoni a ku: “Pfuka u ya hlasela Vamidiyani hikusa ni va nyikele ka mavoko ya wena.+
10 Kambe loko u chava ku ya va hlasela, famba ni mupfunisi wa wena Pura lani va nga gwimba kona matende ya vona.
11 Yingisa leswi va nga ta swi vula, leswo swi ta ku yendla swaku u nga chavi* ku va hlasela.” Se Gidiyoni ni mupfunisi wa yena Pura va famba va ya fika kusuhi ni matende ya valala.
12 Phela Vamidiyani ni Vaamaleki ni vanhu hinkwavu lava a va ta hi ka tlhelo la le wuxeni+ a va li vanyingi hintamu,+ a va talile ka nkova lowu nga hansi ka ganga ku fana ni mintete; naswona makamela ya vona a ma li manyingi ku fana ni misava ya lwandle.
13 Se Gidiyoni a fika a kuma wanuna mun’wani na a byela munghanu wa yena leswi a nga swi lorha, a ku: “A ku ni pawu* la redondu leli a li wumbulukela+ li ya lomu Vamidiyani a va gwimbe kona matende. Li fike li ba tende, se a tende li djima li wa hansi.”
14 Se munghanu wa yena a ku: “Lexo i xipada xa Gidiyoni+ n’wana wa Yowaxi, wanuna wa Muyisrayele. Xikwembu xi nyikele Vamidiyani ni vanhu lavan’wani hinkwavu ka mavoko ya yena.”+
15 A nkama Gidiyoni a nga twa wanuna lwiyani na a tlhamusela+ swaku leswi a nga swi lorha swi vula yini, a khizama a dzunisa Xikwembu. A gama a tlhelela ka matende ya Vayisrayele a fika a ku: “Pfukani hikusa Yehovha a nyikele Vamidiyani ka mavoko ya n’wina.”
16 Se a yava 300 wa masonchwa lawa ma va mintlawa yinharhu, a gama a ma nyika timhondzo+ ni makhuwani lawa ndzeni ka wona a ku ni tinhonga leti a ti pfurha ndzilu.
17 Se a ma byela a ku: “Ni txuvukeni mi gama mi yendla leswi ni nga ta swi yendla. A nkama ni nga ta fika kusuhi ni matende ya vona, mi ta yendla leswi ni nga ta swi yendla.
18 A nkama mina ni hinkwavu lava nga na mina hi nga ta chaya timhondzo, na n’wina mi fanele mi chaya timhondzo ta n’wina ka matlhelo hinkwawu ya matende ya vona mi gama mi huwelela mi ku: ‘A nyimpi i ya Yehovha na Gidiyoni!’”
19 Se Gidiyoni ni 100 wa vavanuna lava a va li na yena va famba niwusiku* va ya fika kusuhi ni matende ya Vamidiyani. Va fambe hi nkama lowu masonchwa ya Vamidiyani lawa a ma vonelela niwusiku a ma sungula ntirho wa wona. Va fika va chaya timhondzo+ va tlhela va fayetela makhuwani lawa a va ma khomile.+
20 Se masonchwa ya mintlawa hi yinharhu ma chaya timhondzo ma tlhela ma fayetela makhuwani. Ka mavoko ya ximatsi a ma khome tinhonga leti a ti pfurha ndzilu, kasi ka mavoko ya xinene a ma chaya timhondzo ma gama ma huwelela ma ku: “Xipada i xa Yehovha ni xa Gidiyoni!”
21 Masonchwa lawa ma nyima ka tindhawu ta wona ma rhendzela matende ya Vamidiyani. Se masonchwa hinkwawu ya Vamidiyani lawa a ma li ka matende, ma sungula ku baleka+ na ma ba nyandha.
22 A 300 wa masonchwa ma tama ma chaya timhondzo ta wona, se Yehovha a yendla swaku Vamidiyani va lwa hi xivona;+ va gama va baleka va ya Beti-Xita, va hundza va ya Zerera anze va fika lani ndhawu ya Abel-Mehola+ yi sungulelaka kona akusuhi ni Tabati.
23 Se ku vitaniwa masonchwa ya Vayisrayele lama taka hi ka lixaka la Naftali, Aseri na Manasi,+ ma gama ma sungula ku hlongolisa Vamidiyani.
24 Se Gidiyoni a rhumela masonchwa ka tindhawu hinkwatu ta tintshava leti ku tshamaka va lixaka la Efrayimi, a ku: “Fambani mi ya hlasela Vamidiyani, mi rhanga mi fika ka Nambu wa Yordani ni minambu leyi nga Beti-Bara swaku va nga tsemakanyi.” Se masonchwa hinkwawu ya Efrayimi ma hlengeletana, ma vhela ma ku vhuthu, ma ya nyima akusuhi ni minambu leyi nga Beti-Bara ni Nambu wa Yordani swaku masonchwa ya Vamidiyani ma nga tsemakanyi.
25 Se ma khoma varhangeli vambirhi va Vamidiyani, ku nga Orebi na Zebe. Orebi va vhele va mu dlaya ka ribye la Orebi,+ kasi Zebe va ye va ya mu dlaya ka ndhawu ya ku kamela ka yona vhinyu leyi nga gama yi vitaniwa Zebe. Va tama va txatxa Vamidiyani,+ va gama va tisa nhloko ya Orebi ni ya Zebe ka Gidiyoni aYordani.
Tinhlamunselu ta le hansi
^ Kumbe: “n’walungu”.
^ Hi Xiheberu: “mavoko ya wena ma ta tiya”.
^ Ku nga pawu la ku yendliwa hi maxalani kumbe sevhada.
^ Ku sukela kolomuyani ka 22:00 ku ya fika ka ma 02:00 wora.
