Karta La Yakobe 2:1-26
2 Vamakwerhu, leswi mi pfumelaka ka Hosi ya hina Yesu Kreste leyi dzunekaka, hi mhaka muni mi ni xikheto?+
2 Hikusa loko ka ntlhanganu wa n’wina ku nghena munhu lweyi a nga ni ma aneli ya woru ka tintiho ta yena ni mpahla ya ku durha, ku tlhela ku nghena ni xisiwana lexi nga yambala mpahla ya ku chaka,
3 indjhe mi tsakela lweyi a nga yambala mpahla ya ku durha se mi ku: “Wena tshama lani ka ndhawu yayinene,” kambe mi byela xisiwana mi ku: “Wena nyimisa swoleswo,” kumbe “Tshama lahayani ni vekaka kona minenge ya mina?”+
4 Loko mi yendla leswo, a mo yendla swintlawani xikarhi ka n’wina+ mi tlhela mi va vayavanyisi lava yendlaka swiboho swa ku biha ke?+
5 Vamakwerhu va ku rhandzeka, yingisani. Kasi Xikwembu a xi langanga lava nga swisiwana hi ku ya hi mavonelo ya vanhu, leswaku va ganya lipfumelweni+ ni leswaku va dla tshomba la Mfumu lowu xi nga wu tshembisa lava xi rhandzaka ke?+
6 Kambe n’wina mi delela swisiwana. Kasi a hi volavo va ku ganya va mi hluphaka+ va tlhela va mi kokakoka va mi yisa matribunali?
7 A hi volavo va ku ganya va rhuketelaka vito lalinene leli mi nga na lona ke?
8 Loko mi hanya hi nawu wa Hosi, hi ku ya hi tsalwa leli nge: “U fanele u rhandza vanhu van’wani ku fana ni leswi u tirhandzisaka xiswona,”+ mi yendla kahle swinene.
9 Kambe loko mi tama mi va ni xikheto,+ ma djoha naswona mi ni nandzu hi ku ya hi nawu.+
10 Hikusa lweyi a yingisaka Minawu hinkwayu kambe a nga yingisi wun’we ntsena, swi fana ni loko a nga yi yingisi hinkwayu.+
11 Hikusa lweyi a nge te: “U nga tshuki u mbuyeta,”+ a tlhele a ku: “U nga tshuki u dlaya.”+ Se loko u nga mbuyeti kambe u dlaya, u ta va na u nga wu yingisi nawu.
12 Tamani mi vulavula mi tlhela mi hanya hi ndlela leyi fanaka ni ya lava nga ta yavanyisiwa hi nawu wa vanhu lava nga chunseka.+
13 Hikusa lweyi a kalaka a nga na timpsalu a nge kombiwi timpsalu loko a yavanyisiwa.+ Ku kombisa timpsalu swi tlula ku yavanyisa.
14 Vamakwerhu, swi pfuna yini loko munhu a ku a ni lipfumelo kambe a nga na mintirho?+ Indjhe lipfumelo lolelo li nga mu ponisa ke?+
15 Loko makwerhu wa xinuna kumbe wa xisati a nga na swa ku yambala* naswona a pfumala swakudla swa ku yenela siku,
16 kutani mun’wani wa n’wina a mu byela a ku: “Famba hi ku rhula, u kufumela u tlhela u xurha,” kambe a nga mu nyiki leswi a swi pfumalaka, swi pfuna yini ke?+
17 Hi ku fana, na lona lipfumelo loko li nga na mintirho li file.+
18 Kambe mun’wani a nga ha ku: “Wena u ni lipfumelo, mina ni ni mintirho. Ni kombi lipfumelo la wena la ku kala li nga na mintirho, se mina ni ta ku komba lipfumelo la mina hi mintirho.”
19 Wa kholwa swaku ku ni Xikwembu xin’we, a hi swona ke? U yendla kahle. Kambe madimoni na wona ma kholwa ma tlhela ma rhurhumela.+
20 Xiphunta ndziwena, a wu swi tivi swaku lipfumelo la ku kala li nga na mintirho a li sizi nchumu ke?
21 Kasi papayi wa hina Abrahamu a nga vuliwanga swaku a lulamile hi mhaka ya mintirho ya yena, hileswi a nga nyikela n’wana wa yena Izaki ka altari swaku a yendla gandzelo ke?+
22 Wa swi vona swaku a kombise lipfumelo la yena hi mintirho naswona li hetisekile* hi mhaka ya mintirho;+
23 se ku hetiseke tsalwa leli nge: “Abrahamu a ve ni lipfumelo ka Yehovha,* se a vuliwe wa ku lulama hi mhaka ya swoleswo,”+ naswona a vitaniwe munghanu wa Yehovha.*+
24 Ma swi vona swaku munhu a nga ta vuliwa wa ku lulama hi mhaka ya lipfumelo ntsena, kambe hi mhaka ya mintirho.
25 Hi ku fana, kasi na yena Rahabi lweyi wa nghwavani a nga vuliwanga swaku a lulamile hi mhaka ya mintirho loko a va yamukele kahle vakambeli ni ku va balekisa?+
26 Phela ku fana ni leswi muzimbha lowu kalaka wu nga na wutomi* wu nga fa+ ni lipfumelo la ku kala li nga na mintirho li file.+
Tinhlamunselu ta le hansi
^ Hi Xigriki: “yambalanga”.
^ Kumbe: “helelile”.
^ Vona Xiyengetelo A5.
^ Vona Xiyengetelo A5.
^ Kumbe: “matimba lama nyikaka wutomi”.
