Karta La Yakobe 5:1-20
5 Yingisani n’wina va ku ganya, rilani mi ba huwa hi mhaka ya mahlomulu lama nga ta mi wela.+
2 A tshomba la n’wina li bolile naswona mpahla ya n’wina yi dliwe hi swivungwani.*+
3 Woru ni prata la n’wina swi kurhile naswona ku kurha ka swona ku ta kombisa swaku mi ni nandzu naswona ku ta mi dla. Leswi mi nga swi hlengeleta swi ta fana ni ndzilu ka masiku ya wugamu.+
4 Yingisani! Vatirhi lava nga tshovela masimu ya n’wina va le ku rileni hikusa a mi va holelanga, swirilo swa vona swi fike ni ka tindleve ta Yehovha* murhangeli wa tintsumi.+
5 A mi hanya mafurheni mi tiyendlela ku rhandza. Mi dle mi nona ku fana ni tihomu leti yaka ku dlayiweni.+
6 Mi yavanyisile munhu wa ku lulama mi tlhela mi mu dlaya. Xikwembu a xi nga ta lwisana na n’wina ke?
7 Se lehisani mbilu vamakwerhu, anze ku fika nkama wa ku vuya ka Hosi.+ Vonani! Murimi a tshama na a rindze mihandzu ya yena ya lisima, a yi lehisela mbilu anze ku na timpfula ta ku sungula ni ta wugamu.+
8 Na n’wina lehisani mbilu;+ tiyisani timbilu ta n’wina hikusa nkama wa ku vuya ka Hosi wu kusuhi.+
9 Vamakwerhu, mi nga ngurangurelani, leswaku mi nga yavanyisiwi.+ Vonani! Muyavanyisi a nyimile nyanghweni.
10 Vamakwerhu djondzani ku tiyisela mahlomulu+ ni ku lehisa mbilu+ ka vaprofeta lava nga vulavula hi vito la Yehovha.*+
11 Va katekile lava nga tiyisela.+ Mi twile hi ta ku tiyisela ka Yobo+ naswona mi yi vonile ndlela leyi Yehovha* a nga mu katekisa hi yona,+ leswi kombaka swaku Yehovha* a ni ntwelawusiwana wawukulu ni timpsalu.+
12 Naswona vamakwerhu, tshikani ku funga hi tilo kumbe hi misava kumbe hi nchumu xin’wani ni xin’wani. Kambe “Ina” wa n’wina a a ve ina, naswona “Ihim” wa n’wina a a ve ihim,+ leswaku mi nga yavanyisiwi.
13 Ku ni lweyi a hluphekaka xikarhi ka n’wina? A a tami a khongela.+ Ku ni lweyi a nga tsaka? A a yimbeleli tinsimu ta ku dzunisa.+
14 Ku ni lweyi a vabyaka xikarhi ka n’wina? A a vitani madoda+ ya bandla leswaku ma ta mu khongelela, ma mu tota mafurha+ hi vito la Yehovha.*
15 Kutani xikhongelo xa ku yendliwa hi lipfumelo xi ta daha lweyi a vabyaka* naswona Yehovha* a ta mu hanyisa. Loko a yo djoha, a ta rivaleliwa swidjoho swa yena.
16 Kutani byelanani swidjoho swa n’wina,+ mi khongelelana swaku mi ta hanyisiwa. Xikhongelo xa munhu wa ku lulama xi ni matimba.+
17 Eliya a a li munhu wa ku fana na hina, kambe loko a khongelile hi mbilu hinkwayu swaku mpfula yi nga ni, a yi nanga ku ringana malembe manharhu ni 6 wa tiwheti.+
18 A tlhele a khongela, kutani tilo li nisa mpfula, se misava yi humesa swakudla.+
19 Vamakwerhu, loko ko va ni makwenu xikarhi ka n’wina lweyi a humaka ntiyisweni, kutani mun’wanyani wa n’wina a mu vuyisa,
20 swi tiveni swaku lweyi a tlhelisaka mudjohi swaku a huma ka xidjoho xa yena,+ a ta mu ponisa ka lifu naswona a ta mbhonya swidjoho swa swinyingi.+
Tinhlamunselu ta le hansi
^ Kumbe: “switsotswani.”
^ Vona Xiyengetelo A5.
^ Vona Xiyengetelo A5.
^ Vona Xiyengetelo A5.
^ Vona Xiyengetelo A5.
^ Vona Xiyengetelo A5.
^ Kumbexana: “lweyi a nga hela ntamu”.
^ Vona Xiyengetelo A5.
