Yeremiya 19:1-15
19 Yehovha a te: “Famba u ya xava khuwani la vumba ka lweyi a tirhaka hi vumba.+ Teka madoda man’wani ya tiko ni madoda man’wani ya vaprista u famba na wona,
2 u ya ka Nkova wa N’wana wa Hinomi,+ ka ndhawu ya ku nghena hi yona ka Nyanghwa wa Swirhengele, u fika u vula leswi ni nga ta ku byela swona,
3 u ku: ‘Twanani rito la Yehovha, n’wina tihosi ta Yuda na n’wina lava tshamaka Yerusalema. Yehovha murhangeli wa tintsumi, Xikwembu xa Israyele a li:
“‘“Ni kusuhi ni ku tisa khombo ka ndhawu leyi funtshi mun’wani ni mun’wani lweyi a nga ta swi twa tindleve ta yena ti ta tingiwa.
4 Ni ta yendla leswo hi mhaka ya leswi va nga ni tshika+ ni hi mhaka ya leswi va nga yendla swaku ni nga ha swi koti ku yi tiva ndhawu leyi;+ ka yona va yendlela swikwembu swin’wani magandzelo, leswi vona ni vavhovho va vona ni tihosi ta Yuda va kalaka va nga swi tivanga funtshi va tate ndhawu leyi hi ngati ya vanhu lava kalaka va nga na nandzu.+
5 Va yake tindhawu ta ku tlakuka ta ku gandzela Bali, swaku va hisa vana va vona ka ndzilu va va magandzelo ya ku hisiwa ka Bali,+ ku nga nchumu lowu ni kalaka ni nga va byelanga kumbe ku vulavula hi wona naswona ni kalaka ni nge se tshama ni wu pimisa ka mbilu ya mina.”’+
6 “‘“Kambe masiku ma ta, lawa ndhawu leyi yi nga ta kala yi nga ha vitaniwi Tofeti kumbe Nkova wa N’wana wa Hinomi kambe yi ta vitaniwa Nkova wa Ku Dlaya,”+ ku vula Yehovha.
7 “Ni ta helisa maplanu* ya vanhu va Yuda ni va le Yerusalema ka ndhawu leyi, ni ta va helisa hi xipada phambheni ka valala va vona ni hi voko la lava lavaka ku va dlaya. Mintsumbu ya vona ni ta yi nyika swinyanyani ni swiharhi swaku yi va swakudla swa swona.+
8 Ni ta yendla swaku doropa leli li va nchumu xa ku chavisa ni nchumu lexi nga ta beliwa noti. Mun’wani ni mun’wani lweyi a nga ta hundza hi ka lona a ta li txuvuka a gama a chava kutani a ba noti hi mhaka ya makhombo ya lona hinkwawu.+
9 Ni ta yendla swaku va dla nyama ya vana va vona va madjaha ni va tintombhi naswona mun’wani ni mun’wani a ta dla nyama ya munhu mun’wani, va ta yendla leswo hi mhaka ya leswi doropa li nga ta va na li rhendzeliwile ni hi mhaka ya ku xaniseka ka vona loko va rhendzeliwile hi valala va vona ni lava lavaka ku va dlaya.”’+
10 “Kutani pfotlosa khuwani phambheni ka vanhu lava fambaka na wena,
11 u gama u va byela u ku: ‘Yehovha murhangeli wa tintsumi a li: “Hi leswi ni nga ta va fayisa swona vanhu lava ni doropa leli, ku fana ni munhu lweyi a fayaka xibya lexi nga yendliwa hi vumba xi za xi nga ha lunghiseki; naswona va ta lahla vafi aTofeti anze ndhawu ya ku va lahla yi nga ha vi kona.”’+
12 “‘Hi leswo ni nga ta swi yendla ka ndhawu leyi, ni ka vanhu lava tshamaka ka yona, ni ta yendla swaku doropa leli li fana ni Tofeti,’ ku vula Yehovha.
13 ‘Tiyindlo ta Yerusalema ni tiyindlo ta tihosi ta Yuda ku nga tiyindlo hinkwatu leti ku nga yendliwa magandzelo ka tona henhla ka yindlo, ma yendleliwa hinkwaswu leswi nga matilweni+ ni lomu va nga chulula swa ku phuza va chululela swikwembu swin’wani magandzelo,+ ti ta va ti nga basanga ku fana ni ndhawu leyi ya Tofeti.’”+
14 Nkama Yeremiya a nga vuya hi Tofeti lomu Yehovha a nga mu rhuma kona swaku a ya profeta, a fike a nyima ka kintari* wa yindlo ya Yehovha a gama a byela vanhu hinkwavu a ku:
15 “Yehovha murhangeli wa tintsumi, Xikwembu xa Israyele a li: ‘Ka doropa leli ni ka swidoropani swa lona hinkwaswu ni tisa khombo leli ni nga vulavula hi lona, hikusa va tiwomise tinhloko va yala* ku yingisa marito ya mina.’”+
Tinhlamunselu ta le hansi
^ Kumbe: “makungu”.
^ Vona Ntlhamuselo.
^ Hi Xiheberu: “va nonon’hwise tinhamu ta vona swaku va nga yingisi”.
