Yeremiya 28:1-17
-
Yeremiya na Ananiya muprofeta wa mavunhwa (1-17)
28 Hi lembe lolelo, nkama Zedekiya+ hosi ya Yuda a nga sungula ku fuma, hi lembe la wu 4, hi wheti ya wu 5, muprofeta Ananiya n’wana wa Azuri lweyi a taka hi Gibiyoni,+ a vulavule na mina ka yindlo ya Yehovha phambheni ka vaprista ni vanhu hinkwavu a ku:
2 “Yehovha murhangeli wa tintsumi, Xikwembu xa Israyele a li: ‘Ni ta tshova kange* la hosi ya Babilona.+
3 Na ku nge se hela malembe mambirhi ni ta tlhelisela swibya hinkwaswu swa yindlo ya Yehovha ka ndhawu leyi, leswi Nebukadinazara hosi ya le Babilona a nga swi teka ka ndhawu leyi a swi yisa aBabilona.’”+
4 “‘Ni ta tlhelisela Yekoniya+ n’wana wa Yoyakimi+ hosi ya le Yuda ka ndhawu leyi ni swikarawa hinkwaswu swa le Yuda leswi nga ya Babilona,’+ ku vula Yehovha, ‘hikusa ni ta tshova kange la hosi ya le Babilona.’”
5 Se muprofeta Yeremiya a vulavula na muprofeta Ananiya phambheni ka vaprista ni vanhu hinkwavu lava a va nyime ka yindlo ya Yehovha.
6 Muprofeta Yeremiya a ku: “Amen!* Yehovha a a yendli swoleswo! Yehovha a a yendli leswi u nga swi profeta hi ku va a tlhelisela swibya swa yindlo ya yena Yehovha ka ndhawu leyi, ni vanhu hinkwavu lava nga swikarawa aBabilona!
7 Kambe ni kombela u yingisa rungula leli ni ku byelaka lona wena ni vanhu hinkwavu.
8 Vaprofeta lava va nga va kona khale swinene, mina na wena hi nge se va kona, a va profeta swaku matiko ya manyingi ni mimfumu yayikulu, a swi ta kumana ni nyimpi, khombo ni ntungu.*
9 Loko muprofeta a vula swaku ku ta va ni ku rhula se rito la muprofeta yelweyo li gama li hetiseka, swi ta tiviwa swaku Yehovha hi yena lweyi a nga mu rhuma muprofeta yelweyo hikakunene.”
10 Kutani muprofeta Ananiya a susa kange ka nhamu ya muprofeta Yeremiya a li tshova.+
11 Se Ananiya a vula leswi phambheni ka vanhu hinkwavu: “Yehovha a li: ‘Ni ta li tshovisa xileswi kange la Nebukadinazara hosi ya le Babilona ka tinhamu ta vanhu va matiko hinkwawu na ku nge se hela malembe mambirhi.’”+ Kutani muprofeta Yeremiya a famba.
12 Loko muprofeta Ananiya se a tshovile kange ka nhamu ya muprofeta Yeremiya, Yehovha a gama a vulavula na Yeremiya a ku:
13 “Famba u ya byela Ananiya u ku: ‘Yehovha a li: “U tshove makange ya timhandzi+ kambe u ta ma pfaleta hi ku yendla makange ya nsimbi.”
14 Hikusa Yehovha murhangeli wa tintsumi, Xikwembu xa Israyele a li: “Ni ta veka kange la nsimbi ka nhamu ya vanhu va matiko hinkwawu lawa, swaku va tirhela Nebukadinazara hosi ya le Babilona, va fanele va mu tirhela.+ Ni ta mu nyika hambi ni swiharhi swa khwati.”’”+
15 Se muprofeta Yeremiya a byela muprofeta Ananiya+ a ku: “Ni kombela u yingisa, wena Ananiya! Yehovha a nga ku rhumanga kambe wena u yendle swaku vanhu lava va tshemba mavunhwa.+
16 Kutani Yehovha a li: ‘Waswivo! Na ku susa misaveni. Lembe leli u ta fa hikusa u xengetele vanhu swaku va lwa na Yehovha.’”+
17 Se muprofeta Ananiya a fa hi lembe lolelo hi wheti ya wu 7.
Tinhlamunselu ta le hansi
^ Kumbe: “djoko; jugo”.
^ Kumbe: “A ku yendleke swoleswo.”
^ Kumbe: “mavabyi.”
