Yeremiya 35:1-19
-
Varekabi va veka xikombiso xaxinene xa ku yingisa (1-19)
35 Ka masiku ya Yoyakimi+ n’wana wa Yosiya, hosi ya le Yuda Yehovha a vulavule na Yeremiya a ku:
2 “Famba ka ndjangu wa Varekabi,+ u ya vulavula na vona u gama u va tisa ka yindlo ya Yehovha ka sala lin’wani la ku dlela ka lona, u fika u va nyika vhinyu va phuza.”
3 Se ni teka Yazaniya n’wana wa Yeremiya n’wana wa Abaziniya, vamakwavu, vana va yena hinkwavu va madjaha ni ndjangu hinkwawu wa Varekabi,
4 ni va tisa ka yindlo ya Yehovha, ni fika ni va nghenisa ka sala la ku dlela ka lona la vana va Hanani n’wana wa Igidaliya, mutirheli wa Xikwembu xa ntiyiso; sala leli ni nga va tisa ka lona a li li tlhelweni ka sala la ku dlela ka lona la varhangeli, leli a li li henhla ka sala la ku dlela ka lona la Mazeya n’wana wa Xalumi murindzi wa nyanghwa.
5 Se ni veka tikopo ta ku tala hi vhinyu phambheni ka vavanuna vandjangu wa Varekabi ni gama ni va byela ni ku: “Phuzani vhinyu.”
6 Kambe va ku: “A hi nge yi phuzi vhinyu hikusa Yonadabi*+ n’wana wa Rekabi, vhovho wa hina a hi byele a ku: ‘Mi nga tshuki mi phuza vhinyu, n’wina kumbe vana va n’wina.
7 A mi fanelanga mi yaka tiyindlo, mi byala timbewu kumbe mi rima kumbe mi va ni masimu ya mawuvha. Kambe mi fanele mi tshama ka matende minkama hinkwayu swaku mi ta hanya nkama wa ku leha ka tiko leli mi tshamaka ka lona ingi mo va vanhu va tiko lin’wani.’
8 Kutani hi tama hi yingisa rito la Yonadabi n’wana wa Rekabi vhovho wa hina ka hinkwaswu leswi a nga hi byela swona, hi ku ka hi nga phuzi vhinyu, hina, vasati va hina, vana va hina va madjaha ni va tintombhi.
9 A hi yaki tiyindlo swaku hi tshama ka tona funtshi a hi na masimu ya mawuvha kumbe masimu kumbe timbewu.
10 Hi tama hi tshama ka matende naswona hi yingisa hinkwaswu leswi Yonadabi* vhovho wa hina a nga hi byela swona.
11 Kambe nkama Nebukadinazara* hosi ya Babilona a nga ta swaku a ta lwa ni tiko,+ hi te: ‘Tanani, a hi ngheneni Yerusalema swaku hi baleka masonchwa ya Vakalidiya ni ya Vasiriya,’ kutani swoswi hi tshama aYerusalema.”
12 Yehovha a vulavula na Yeremiya a ku:
13 “Mina Yehovha murhangeli wa tintsumi, Xikwembu xa Israyele ni li: ‘Famba u ya byela vanhu va le Yuda ni lava tshamaka Yerusalema u ku: “Kasi nkama ni nkama a mi nga byeliwi ku yingisa marito ya mina?”+ ku vula Yehovha.
14 “Yonadabi n’wana wa Rekabi a byele vatukulu va yena swaku va nga phuzi vhinyu, se va ma yingisile marito ya yena hi ku kala va nga phuzi vhinyu ku ta fikela namuntlha, va landzela nawu wa vhovho wa vona.+ Kambe mina, ni vulavule na n’wina hi ku phindhaphindha* kambe a mi ni yingisanga.+
15 A ni tshamela ku rhuma vatirheli va mina ka n’wina ku nga vaprofeta, ni va rhuma hi ku phindhaphindha,*+ ni ku: ‘Ni kombela mi tshika tindlela ta n’wina ta ku biha+ mi yendla swaswinene! Mi nga landzeli swikwembu swin’wani mi ya swi tirhela. Kutani mi ta tama mi tshama ka tiko leli ni nga li nyika n’wina ni vavhovho va n’wina.’+ Kambe a mi ni yingisanga.
16 Vatukulu va Yonadabi n’wana wa Rekabi va yingise nawu lowu va nga nyikiwa wona hi vhovho wa vona,+ kambe vanhu lava a va ni yingisanga.”’”
17 “Se Yehovha murhangeli wa tintsumi, Xikwembu xa Israyele a li: ‘Vanhu va tiko la Yuda ni hinkwavu lava tshamaka Yerusalema ni va tisela khombo leli ni nga va byela hi lona,+ hikusa ni vulavule na vona kambe a va ni yingisanga, a ni tshamela ku va vitana kambe a va hlamulanga.’”+
18 Yeremiya a byela ndjangu wa Varekabi a ku: “Yehovha murhangeli wa tintsumi, Xikwembu xa Israyele a li: ‘Leswi mi nga yingisa nawu wa Yonadabi vhovho wa n’wina naswona mi tamaka mi yingisa minawu ya yena hinkwayu, mi yendla leswi a nga mi byela swona,
19 Yehovha murhangeli wa tintsumi, Xikwembu xa Israyele a li: “Ku ta tshama na ku ni ntukulu wa Yonadabi* n’wana wa Rekabi lweyi a ni tirhelaka.”’”
Tinhlamunselu ta le hansi
^ I vito leli nga gomisiwa la Yehonadabu.
^ I vito leli nga gomisiwa la Yehonadabu.
^ Hi Xiheberu: “Nebukadretsara”. Ku nga matsalelo ya ku hambana.
^ Hi Xiheberu: “ni pfuke nimpundzu ni vulavula”.
^ Hi Xiheberu: “ni pfuke nimpundzu ni va rhuma”.
^ I vito leli nga gomisiwa la Yehonadabu.
