Yeremiya 40:1-16
40 Yeremiya a yamukele rito leli taka hi ka Yehovha loko Nebuzaradani+ murhangeli wa vagwardu se a mu chunsile aRama.+ A a mu yise Rama na a bohiwe hi machini naswona a a ni swikarawa hinkwaswu swa le Yerusalema ni swa le Yuda, leswi a swi yisiwa aBabilona.
2 Kutani murhangeli wa vagwardu a teka Yeremiya a mu byela a ku: “Yehovha Xikwembu xa wena a swi vule khale swaku ndhawu leyi yi ta weliwa hi khombo leli;
3 Yehovha a li tisile hi ku landza leswi a nga swi hlaya hi mhaka ya leswi n’wina mi nga mu djohela Yehovha naswona mi kalaka mi nga li yingisanga rito la yena. Hi leswo swi nga yendla mi kumana ni khombo leli.+
4 Namuntlha ni susa machini lama nga ka mavoko ya wena. Loko u swi lava ku famba na mina aBabilona, a hi fambe, ni ta ku hlayisa. Kambe loko u nga swi lavi ku famba na mina aBabilona sala. Tiko hinkwalu li le phambheni ka wena. Famba lomu u lavaka ku ya kona.”+
5 Loko Yeremiya a ha kanakana ku tlhela, Nebuzaradani a ku: “Tlhelela ka Gedaliya+ n’wana wa Ayikami+ n’wana wa Xafani,+ lweyi hosi ya Babilona yi nga mu langa swaku a vonelela madoropa ya Yuda, u ya tshama na yena ni vanhu lavan’wani, loko u nga swi lavi famba lomu u ku lavaka.”
Kutani murhangeli wa vagwardu a mu nyika swakudla ni swilo swin’wani, a gama a mu tshika a famba.
6 Se Yeremiya a ya ka Gedaliya n’wana wa Ayikami aMizpa+ kutani a tshama na yena ni vanhu lava a va sale tikweni.
7 Hi ku famba ka nkama varhangeli hinkwavu va masonchwa lava a va li khwatini ni vavanuna lava a va li na vona, va twa swaku hosi ya Babilona yi lange Gedaliya n’wana wa Ayikami swaku a vonelela tiko, vavanuna, vavasati ni vana, ku nga vanhu hinkwavu va tiko lava nga swisiwana lava kalaka va nga yisiwanga Babilona.+
8 Se va ya ka Gedaliya aMizpa.+ Lava nga ya a ku li Ismayeli+ n’wana wa Netaniya, Yohanani+ na Yonatani vana va Kareya, Seraya n’wana wa Tanumeti, vana va Efayi wa le Netofa na Yezaniya+ n’wana wa Mukati ku patsa ni vavanuna lava a va li na vona.
9 Gedaliya n’wana wa Ayikami n’wana wa Xafani a fungele varhangeli ni vanhu va vona a ku: “Mi nga chavi ku tirhela Vakalidiya. Tshamani tikweni, mi tirhela hosi ya Babilona, kutani swi ta mi fambela kahle.+
10 Mina ni ta tshama Mizpa swaku ni va munyimeli wa n’wina ka Vakalidiya lava taka ka hina. Kambe n’wina mi fanele mi hlengeleta mihandzu ya malanga ni mafurha mi hamba ni vhinyu, mi swi veka ka swibya swa n’wina, mi tshama ka madoropa lawa mi nga ma teka.”+
11 Vayuda hinkwavu lava a va li Mowabu, aAmoni ni le Edomu ku patsa ni lava a va li ka matiko laman’wani hinkwawu, na vona va swi twile swaku hosi ya le Babilona yi pfumelele swaku vanhu van’wani va sala aYuda ni swaku yi lange Gedaliya n’wana wa Ayikami n’wana wa Xafani swaku a va murhangeli wa vona.
12 Se Vayuda hinkwavu va sungula ku vuya hi ka tindhawu hinkwatu leti a va hangalakele ka tona, va te ka Gedaliya aMizpa ka tiko la Yuda. Va hlengelete mihandzu ya yinyingi hintamu ya malanga va hamba ni vhinyu la linyingi.
13 Yohanani n’wana wa Kareya ni varhangeli hinkwavu va masonchwa lava a va li khwatini, va te ka Gedaliya aMizpa.
14 Va fika va mu byela va ku: “Wo kala wu nga swi tivi swaku Balisi hosi ya Vaamoni,+ a rhume Ismayeli n’wana wa Netaniya swaku a ta ku dlaya?”+ Kambe Gedaliya n’wana wa Ayikami a nga swi kholwanga leswi va nga swi vula.
15 Se Yohanani n’wana wa Kareya a byela Gedaliya xihundleni aMizpa a ku: “Ni lava ku ya dlaya Ismayeli n’wana wa Netaniya naswona a ku na munhu lweyi a nga ta swi tiva. A hi fanelanga hi mu tshika a ku dlaya hikusa loko o yendla leswo vanhu hinkwavu va le Yuda lava nga hlengeletiwa va ta hangalasiwa ni vanhu hinkwavu lava nga sala va le Yuda va ta helisiwa.”
16 Kambe Gedaliya+ n’wana wa Ayikami a byela Yohanani n’wana wa Kareya a ku: “U nga swi yendli leswo hikusa leswi u swi vulaka hi Ismayeli a hi ntiyiso.”