Yeremiya 41:1-18
41 Hi wheti ya wu 7, Ismayeli+ n’wana wa Netaniya n’wana wa Elixama lweyi a a li n’wana wa le wuhosini naswona a a li mun’we wa madoda lawa a ma tshembiwa hi hosi, a fambe ni 10 wa vavanuna ka Gedaliya n’wana wa Ayikami aMizpa.+ Loko va ha li ku dleni xikan’we aMizpa,
2 Ismayeli n’wana wa Netaniya ni 10 wa vavanuna lava a nga ta na vona va suka va nyima va dlaya Gedaliya n’wana wa Ayikami n’wana wa Xafani hi xipada. Va dlaya munhu lweyi hosi ya le Babilona yi nga mu langa swaku a vonelela tiko.
3 Ismayeli a tlhele a dlaya ni Vayuda hinkwavu lava a va li na Gedaliya aMizpa ni masonchwa ya Vakalidiya lawa a ma li kolanu.
4 Hi siku la wumbirhi loko Gedaliya se a dlayiwile, na mhaka leyi yi nge se tiviwa hi munhu,
5 ku te 80 wa vavanuna lava taka hi Xikemi,+ aXilo+ ni le Samariya.+ A va tsemete malepfu, a va davule mpahla ya vona hi le xikarhi, va titsemelelile+ naswona a va khome magandzelo ya swakudla ni swinun’hwelisu*+ swaku va swi tisa ka yindlo ya Yehovha.
6 Kutani Ismayeli n’wana wa Netaniya a suka aMizpa swaku a ya kumana na vona, a famba na a rila. Nkama va nga kumana a te: “A hi fambeni ka Gedaliya n’wana wa Ayikami.”
7 Kambe nkama va nga fika adoropeni, Ismayeli n’wana wa Netaniya ni vavanuna lava a va li na yena va va dlayile, va va txukumeta ka xihlovo.
8 Kambe a ku ni 10 wa vavanuna xikarhi ka vona lava nga byela Ismayeli va ku: “U nga hi dlayi hikusa hi ni ndhawu khwatini leyi hi nga fihla trigu, maxalani,* mafurha ni wulombe.” Kutani a nga va dlayi vona ni vamakwavu va vona.
9 Ismayeli a txukumete mintsumbu hinkwayu ya vavanuna lava a nga va dlaya ka xihlovo xaxikulu lexi nga txeliwa hi Hosi Asa nkama na a lwa na Baxa hosi ya le Israyele.+ Xihlovo lexi hi xona lexi Ismayeli n’wana wa Netaniya a nga xi tata hi vavanuna lava a nga va dlaya.
10 Ismayeli a gama a teka vanhu hinkwavu lava nga sala aMizpa+ a va yendla swikarawa, ku patsa ni vana va tintombhi va hosi ni vanhu hinkwavu lava nga sala aMizpa, lava Nebuzaradani murhangeli wa vagwardu a nga va peta djele la Gedaliya+ n’wana wa Ayikami. Ismayeli n’wana wa Netaniya a va yendle swikarawa a gama a famba a ya ka Vaamoni.+
11 Nkama Yohanani+ n’wana wa Kareya ni varhangeli hinkwavu va masonchwa lava a va li na yena va nga twa hinkwaswu swa ku biha leswi nga yendliwa hi Ismayeli n’wana wa Netaniya,
12 va teka vavanuna hinkwavu va famba va ya lwa na Ismayeli n’wana wa Netaniya va gama va mu kuma kusuhi ni mati ya manyingi* aGibiyoni.
13 Vanhu hinkwavu lava a va li na Ismayeli va tsakile nkama va nga vona Yohanani n’wana wa Kareya ni varhangeli hinkwavu va masonchwa lava a va li na yena.
14 Kutani vanhu hinkwavu lava Ismayeli a nga va teka aMizpa+ swaku a va yendla swikarawa va ya ka Yohanani n’wana wa Kareya.
15 Kambe Ismayeli n’wana wa Netaniya ni 8 wa vavanuna lava a va li na yena va baleka Yohanani va ya ka Vaamoni.
16 Yohanani n’wana wa Kareya ni varhangeli hinkwavu va masonchwa lava a va li na yena va teke vanhu hinkwavu lava taka hi Mizpa lava a nga va chunsa ka Ismayeli n’wana wa Netaniya, loko Ismayeli se a dlaye Gedaliya+ n’wana wa Ayikami. Va tisa vavanuna, masonchwa, vavasati, vana ni vatirhi va le ka yindlo ya wuhosi hi le Gibiyoni.
17 Se va famba va ya tshama ka ndhawu ya vayendzi aKimihami akusuhi ni Betlehema,+ va yendle leswo hi ku lava ku nghena Gibita+
18 hi mhaka ya Vakalidiya. Hikusa a va va chava, hi mhaka ya leswi Ismayeli n’wana wa Netaniya a nga dlaya Gedaliya n’wana wa Ayikami, lweyi hosi ya le Babilona yi nga mu langa swaku a vonelela tiko.+