Yeremiya 42:1-22
42 Kutani varhangeli hinkwavu va masonchwa, Yohanani+ n’wana wa Kareya, Yezaniya n’wana wa Oxaya ni vanhu hinkwavu, ku sukela ka wamutsongo ku ya ka wamukulu, va tshinela
2 va byela muprofeta Yeremiya va ku: “Hi kombela swaku u yingisa xikombelo xa hina xa ku kombela timpsalu, u hi khongelela ka Yehovha Xikwembu xa wena hi mhaka ya vanhu lava hinkwavu lava nga sala, hikusa ku sale vanhu vavatsongo+ hilani u swi vonaka hi kona.
3 Hi navela swaku Yehovha Xikwembu xa wena a hi byela ndlela leyi hi faneleke hi famba hi yona ni leswi hi faneleke hi swi yendla.”
4 Muprofeta Yeremiya a va hlamula a ku: “Ni swi twile, ni ta khongela ka Yehovha Xikwembu xa n’wina ni yendla leswi mi nga ni kombela swona; kutani leswi Yehovha a nga ta swi vula ni ta mi byela swona. A ni nga ta mi fihlela nchumu.”
5 Va hlamula Yeremiya va ku: “Yehovha a a ve mboni ya ntiyiso ni ya ku tshembeka naswona Yehovha Xikwembu xa wena a a hi khatisi loko hi nga swi yendli leswi a swi vulaka hi ku tirhisa wena.
6 Hambi swi hi tsakisa kumbe swi nga hi tsakisi, hi ta swi yingisa leswi Yehovha Xikwembu xa hina lweyi hi ku rhumaka ka yena a nga ta swi vula, swaku swilo swi ta hi fambela kahle hi mhaka ya leswi hi yingisaka rito la Yehovha Xikwembu xa hina.”
7 Loko se ku hundze 10 wa masiku, Yehovha a gama a vulavula na Yeremiya.
8 Se Yeremiya a gama a vitana Yohanani n’wana wa Kareya ni varhangeli hinkwavu va masonchwa lava a va li na yena ku patsa ni vanhu hinkwavu, ku sukela ka wamutsongo ku ya ka wamukulu.+
9 A va byela a ku: “Yehovha Xikwembu xa Israyele lweyi mi nga ni rhuma ka yena swaku ni ya kombela leswaku a mi komba timpsalu a li:
10 ‘Loko impela mo tshama ka tiko leli, ni ta mi yaka a ni nge mi dilizi, ni ta mi byala a ni nge mi tsuvuli, ni ta tilaya* hi mhaka ya khombo leli ni nga mi tisela lona.+
11 Mi nga yi chavi hosi ya le Babilona leyi mi yi chavaka.’+
“‘Mi nga yi chavi,’ ku vula Yehovha, ‘hikusa ni na n’wina swaku ni mi ponisa ni ku mi chunsa ka yona.
12 Ni ta va ni timpsalu+ ka n’wina funtshi yona yi ta va ni timpsalu ka n’wina, yi mi tlhelisela ka tiko la n’wina.
13 “‘Kambe loko mi ku: “Hina a hi nga ta tshama ka tiko leli,” naswona mi nga li yingisi rito la Yehovha Xikwembu xa n’wina
14 hi ku vula mi ku: “Hina hi ta ya ka tiko la Gibita,+ lomu hi nga ta kala hi nga yi voni nyimpi kumbe ku twa ku chayiwa ka limhondzo kumbe hi biwa hi ndlala hi mhaka ya ku pfumala pawu; hi kolanu hi nga ta tshama kona,”
15 kutani yingisani rito la Yehovha, n’wina mi nga sala aYuda. Yehovha murhangeli wa tintsumi, Xikwembu xa Israyele a li: “Loko mi tinyimisele ku ya Gibita swaku mi ya tshama* kona,
16 a xipada lexi mi xi chavaka xi ta mi kuma ka tiko la Gibita ni ndlala leyi mi yi chavaka yi ta mi landzelela anze Gibita, mi ta fela koseniya.+
17 Vanhu hinkwavu lava nga boha ku ya Gibita swaku va ya tshama kona, va ta dlayiwa hi xipada, hi ndlala ni hi ntungu.* A nga kona lweyi a nga ta pona kumbe ku baleka khombo leli ni nga ta va tisela lona.”’
18 “Hikusa Yehovha murhangeli wa tintsumi, Xikwembu xa Israyele a li: ‘Ku fana ni leswi ni nga chulula ku kwata ka mina kakukulu henhla ka vanhu va le Yerusalema,+ ni ta chulula ku kwata ka mina henhla ka n’wina loko mo ya Gibita, kutani vanhu va ta mi rhuka, va mi nyenya ni ku mi tekela hansi+ funtshi a mi nge he tlheli mi yi vona ndhawu leyi.’
19 “Yehovha a vulavulile na n’wina, n’wina vanhu va le Yuda lava nga sala. Mi nga yi Gibita. Swi tiveni swaku namuntlha ni mi basopisile
20 swaku xihoxo xa n’wina xi ta yendla swaku mi fa. Hikusa mi ni rhume ka Yehovha Xikwembu xa n’wina mi ku: ‘Hi khongelele ka Yehovha Xikwembu xa hina, u hi byela hinkwaswu leswi Yehovha Xikwembu xa hina a swi vulaka kutani hi ta swi yendla.’+
21 Namuntlha ni mi byelile kambe a mi nga ta li yingisa rito la Yehovha Xikwembu xa n’wina kumbe mi yendla xin’wani ni xin’wani lexi a nga ni rhuma swaku ni mi byela xona.+
22 Se swi tiveni swaku mi ta dlayiwa hi xipada, hi ndlala ni hi ntungu ka ndhawu leyi mi lavaka ku ya ka yona mi ya tshama ka yona.”+
