Yeremiya 44:1-30
44 Yeremiya a yamukele marito lawa a a fanele a ma byela Vayuda hinkwavu lava tshamaka atikweni la Gibita,+ lava tshamaka aMigidoli,+ aTapanesi,+ aNofu*+ ni le ka tiko la Patiru+ lama nge:
2 “Yehovha murhangeli wa tintsumi, Xikwembu xa Israyele a li: ‘Mi li vonile khombo leli ni nga li tisela Yerusalema+ ni madoropa hinkwawu ya Yuda, namuntlha ku hohlokile* funtshi a ku tshami munhu.+
3 Leswo swi humelelile hi mhaka ya swilo swa ku biha leswi va nga swi yendla swaku va ni kwatisa hi ku famba va ya yendla magandzelo+ va tlhela va tirhela swikwembu swin’wani swa ku kala va nga swi tivi, swaku hambi n’wina kumbe vavhovho va n’wina a va swi tivanga.+
4 A ni tshamela ku mi rhumela vatirheli va mina hinkwavu ku nga vaprofeta, a ni va rhuma hi ku phindhaphindha* ni ku: “Ni kombela mi nga swi yendli swilo leswi swa ku nyenyentsa, leswi ni swi nyenyaka.”+
5 Kambe a va yingisanga swaku va tshika ku yendla swa ku biha hi ku ka va nga yendleli swikwembu swin’wani magandzelo.+
6 Se ku kwata ka mina kakukulu ku chululiwa kutani ku hisa madoropa ya Yuda ni switaratu swa Yerusalema, swi hohlokela* hilani mi swi vonaka hi kona namuntlha.’+
7 “Yehovha murhangeli wa tintsumi, Xikwembu xa Israyele a li: ‘Hi mhaka muni mi tilavela khombo lalikulu, leli nga ta yendla swaku ku dlayiwa vavanuna hinkwavu, vavasati, vana ni swivanani aYuda, ku nga sali munhu?
8 Hi mhaka muni mi fanele mi ni kwatisa hi mintirho ya mavoko ya n’wina hi ku yendlela swikwembu swin’wani magandzelo ka tiko la Gibita lomu mi nga ya mi ya tshama kona? Mi ta helisiwa mi tlhela mi rhukiwa ni ku tekeliwa hansi xikarhi ka matiko hinkwawu ya misava.+
9 Se mi yo yi khohlwa mintirho ya ku biha ya vavhovho va n’wina ni ya tihosi ta Yuda+ ni ya vasati va tona,+ ku patsa ni mintirho ya n’wina ya ku biha ni ya vasati va n’wina,+ leyi nga yendliwa ka tiko la Yuda ni le ka switaratu swa Yerusalema?
10 A va tivekanga hansi ku ta fikela namuntlha, a va chavanga+ kumbe ku yingisa minawu ya mina leyi ni nga mi nyika yona n’wina ni vavhovho va n’wina.’+
11 “Kutani Yehovha murhangeli wa tintsumi, Xikwembu xa Israyele a li: ‘Ni lava ku mi tisela khombo, swaku ni helisa tiko hinkwalu la Yuda.
12 Ni ta teka vanhu lava nga sala va le Yuda lava a va bohe ku ya ka tiko la Gibita swaku va ya tshama kona, hinkwavu va ta dlayiwa atikweni la Gibita.+ Va ta dlayiwa hi xipada ni hi ndlala; ku sukela ka wamutsongo ku ya ka wamukulu, va ta dlayiwa hi xipada ni hi ndlala. Vanhu va ta va rhuka, va va nyenya va tlhela va va vonela hansi.+
13 Ni ta khatisa lava tshamaka tikweni la Gibita ku fana ni leswi ni nga swi yendla ka lava tshamaka aYerusalema, hi xipada, hi ndlala ni hi ntungu.*+
14 Vanhu lava nga sala va le Yuda lava nga ya tshama atikweni la Gibita a va nga ta baleka kumbe ku pona swaku va tlhelela ka tiko la Yuda. Va ta swi navela ku tlhela va ya tshama kona kambe a va nge he tlheli, ku to tlhela ntsena vavatsongo lava nga ta baleka.’”
15 Vavanuna hinkwavu lava a va swi tiva swaku vasati va vona a va yendlela swikwembu swin’wani magandzelo ni vavasati hinkwavu lava a va nyime kolanu, lava a va li ntlawa wawukulu ni vanhu hinkwavu lava a va tshama ka tiko la Gibita,+ aPatiru+ va hlamula Yeremiya va ku:
16 “A hi nga ta swi yingisa leswi u nga hi byela swona hi vito la Yehovha.
17 Kambe hi ta yendla leswi hi nga swi hlaya, hi ta yendla magandzelo hi yendlela Hosi ya Xisati ya Tilo* hi tlhela hi yi chululela magandzelo ya vhinyu,+ ku fana ni leswi hina, vavhovho va hina, tihosi ta hina ni varhangeli va hina a hi yendlisa swona ka madoropa ya Yuda ni ka switaratu swa Yerusalema loko hi dla pawu hi xurha naswona swilo swi hi fambela kahle, hi nga kumiwi hi khombo.
18 Ku sukela nkama hi nga tshika ku yendla magandzelo hi yendlela Hosi ya Xisati ya Tilo* ni ku yi chululela magandzelo ya vhinyu, hi pfumale minchumu hinkwayu naswona hi dlayiwe hi xipada ni ndlala.”
19 Vavasati va tlhele va ku: “Vanuna va hina va hi pfumelele ku yendlela Hosi ya Xisati ya Tilo* magandzelo ni ku yi chululela magandzelo ya vhinyu, ni ku yi hambela mabolu ya ku fana na yona.”
20 Se Yeremiya a byela vanhu hinkwavu, vavanuna ni vasati va vona ni vanhu hinkwavu lava a va vulavula na yena a ku:
21 “Magandzelo lawa n’wina, vavhovho va n’wina, tihosi ta n’wina, varhangeli va n’wina ni vanhu va tiko a va ma yendla ka madoropa ya Yuda ni ka switaratu swa Yerusalema,+ Yehovha wa ma khumbuka a nga ma khohlwanga.*
22 Hi wugamu Yehovha a a nga ha swi koti ku yi lehisela mbilu mintirho ya n’wina ya ku biha ni swilo swa ku nyenyentsa leswi mi nga swi yendla, kutani tiko la n’wina li hohlokelile,* li va nchumu xa ku chavisa ni lexi rhukiwaka, tiko leli kalaka li nga ha tshami munhu ku nga leswi li nga tshamisa swona namuntlha.+
23 Mi kumane ni khombo leli, hi mhaka ya leswi mi nga yendla magandzelo lawa ni hi mhaka ya leswi mi nga djohela Yehovha hi ku kala mi nga yingisi leswi Yehovha a nga mi byela swona ni nawu wa yena ni switsundzuxu swa yena, hilani swi nga tshamisa swona namuntlha.”+
24 Yeremiya a tama a byela vanhu hinkwavu ni vavasati hinkwavu a ku: “Twanani marito ya Yehovha n’wina hinkwenu vanhu va le Yuda lava nga ka tiko la Gibita.
25 Yehovha murhangeli wa tintsumi, Xikwembu xa Israyele a li: ‘Leswi n’wina ni vasati va n’wina mi nga swi vula mi swi yendlile hi mavoko ya n’wina, hikusa mi te: “Hi ta yendla magandzelo hi yendlela Hosi ya Xisati ya Tilo* ni ku yi chululela magandzelo ya vhinyu ku nga leswi hi nga tshembisa swona.”+ N’wina vavasati mi ta yendla leswi mi nga swi tshembisa.’
26 “Kutani twanani marito ya Yehovha, n’wina hinkwenu vanhu va le Yuda, lava tshamaka tikweni la Gibita: ‘“Na funga hi vito la mina lalikulu,” ku vula Yehovha, “swaku munhu mun’wani ni mun’wani wa le Yuda+ a nge he li vitani vito la mina loko a funga ka tiko hinkwalu la Gibita a ku: ‘Leswi Yehovha Hosi Leyikulu a hanyaka!’+
27 Ni va veke tihlo swaku ni va tisela khombo ku nga li swaswinene;+ vavanuna hinkwavu va le Yuda lava nga ka tiko la Gibita va ta dlayiwa hi xipada ni hi ndlala, va za va hela va ku jii.+
28 I vanhu vavatsongo ntsena lava nga ta pona ku dlayiwa hi xipada va gama va suka ka tiko la Gibita va tlhelela ka tiko la Yuda.+ Se vanhu hinkwavu lava nga sala va le Yuda lava nga ya ka tiko la Gibita va ya tshama kona va ta swi tiva swaku ku hetiseke rito la mani, la mina kumbe la vona!”’”
29 “‘Xikombiso xa n’wina hi lexi,’ ku vula Yehovha, ‘xa leswaku ni ta mi khatisa ka ndhawu leyi, swaku mi ta swi tiva swaku leswi ni nga mi tshembisa khombo, vhela ni ta li tisa.
30 Yehovha a li: “Ni nyikela Faru Ofira, hosi ya Gibita ka valala va yena ni ka lava lavaka ku mu dlaya, ku fana ni leswi ni nga nyikela Zedekiya hosi ya le Yuda ka Nebukadinazara* hosi ya le Babilona, lweyi a a li nala wa yena funtshi a a lava ku mu dlaya.”’”+
Tinhlamunselu ta le hansi
^ Kumbe: “aMemfisi”.
^ Kumbe: “i marhumbi”.
^ Hi Xiheberu: “pfuka nimpundzu ni va rhuma”.
^ Kumbe: “swi va marhumbi”.
^ Kumbe: “mavabyi.”
^ Vito la xikwembu xa xisati lexi a xi gandzeliwa hi Vayisrayele lava nga tshika ku tirhela Yehovha, kumbexana i xikwembu xa xisati lexi a ku pimisiwa swaku xi yendla vanhu va psala.
^ Vito la xikwembu xa xisati lexi a xi gandzeliwa hi Vayisrayele lava nga tshika ku tirhela Yehovha, kumbexana i xikwembu xa xisati lexi a ku pimisiwa swaku xi yendla vanhu va psala.
^ Vito la xikwembu xa xisati lexi a xi gandzeliwa hi Vayisrayele lava nga tshika ku tirhela Yehovha, kumbexana i xikwembu xa xisati lexi a ku pimisiwa swaku xi yendla vanhu va psala.
^ Hi Xiheberu: “ma te ka mbilu ya yena.”
^ Kumbe: “li ve rhumbi”.
^ Vito la xikwembu xa xisati lexi a xi gandzeliwa hi Vayisrayele lava nga tshika ku tirhela Yehovha, kumbexana i xikwembu xa xisati lexi a ku pimisiwa swaku xi yendla vanhu va psala.
^ Hi Xiheberu: “Nebukadretsara”. Ku nga matsalelo ya ku hambana.