Yeremiya 49:1-39
49 Ka Vaamoni+ Yehovha a li:
“Israyele o kala a nga na vana va madjaha?
O kala vana va ku dla tshomba, a nga na vadli va tshomba?
Hi mhaka muni Malikomo+ a teke tiko la Gadi?+
Hi mhaka muni vanhu va yena va tshama ka madoropa ya Israyele?”
2 “‘Kutani masiku ma ta,’ ku vula Yehovha,‘Lawa ni nga ta yendla swaku ku twala guwa la nyimpi* la ku lwa na Raba+ wa Vaamoni.+
A ta va ndhawu leyi nga hohlokela,Swidoropani leswi nga kusuhi na yena swi ta hisiwa hi ndzilu.’
‘Se Israyele a ta gama a teka tiko la lava nga teka tiko la yena,’+ ku vula Yehovha.
3 ‘Rila wena Exiboni hikusa Ayi a helisiwile!
Huwelelani n’wina swidoropani leswi nga kusuhi na Raba.
Yambalani masaka*
Rilani mi fambafamba ka swib’ala swa maribye,*Hikusa Malikomo a ta ya wukaraweni,Yena ni vaprista va yena ni varhangeli va yena.+
4 Hi mhaka muni mi tibuma hi minkova ya n’wina?Ni tindhawu ta n’wina leti kalaka ti nga na maganga leti nga ni mati lama tsutsumaka, n’wina vanhu va ku kala mi nga tshembeki,Nwina lava tshembaka tshomba la n’wina,Mi li: “I mani lweyi a nga ta ta a ta lwa na hina?”’”
5 “‘Ni mi tisela nchumu xa ku chavisa,’ ku vula Hosi Leyikulu, Yehovha murhangeli wa tintsumi,‘Lexi taka hi ka hinkwavu lava nga mi rhendzela.
Mi ta hangalaseliwa ka matlhelo hinkwawu,A ku nga ta va ni munhu lweyi a nga ta hlengeleta lava va nga ta baleka.’”
6 “‘Kambe ni ta gama ni hlengeleta swikarawa swa Vaamoni,’ ku vula Yehovha.”
7 Yehovha murhangeli wa tintsumi a vula leswi ka Edomu:
“Ko kala ku nga ha na wutlharhi aTemani?+
Xi yo hela xitsundzuxu xaxinene ka lava nga ni ku twisisa?
Li yo bola wutlharhi la vona?
8 Balekani mi tlhela!
Fambani mi ya tshama ka mimhakwa,* n’wina vanhu va le Dedani!+
Hikusa ni ta tisela Esawu khomboNkama ku nga ta fika nkama wa mina wa ku mu khatisa.
9 Loko a wu ngheneliwile hi lava khayaka mawuvha,Indjhe a va nga ta siyanyana yamatsongo?*
Loko a ku te vayivi niwusiku,A va ta wonhetelisa xileswi va swi lavisaka swona.+
10 Kambe ni ta hlivila Esawu a sala a nga yambalanga nchumu.
Ni ta gwavula tindhawu ta yena ta ku tumbela ka tona,Swaku a nga tumbeli.
Vana va yena, vamakwavu ni vavhizinyu va yena hinkwavu va ta helisiwa,+Se yena a nga ha ta va kona.+
11 Siya vana va wena lava kalaka va nga na vapsali,*Ni ta va hlayisa va hanya,Ni vavasati lava nga feliwa hi vavanuna va ta ni tshemba.”
12 Hikusa Yehovha a li: “Waswivo! Leswi lava va kalaka va nga yavanyisiwanga swaku va phuza ka kopo ya ku kwata ka mina, va bohekaka ku phuza, indjhe wena u nga tshikiwa u nga khatisiwi? A wu nga ta tshikiwa u nga khatisiwi hikusa u fanele u yi phuza.”+
13 “Hikusa ni funga hi vito la mina,” ku vula Yehovha, “swaku Bozra a ta chavisa,+ a poyiliwa, a va ndhawu ya ku hohlokela ni xirhuku; naswona madoropa ya yena hinkwawu ma ta tshama na ma li ndhawu ya ku hohlokela.”*+
14 Ni twe rungula leli taka hi ka Yehovha,Ku rhumeliwe munyimeli xikarhi ka matiko a ku:
“Hlengeletanani mi ta mi ta lwa na yena;Tilunghiseleleni ku lwa.”+
15 “Waswivo! Ni yendle swaku u va wamutsongo xikarhi ka matiko,U voneliwa hansi xikarhi ka vanhu.+
16 Leswi vanhu va ku chavisaka swona ni ku tibyela ka mbilu ya wena swa ku lahla,Wena lweyi u tshamaka ka mimhakwa,Wena u tshamaka ka ganga la ku leha.
Hambileswi u yakaka xisaka xa wena henhla swinene ku fana ni gama,*Ni ta ku hawula,” ku vula Yehovha.
17 “Edomu a ta chavisa.+ Mun’wani ni mun’wani lweyi a hundzaka kusuhi na yena a ta txuvuka na a chava ni ku ba noti hi mhaka ya makhombo ya yena hinkwawu.
18 Ku fana ni ndlela leyi Sodoma na Gomora ni madoropa lawa a ma li kusuhi na kona ma nga helisiwa hi yona,”+ ku vula Yehovha, “a ku na munhu lweyi a nga ta tshama Edomu.+
19 “Phela ku fana ni nghonyama leyi taka na yi huma hi ka makhwati ya ku tlhuma akusuhi ni Yordani, ku ta ta mun’wani a fika a hlasela ndhawu ya ku lusela ka yona leyi nga hlayiseka,+ kambe hi ku tsopeta ka tihlo ni ta yendla swaku a mu baleka. Ni ta mu vekela murhangeli lweyi ni nga mu langa. Hikusa i mani lweyi a fanaka na mina naswona i mani lweyi a nga ni sivelaka? Hi wini mulusi lweyi a nga nyimaka phambheni ka mina?+
20 Kutani twanani xiboho lexi Yehovha a nga xi yendla hi Edomu ni leswi a swi pimisaka hi lava tshamaka aTemani:+
Phela swinyempfani swi ta kokakokiwa.
A ta hohlotela* ndhawu leyi swi tshamaka ka yona hi mhaka ya vona.+
21 Guwa la ku wa ka vona li tsekatsekisa misava.
Ku ni xirilo!
Xi twakale ni ka Lwandle la Ku Pshuka.+
22 Phela ku fana ni gama a ta haha a ya henhla a gama a xika a ya hansi hi ku tsutsuma,+A ta pfula timpapa ta yena henhla ka Bozra.+
Hi siku lolelo mbilu ya tinhenha ta EdomuYi ta fana ni mbilu ya wansati lweyi a psalaka.”*
23 Ka Damaxka+ a li:
“Amati+ na Arpadi va danisiwile,Hikusa va twe marungula ya ku biha.
Va hele ntamu hi mhaka ya ku chava.
Lwandle li kwatile, a li miyeteki.
24 Damaxka wa chava.
A tsutsumile a baleka, kambe a chavile a nga swi tivi swaku a nga yendla yini.
A ni mahlomulu funtshi wa konya,Ku fana ni wansati lweyi a psalaka.
25 Hi mhaka muni doropa leli dzunisiwaka li nga tshikiwanga,Doropa leli ku tsakiwaka ka lona?
26 Hikusa madjaha ya yena ma ta dlayiwa ka ndhawu ya ku pfuleka leyi nga xikarhi ka doropa,Ni masonchwa hinkwawu ma ta helisiwa hi siku lolelo,” ku vula Yehovha murhangeli wa tintsumi.
27 “Ni ta hisa mimuru ya Damaxka hi ndzilu,Wu ta hisa maprediyu* lawa ma nga ni mimuru ya ku tiya ya Benadadi.”+
28 Ka Kedari+ ni mimfumu ya Azora, leyi Hosi Nebukadinazara* hosi ya le Babilona a nga yi hlula, Yehovha a li:
“Sukani mi nyima mi ya aKedari,Mi fika mi helisa vana va le Wuxeni.
29 Matende ya vona ni mintlhambi ya vona swi ta tekiwa,Tipanu ta matende ya vona ni swilo swa vona hinkwaswu.
Makamela ya vona ma ta khayimiwa,Va ta va huwelela va ku: ‘Hinkwaku vanhu va chava!’”
30 “Balekani mi ya kule!
Fambani mi ya tshama ka mimhakwa, n’wina vanhu va le Azora,” ku vula Yehovha.
“Hikusa Nebukadinazara* hosi ya le Babilona a mi yendlele planu,*Planu la ku lwa na n’wina.”
31 “Sukani mi nyima, mi ya lwa ni tiko leli nga ni ku rhula,Leli nga vhikeliwa kahle!” ku vula Yehovha.
“A li na tinyanghwa kumbe swa ku khiya hi swona; va tshama na va li voxe.
32 Makamela ya vona ma ta tekiwa,Ni swifuyu swa vona swa swinyingi.
Lava tsemetaka misisi leyi nga matlhelweni ka ximombo,+Ni ta va hangalasela ka matlhelo hinkwawu,Ni ta va tisela khombo leli taka hi ka matlhelo hinkwawu,” ku vula Yehovha.
33 “Azora a ta va ndhawu leyi ku tshamaka timbyana ta khwati,*A ta va ndhawu leyi nga ta tshama na yi hohlokelile.*
A ku na munhu lweyi a nga ta tshama ka yena.”
34 Lawa i marito lawa Yehovha a nga ma byela muprofeta Yeremiya hi ta Elamu+ nkama Zedekiya+ hosi ya le Yuda a nga sungula ku fuma, a te:
35 “Mina Yehovha murhangeli wa tintsumi ni li: ‘Ni tshova ligubu la Elamu,+ ku nga xihlovo* xa matimba ya vona.
36 Ni ta hlasela Elamu hi 4 wa mimoya leyi taka hi ka matlhelo hinkwawu,* ni ta mu hangalasa a ya ka tindhawu hinkwatu.* A ku na tiko leli Vaelamu lava nga hangalaseliwa va nga ta kala va nga yi ka lona.’”
37 “Ni ta yendla swaku Vaelamu va chava valala va vona ni lava lavaka ku va dlaya; ni ta va tisela khombo na ni kwatile swinene,” ku vula Yehovha. “Ni ta va rhumela xipada ku fikela loko ni va helisa.”
38 “Se ni ta veka xitshamu xa mina xa wuhosi aElamu+ funtshi ni ta helisa hosi ni varhangeli va yona,” ku vula Yehovha.
39 “Kambe ka masiku ya wugamu, ni ta hlengeleta swikarawa swa Elamu,” ku vula Yehovha.
Tinhlamunselu ta le hansi
^ Kumbexana: “guwa la tinsimu ta nyimpi”.
^ Kumbe: “tinguvu”.
^ Kumbe: “ka swib’ala swa tinyempfu leswi nga yakiwa hi maribye”.
^ Ku nga mimbhovo leyi kumekaka ka tintshava kumbe ka maribye.
^ Kumbe: “ya ku khwadja.”
^ Kumbe: “lava va kalaka va nga na vapapayi”.
^ Kumbe: “marhumbi.”
^ Ku nga muxaka wa xinyanyani.
^ Kumbe: “A ta yendla yi va rhumbi”.
^ Kumbe: “velekaka.”
^ Kumbe: “swihondzo; switezi”.
^ Hi Xiheberu: “Nebukadretsara”. Ku nga matsalelo ya ku hambana.
^ Hi Xiheberu: “Nebukadretsara”. Ku nga matsalelo ya ku hambana.
^ Kumbe: “kungu”.
^ Lani ku vulavuliwa hi timhungubye.
^ Kumbe: “na yi li rhumbi.”
^ Hi Xiheberu: “masungulo ya”.
^ Hi Xiheberu: “hi 4 wa mimoya ku sukela ka 4 wa tiponta ta matilo”.
^ Hi Xiheberu: “ka mimoya hinkwayu leyi.”