Yeremiya 50:1-46
50 Yehovha a vule leswi hi Babilona,+ tiko la Vakalidiya, hi ku tirhisa muprofeta Yeremiya, a te:
2 “Swi vuleni xikarhi ka matiko, mi swi huwelela.
Nyimisani mhandzi ya ku markara hi yona mi swi huwelela.
Mi nga tumbeti nchumu!
Vulani mi ku: ‘Babilona a khomiwile.+
Bel* a danisiwile.+
Merodaki wa chava.
Swifaniso swa yena swi danisiwile.
Swikwembu swa yena swa ku nyenyentsa* swa chava.’
3 Hikusa a teliwe hi tiko la le norte.*+
Li fika li yendla swaku tiko la yena li va nchumu xa ku nyenyentsa;A ku na munhu lweyi a tshamaka ka yena.
Vanhu ni swiharhi va balekile;Va fambile.”
4 “Ka masiku wolawo ni ka nkama wolowo,” ku vula Yehovha, “vanhu va le Israyele ni va le Yuda va ta hlengeletana.+ Va ta famba na va rila+ funtshi va ta lavetela Yehovha Xikwembu xa vona.+
5 Va ta vutisana ndlela ya ku ya Siyoni, na tinghohe* ta vona ti txuvuke ka tlhelo la Siyoni,+ va ku: ‘Tanani hi ta yendla ntwananu na Yehovha wa ku a wu nga ta hela naswona a wu nga ta khohlwiwa.’+
6 Vanhu va mina va ve ntlhambi wa tinyempfu ta ku lahleka.+ Varisi va vona va va zulisile.*+ Va va lahlekise ka tintshava, va zula ka tintshava ni le ka maganga. Va khohlwe ndhawu ya vona ya ku humula ka yona.
7 Hinkwavu lava va nga va kuma va va dlayile+ naswona valala va vona va te: ‘A hi na nandzu hikusa va djohele Yehovha, ku nga ndhawu ya vona ya ku tshama ka yona ya ku lulama ni ntshembo wa vavhovho va vona, Yehovha.’”
8 “Balekani Babilona,Mi huma ka tiko la Vakalidiya,+Mi fana ni swiharhi leswi kongomisaka ntlhambi.
9 Hikusa ni nyimisa Babilona ni ku mu tiselaTinxaka ta tinyingi leti ti taka hi ka tiko la le norte.+
Ti ta ta na ti lunghekele ku lwa na yena;A ta khomiwa kolanu.
Mimpaxwa* ya tona yi fana ni ya nhenhaLeyi yendlaka swaku ku sala na ku nga na vana;+A yi tlheli na yi nga tirhanga nchumu.
10 Vakalidiya va ta tekeliwa minchumu ya vona.+
Hinkwavu lava va teketelaka minchumu ya vona va ta xurha swa wugamu,”+ ku vula Yehovha.
11 “Hikusa mi tame mi tsaka+ ni ku ba minkulungwaniNkama mi tekaka tshomba la mina.+
Mi tame mi tlulatlula ku fana ni xihon’wani* ka byanyi,Mi tame mi vanga guwa ku fana ni makavhalu.
12 Mamani wa n’wina a danisiwile.+
Mamani wa n’wina lweyi a nga mi psala* a hele ntamu.
Yingisani! Mamani wa n’wina a nga na lisima ka matiko,I mananga lawa ma kalaka ma nga na mati ni ndhawu ya ku woma.+
13 A ku nga ta tshama munhu aBabilona hi mhaka ya ku kwata ka Yehovha;+A ta hohlokela* hi ku helela.+
Mun’wani ni mun’wani lweyi a hundzaka Babilona a ta mu txuvuka hi ku chava,A ba noti hi mhaka ya makhombo ya yena hinkwawu.+
14 Tanani Babilona mi tilunghiselela ku lwa na yena matlhelo hinkwawu,N’wina hinkwenu lava tirhisaka ligubu.
Mu txopeni, mi nga siyi mpaxwa ni wun’we,+Hikusa a djohele Yehovha.+
15 Mu beleni guwa la nyimpi matlhelo hinkwawu.
A tinyikelile.
Mapilari ya yena ma wile, mimuru ya yena yi wisiwile,+Hikusa Yehovha o hakelisa.+
Na n’wina hakelisani ka yena.
Mu yendleni swa ku fana ni leswi a nga mi yendla swona.+
16 Dlayani mubyali aBabilonaNi lweyi a tirhisaka sikelo* hi nkama wa ku tshovela.+
Mun’wani ni mun’wani a ta tlhelela ka vanhu va tiko la yena hi mhaka ya xipada xa mona,Naswona mun’wani ni mun’wani a ta baleka a ya ka tiko la yena.+
17 “Vayisrayele i tinyempfu ta ku hangalakela.+ Va hangalasiwile hi tinghonyama.+ Ku sungule hosi ya le Asiriya yi va helisa,+ ku gama ku landzela Nebukadinazara* hosi ya le Babilona lweyi a nga phorhela marhambu ya vona.+
18 Kutani Yehovha murhangeli wa tintsumi, Xikwembu xa Israyele a li: ‘Ni ta khatisa hosi ya le Babilona ni tiko la yona ku fana ni leswi ni nga swi yendla ka hosi ya le Asiriya.+
19 Ni ta vuyisela Israyele ka ndhawu leyi a a dlela ka yona,+ a ta dla byanyi aKarmeli ni le Baxani+ naswona a ta xurha ka tintshava ta Efrayimi+ ni ta Jiliyadi.’”+
20 “Ka masiku wolawo ni ka nkama wolowo,” ku vula Yehovha,“Nandzu wa Israyele wu ta kambisisiwa,Kambe a wu nga ta kumiwa,Ni swidjoho swa Yuda a swi nge kumiwi,Hikusa lava ni va tshikaka va sala ni ta va rivalela.”+
21 “Famba u ya lwa ni tiko la Meratayimi ni lava tshamaka Pekodi.+
A va dlayeteliwe va helisiwa swa wugamu,” ku vula Yehovha.
“Yendla hinkwaswu leswi ni nga ku rhuma swona.
22 Ku ni guwa la nyimpi atikweni,Khombo lalikulu.
23 Vona leswi hamela ya misava hinkwayu yi nga tsemisiwa xiswona ni ku tshovisiwa xiswona!+
Vona leswi Babilona a nga txintxisa swona a va nchumu xa ku chavisa xikarhi ka matiko!+
24 Ni ku rhiyele ntlhamu naswona u phasiwile, wena Babilona,Kambe a wu nga swi tivi.
U kumiwile u khomiwa,+Hikusa u lwe na Yehovha.
25 Yehovha a pfule yindlo ya yena ya matlharhiA humesa matlharhi ya ku kwata ka yena.+
Hikusa Hosi Leyikulu, Yehovha murhangeli wa tintsumi a ni ntirhoKa tiko la Vakalidiya.
26 Tanani hi ka tindhawu ta le kule mi ta lwa na yena.+
Pfulani matshala ya yena.+
Mu hlengeleteleni ku fana ni tinyandza ta trigu.
Mu heliseni hi ku helela.+
Ku nga sali munhu ka yena.
27 Dlayetelani swihon’wani swa yena hinkwaswu swa xinuna;+Swi tekeni swi ya dlayiwa.
Khombo ka swona hikusa siku la swona li fikile,Nkama wa ku yavanyisiwa ka swona!
28 Ku ni guwa la lava va balekaka,Lava balekaka ka tiko la Babilona,Swaku va ya twalisa ku hakelisa ka Yehovha Xikwembu xa hina aSiyoni,Ku hakelisa hi mhaka ya tempele ya yena.+
29 Vitanani lava txopaka mimpaxwa swaku va ta lwa na Babilona,Hinkwavu lava tirhisaka ligubu.+
Gwimbani matende mi mu rhendzela matlhelo ya yena hinkwawu; ku nga baleki munhu.
Mu hakeliseni hi ku ya hi mintirho ya yena.+
Mu yendleni swa ku fana ni leswi a nga swi yendla.+
Hikusa a titlakusile ka Yehovha,Ka Mukwetsimi wa Israyele.+
30 Se madjaha ya yena ma ta dlayiwa ka ndhawu ya yena ya ku pfuleka leyi nga xikarhi ka doropa,+Ni masonchwa ya yena hinkwawu ma ta helisiwa* hi siku lolelo,” ku vula Yehovha.
31 “Waswivo! Ni lwa na wena,+ wena u ni terekelaka,”+ ku vula Hosi Leyikulu, Yehovha murhangeli wa tintsumi,“Hikusa siku la wena li fanele li fika, nkama lowu ni nga ta ku khatisa hi wona.
32 Wena u ni terekelaka, u ta tigumula u wa,A ku nga ta va ni munhu wa ku ku pfuxa.+
Ni ta hisa madoropa ya wena hi ndzilu,Wu ta hisa hinkwaswu leswi nga matlhelweni ka wena.”
33 Yehovha murhangeli wa tintsumi a li:
“Vanhu va le Israyele ni va le Yuda va xanisiwa,Naswona hinkwavu lava va va yendlaka swikarawa va va khomile.+
Va yala ku va tshika va famba.+
34 Kambe Muponisi wa vona a ni matimba.+
Vito la yena i Yehovha murhangeli wa tintsumi.+
Phela a ta nyimelela mhaka ya vona atribunali,+Swaku a humulisa tiko+Ni ku va tisela khombo lava tshamaka Babilona.”+
35 “Ku ni xipada lexi lwaka ni Vakalidiya,” ku vula Yehovha,“Xi lwa ni lava tshamaka Babilona, varhangeli va kona ni vanhu va yena va ku tlhariha.+
36 Ku ni xipada lexi lwaka ni vaprofeta va mavunhwa naswona va ta yendla swilo hi ndlela ya wuphunta.
Ku ni xipada lexi lwaka ni tinhenha ta yena naswona ti ta chava.+
37 Ku ni xipada lexi lwaka ni makavhalu ya vona ni tinyolo* ta vona ta nyimpi,Xi lwa ni vanhu lava taka hi ka matiko man’wani lava nga xikarhi ka yena,Va ta fana ni vavasati.+
Ku ni xipada lexi lwaka ni xuma xa yena funtshi xi ta tekiwa.+
38 Mati ya yena ma ta wonhiwa naswona ma ta psha.*+
Hikusa i tiko la swifaniso swa ku vatliwa,+Va tshamela ku dungeka tinhloko hi mhaka ya swilo swa ku chavisa leswi va swi vonaka.
39 Kutani swiharhi swa le mananga swi ta tshama ni swiharhi leswi rilaka,Ku ta tshama tiyintxa* ka yena.+
A ku nge he tlheli ku tshamiwa ka yena,A ku nge he tshami munhu ka yena hi masiku ni masiku.”+
40 “Ku fana ni leswi Xikwembu xi nga helisa Sodoma na Gomora+ ni madoropa lawa a ma li kusuhi na kona,”+ ku vula Yehovha, “a ku na munhu lweyi a nga ta tshama kona.+
41 Waswivo! Ku ta vanhu va le norte;Ku ta pfuxiwa tiko lalikulu ni tihosi tatikulu+Leti taka hi ka tindhawu ta le kule swinene ta misava.+
42 Va khome ligubu ni tlharhi.+
Va ni mona naswona a va nge vi ni timpsalu.+
Guwa la vona li fana ni lwandle leli nga kwata,+Nkama va tsutsumaka hi makavhalu ya vona.
Va tilunghiselela ingaku vo va munhu mun’we swaku va lwa na n’wina, n’wina vanhu* va Babilona.+
43 Ku ni leswi hosi ya le Babilona yi nga swi twa hi vona,+Se mavoko ya yona ma hela ntamu.+
Se yi sungula ku twa ku vava,Ku fana ni ku vava loku twiwaka hi wansati lweyi a psalaka.
44 “Phela ku fana ni nghonyama leyi taka na yi huma hi ka makhwati ya ku tlhuma kusuhi ni Yordani, ku ta ta mun’wani a fika a hlasela ndhawu ya ku lusela ka yona leyi nga hlayiseka, kambe hi ku tsopeta ka tihlo ni ta yendla swaku va mu baleka. Ni ta mu vekela murhangeli lweyi ni nga mu langa.+ Hikusa i mani lweyi a fanaka na mina naswona i mani lweyi a nga ni sivelaka? Hi wini mulusi lweyi a nga nyimaka phambheni ka mina?+
45 Kutani twanani xiboho lexi Yehovha a nga xi yendla hi Babilona+ ni leswi a swi pimisaka hi tiko la Vakalidiya.
Phela swinyempfani swi ta kokakokiwa.
A ta hohlotela* ndhawu leyi swi tshamaka ka yona hi mhaka ya vona.+
46 Misava yi ta tsekatseka hi mhaka ya guwa la ku khomiwa ka Babilona,Ku ta twakala xirilo xikarhi ka matiko.”+
Tinhlamunselu ta le hansi
^ Ku nga xikwembu xa Babilona.
^ Rito la Xiheberu li nga tirhisiwa lani, li nga ha fambisana ni rito leli vulaka “chaka la munhu kumbe la xiharhi,” funtshi li tirhiseliwa ku kombetela ka xiyeyiso.
^ Kumbe: “n’walungu.”
^ Kumbe: “makara ya”.
^ Kumbe: “va va yendle va pepetseka.”
^ Kumbe: “Maflexa”.
^ Kumbe: “thokazi”.
^ Kumbe: “veleka”.
^ Kumbe: “va rhumbi”.
^ Ku nga nchumu lexi tirhisiwaka ku tsema byanyi kumbe ku tshovela hi xona.
^ Hi Xiheberu: “Nebukadretsara”. Ku nga matsalelo ya ku hambana.
^ Hi Xiheberu: “miyetiwa”.
^ Kumbe: “tin’qolo; makalichi”.
^ Kumbe: “khwa.”
^ Kumbe: “avestruzes”.
^ Hi Xiheberu: “ntombhi ya Babilona”.
^ Kumbe: “A ta yendla yi va rhumbi”.
