Yeremiya 52:1-34
52 Zedekiya+ a a ni 21 wa malembe nkama a nga va hosi funtshi a fume 11 wa malembe aYerusalema. Vito la mamani wa yena a ku li Amutala+ n’wana wa Yeremiya wa le Libina.
2 A tame a yendlela Yehovha swa ku biha, hi ku yendla hinkwaswu leswi Yoyakimi a nga swi yendla.+
3 Leswi swi yendleke aYerusalema ni le Yuda hi mhaka ya leswi Yehovha a a kwatile hintamu, a za a va susa phambheni ka yena.+ Se Zedekiya a djikela hosi ya Babilona.+
4 Hi lembe la wu 9 la ku fuma ka Zedekiya, hi siku la wu 10 ka wheti ya wu 10, Nebukadinazara hosi ya Babilona a te ni masonchwa ya yena hinkwawu swaku a ta lwa na Yerusalema. Va fike va gwimba matende va gama va sungula ku yaka muru va pfala matlhelo hinkwawu ya doropa.+
5 A pfale matlhelo hinkwawu ya doropa anze hi lembe la wu 11 la ku fuma ka Hosi Zedekiya.
6 Hi siku la wu 9 ka wheti ya wu 4,+ ku ve ni ndlala yayikulu hintamu ka doropa va za vanhu va sala na va nga ha na swakudla atikweni.+
7 Hi wugamu ku boxiwa muru wa doropa, kutani masonchwa hinkwawu ma baleka doropeni niwusiku ma huma hi nyanghwa lowu nga xikarhi ka mimuru yimbirhi akusuhi ni jardim la hosi; leswo swi yendleke hi nkama lowu Vakalidiya a va pfale matlhelo hinkwawu ya doropa; se masonchwa ma famba hi ndlela leyi yi yaka aAraba.+
8 Kambe masonchwa ya Vakalidiya ma hlongolisa Zedekiya,+ ma fika ma mu kuma amananga ya Yeriko, masonchwa ya yena hinkwawu ma gama ma baleka ma mu siya.
9 Kutani ma khoma hosi ma yi yisa ka hosi ya Babilona aRibala atikweni la Amati, kutani yi fika yi yavanyisiwa.
10 Se hosi ya Babilona yi dlaya vana va Zedekiya na a swi vona, yi dlaya ni varhangeli hinkwavu va Yuda aRibala.
11 Yi tlhela yi mu dlaya matihlo Zedekiya,+ yi gama yi mu boha hi machini ya kobre, yi mu yisa Babilona yi fika yi mu peta djele anze a fa.
12 Hi siku la wu 10 ka wheti ya wu 5, ku nga lembe la wu 19 la ku fuma ka Nebukadinazara hosi ya Babilona, Nebuzaradani murhangeli wa vagwardu, lweyi a a tirhela hosi ya Babilona a ye Yerusalema.+
13 A fike a hisa yindlo ya Yehovha,+ ni yindlo ya wuhosi ku patsa ni tiyindlo hinkwatu leti a ti li Yerusalema; a tlhela a hisa ni tiyindlo hinkwatu tatikulu.
14 Masonchwa hinkwawu ya Vakalidiya lawa a ma li ni murhangeli wa vagwardu ma dilize mimuru leyi a yi pfale matlhelo hinkwawu ya Yerusalema.+
15 Nebuzaradani lweyi a a li murhangeli wa vagwardu a teke swisiwana swin’wani ni vanhu hinkwavu lava a va salile ka doropa a va yisa awukaraweni. A tlhela a teka vanhu hinkwavu lava va nga tinyikela ka hosi ya Babilona ni vanhu hinkwavu lava kotaka ku yendla ntirho wa mavoko.+
16 Kambe a siye swisiwana atikweni swaku swi sala swi rima masimu ya mawuvha swi tlhela swi va swikarawa.+
17 Vakalidiya va fayetele mapilari ya kobre+ ya yindlo ya Yehovha, swikarinyani swa kobre+ ni tanki la kobre+ leswi a swi li ka yindlo ya Yehovha, va gama va teka kobre la kona hinkwalu va famba na lona aBabilona.+
18 Va tlhele va teka swa ku wolela nkuma, mafoxolo, swa ku tima hi swona ndzilu, matijela,+ tikopo+ ni swibya hinkwaswu swa kobre leswi a swi tirhisiwa atempeleni.
19 Murhangeli wa vagwardu a teke mabaziya,+ swa ku chela ka swona ndzilu, matijela, swa ku wolela nkuma, swa ku tlhoma swa ku voninga hi swona,+ tikopo ni matijela lawa ma nga yendliwa hi woru la lisima ni prata la lisima.+
20 A kobre leli ku nga yendliwa hi lona mapilari mambirhi, tanki la mati, 12 wa swifaniso swa tihomu+ leswi tanki a li vekiwe henhla ka swona, ni swikarinyani leswi Hosi Solomoni a nga swi yendla swaku swi tirhisiwa ka yindlo ya Yehovha, a li li linyingi hintamu funtshi a swi nga koteki ku li peza.
21 Pilari lin’wani ni lin’wani a li lehe 8 wa mametru,* li yanama 5 wa mametru;*+ a ma kule kolomuyani ka 7 wa masentimetru* naswona a ma nga na nchumu phakati.
22 Swa ku sasekisa hi swona leswi a swi li henhla ka pilari na swona a swi yendliwe hi kobre funtshi a swi lehe 2,2 wa mametru;*+ a maredi ni swifaniso swa ma romã leswi a swi li ka swa ku sasekisa hi swona leswi a swi li henhla ka mapilari na swona a swi yendliwe hi kobre. Pilari la wumbirhi leli a li fana ni la ku sungula na lona a li ni swifaniso swa ma romã.
23 A ku ni 96 wa swifaniso swa ma romã amatlhelweni; swifaniso hinkwaswu swa ma romã a swi li 100 naswona a swi li matlhelweni ka redi.+
24 Murhangeli wa vagwardu a tlhele a teka Seraya+ lweyi a a li muprista wamukulu, na Sofaniya+ lweyi a a li muprista wa wumbirhi ku patsa ni vagwardu vanharhu lava a va vonelela tinyanghwa.+
25 A teke munhu mun’we lweyi a a tirha ka yindlo ya wuhosi lweyi a a rhangela masonchwa, 7 wa vavanuna lava a va li vanghanu va hosi lava nga kumiwa ka doropa, a tlhela a teka ni sekretariyu* wa murhangeli wa masonchwa lweyi a a hlengeleta vanhu swaku va ya wusonchweni ni 60 wa vavanuna lava nga kumiwa adoropeni.
26 Nebuzaradani lweyi a a li murhangeli wa vagwardu a va tekile a famba na vona ka hosi ya Babilona aRibala.
27 Hosi ya Babilona yi fike yi va dlaya aRibala+ ka tiko la Amati. Se Vayuda va tekisiwe swoleswo va ya awukaraweni.+
28 Lava i vanhu lava Nebukadinazara* a nga va yisa awukaraweni: Hi lembe la wu 7 la ku fuma ka yena, a teke 3.023 wa Vayuda.+
29 Hi lembe la wu 18 la ku fuma ka Nebukadinazara,*+ ku tekiwe 832 wa vanhu aYerusalema.
30 Hi lembe la wu 23 la ku fuma ka Nebukadinazara,* Nebuzaradani murhangeli wa vagwardu a teke 745 wa Vayuda a va yisa awukaraweni.+
Vanhu hinkwavu lava nga yisiwa awukaraweni a va li 4.600.
31 Hi siku la wu 25 ka wheti ya wu 12 ka lembe la wu 37 na Yoyakini+ hosi ya Yuda a li wukaraweni, Evhil-Merodaki a vekiwile swaku a va hosi ya le Babilona, hi lembe lolelo a humese Yoyakini hosi ya Yuda adjele.+
32 A ve ni timpsalu ka yena se a mu tlakusa henhla ka tihosi letin’wani leti a ti li na yena aBabilona.
33 Se Yoyakini a nyikiwa mpahla ya nyuwani swaku a txintxa leyi a a yi yambala adjele funtshi a a hamba a dla ka meza wa hosi anze a fa.
34 A a nyikiwa swakudla leswi taka hi ka hosi ya le Babilona siku ni siku, wutomi la yena hinkwalu anze a fa.
Tinhlamunselu ta le hansi
^ Hi Xiheberu: “18 wa swisungunu”. Vona Xiyengetelo B14.
^ Hi Xiheberu: “12 wa swisungunu.” Vona Xiyengetelo B14.
^ Hi Xiheberu: “ku kula ka lona a li ringana ni 4 wa titiho loko ti tlhanganisiwile”. Vona Xiyengetelo B14.
^ Hi Xiheberu: “5 wa swisungunu.” Vona Xiyengetelo B14.
^ Kumbe: “matsalana; mabalani”.
^ Hi Xiheberu: “Nebukadretsara”. Ku nga matsalelo ya ku hambana.
^ Hi Xiheberu: “Nebukadretsara”. Ku nga matsalelo ya ku hambana.
^ Hi Xiheberu: “Nebukadretsara”. Ku nga matsalelo ya ku hambana.
