Yeremiya 7:1-34
7 Yehovha a vulavula na Yeremiya a ku:
2 “Nyima ka swipfalu swa yindlo ya mina Yehovha u huwelela mahungu lawa, u ku: ‘Yingisani leswi Yehovha a swi hlayaka n’wina vanhu hinkwavu va Yuda, n’wina mi nghenaka hi swipfalu leswi swaku mi ya khizamela Yehovha.
3 Yehovha murhangeli wa tintsumi, Xikwembu xa Israyele, a li: “Txintxani mahanyelo ya n’wina ni leswi mi swi yendlaka, se ni ta mi tshika swaku mi tama mi tshama ka ndhawu leyi.+
4 Mi nga tshembeni marito ya mavunhwa se mi ku: ‘Leyi i* tempele ya Yehovha, i tempele ya Yehovha, i tempele ya Yehovha!’+
5 Hikusa loko mo txintxa mahanyelo ya n’wina hikakunene, mi txintxa leswi mi swi yendlaka, mi tlhela mi yavanyisa hi ndlela ya ku lulama loko munhu a ni timhaka ni munhu mun’wani;+
6 loko mo kala mi nga hluphi vanhu lava taka hi ka matiko man’wani, vana lava kalaka va nga na vapsali ni vavasati lava va nga feliwa hi vavanuna;+ ni loko mo kala mi nga dlayi vanhu va ku kala va nga na nandzu ka ndhawu leyi; mi tlhela mi nga gandzeli swikwembu swin’wani swaku mi nga kumiwi hi khombo;+
7 ni ta mi tshika mi tama mi tshama ka ndhawu leyi, ka tiko leli ni nga nyika vavhovho va n’wina swaku va tshama hi nkama wa ku kala wu nga heli.”’”
8 “Kambe mi tshemba marito ya mavunhwa,+ phela a ma nga ta mi pfuna hi nchumu nikatsongo.
9 Indjhe mi nga yiva,+ mi dlaya, mi mbuyeta, mi funga mavunhwa,+ mi yendlela Bali+ magandzelo mi tlhela mi gandzela swikwembu leswi mi kalaka mi nga swi tivi,
10 mi gama mi fika mi nyima phambheni ka mina ka yindlo leyi, leyi vitaniwaka hi vito la mina mi ku: ‘Hi ta ponisiwa,’ hambileswi mi yendlaka minchumu hinkwayu leyi ya ku nyenyentsa?
11 Kasi a yindlo leyi, leyi vitaniwaka hi vito la mina mi yi yendle yindlo ya vayivi?+ Ni swi vonile leswi mi swi yendlaka,” ku vula Yehovha.
12 “‘Se swoswi fambani ka ndhawu ya mina aXilo,+ lani ni nga sungula ni yendla swaku vito la mina li dzunisiwa kona,+ mi ta vona leswi ni nga swi yendla hi mhaka ya swilo swa ku biha leswi nga yendliwa hi Vayisrayele ku nga vanhu va mina.+
13 Kambe mi tame mi yendla swilo leswi hinkwaswu,’ ku vula Yehovha, ‘hambileswi ni nga vulavula na n’wina hi ku phindhaphindha,* a mi yingisanga.+ Ni tame ni mi vitana kambe a mi hlamulanga.+
14 Leswi ni nga swi yendla aXilo+ ni ta swi yendla ka yindlo leyi vitaniwaka hi vito la mina,+ leyi mi yi tshembaka+ ni tlhela ni swi yendla ni ka ndhawu leyi ni nga yi nyika n’wina ni vavhovho va n’wina.
15 Ni ta mi txukumeta mi suka phambheni ka mina, ku fana ni leswi ni nga txukumeta vamakwenu va n’wina hinkwavu ku nga vatukulu hinkwavu va Efrayimi.’+
16 “Kambe wena, u nga va khongeleli vanhu lava. U nga huweleli u khongela kumbe u va kombelela ka mina,+ hikusa a ni nge ku yingisi.+
17 Wo kala u nga swi voni leswi va swi yendlaka ka madoropa ya Yuda ni ka switaratu swa Yerusalema?
18 Vana va madjaha va hlengeletela tihunyi, vapapayi va tshivela ndzilu, vavasati va pfuva mbila swaku va hamba mabolu ya gandzelo va yendlela Hosi ya Xisati ya Tilo,*+ naswona va yendla magandzelo ya vhinyu va yendlela swikwembu swin’wani swaku va ni kwatisa.+
19 ‘Indjhe hi mina va ni twisaka ku vava?’ ku hlaya Yehovha. ‘A hi vona va titwisaka ku vava va tlhela va dana?’+
20 Yehovha Hosi Leyikulu a li: ‘Ku kwata ka mina ni ta ku chululela ka ndhawu leyi,+ ahenhla ka munhu ni henhla ka xiharhi, ahenhla ka minsinya ya tiko ni henhla ka mihandzu; ku ta pfurha naswona a ku nga ta timiwa.’+
21 “Yehovha murhangeli wa tintsumi, Xikwembu xa Israyele a li: ‘Tamani mi yengesela magandzelo ya n’wina ya ku hisiwa ka magandzelo man’wani ya n’wina mi gama mi ma dla.+
22 Hikusa hi siku leli ni nga humesa vavhovho va n’wina ka tiko la Gibita, a ni vulavulanga na vona kumbe ni va byela swaku va yendla magandzelo ya ku hisiwa ni magandzelo man’wani.+
23 Kambe ni va nyike nawu lowu nge: “Yingisani leswi ni mi byelaka swona se mina ni ta va Xikwembu xa n’wina, n’wina mi ta va vanhu va mina.+ Mi fanele mi yendla hinkwaswu leswi ni mi byelaka swona swaku swi ta mi fambela kahle.”’+
24 Kambe a va pfulanga tindleve ta vona va yingisa;+ kambe va yendle leswi vona va swi pimisaka, va ve ni nkanu va yendla swa ku biha leswi nga ka timbilu ta vona+ naswona va tlhelele ndzhaku, a va yanga phambheni,
25 va yendle leswo ku sukela siku leli vavhovho va n’wina va nga huma hi lona ka tiko la Gibita anze namuntlha.+ Se a ni tshamela ku rhuma vatirheli va mina hinkwavu ku nga vaprofeta, ni va rhuma siku ni siku, hi ku phindhaphindha.*+
26 Kambe va yale ku pfula tindleve ta vona swaku va ni yingisa.+ Kambe va ve ni nkanu* naswona va yendle swa ku biha ku tlula vavhovho va vona!
27 “U ta va byela marito lawa hinkwawu,+ kambe a va nga ta ku yingisa; u ta va vitana kambe a va nga ta ku hlamula.
28 Se u ta va byela u ku: ‘Leli i tiko leli nga yala ku yingisa Yehovha Xikwembu xa lona naswona li yalile ku yingisa loko li layiwa. Ku tshembeka a ku kona hambi ku vulavula hi kona a va vulavuli hi kona.’+
29 “Tsemeta misisi ya wena ya ku leha u yi txukumeta, u yimbelela lisimu la xirilo henhla ka maganga hikusa Yehovha a va tshikile vanhu lava, lava va nga mu kwatisa.
30 ‘Hikusa vanhu va Yuda va ni djohelile,’ ku vula Yehovha. ‘Va veke swifaniso swa vona swa ku nyenyentsa leswi va swi gandzelaka ka yindlo leyi vitaniwaka hi vito la mina swaku va yi chakisa.+
31 Va yake tindhawu ta ku tlakuka ta ku gandzela ka tona ta Tofeti, ka Nkova wa N’wana wa Hinomi,*+ swaku va hisa vana va vona va madjaha ni va tintombhi hi ndzilu,+ ku nga nchumu lowu ni kalaka ni nga va byelanga swaku va wu yendla, naswona ni kalaka ni nge se tshama ni wu pimisa ka mbilu ya mina.’+
32 “‘Kambe masiku ma ta,’ ku vula Yehovha, ‘lawa ndhawu leyi yi nga ta kala yi nga ha vitaniwi Tofeti kumbe Nkova wa N’wana wa Hinomi* kambe yi ta vitaniwa Nkova wa Ku Dlaya. Va ta lahla vanhu aTofeti ku za ku nga ha sali ndhawu ya ku lahla.+
33 Se mintsumbu ya vanhu lava yi ta va swakudla swa swinyanyani ni swiharhi naswona a ku na munhu ni mun’we lweyi a nga ta swi hlongola.+
34 Ni ta helisa guwa la ku tsaka ni rito la wanuna lweyi a tekaka ni la wansati lweyi a tekiwaka+ ka madoropa ya Yuda ni ka switaratu swa Yerusalema, hikusa tiko leli li ta wonheteliwa.’”*+
Tinhlamunselu ta le hansi
^ Hi Xiheberu: “Leti i”. Ku hlayiwa tiyindlo hinkwatu leti a ti li kona ka tempele.
^ Hi Xiheberu: “a ni pfuka nimpundzu ni vulavula”.
^ I vito la xikwembu xa xisati lexi a xi gandzeliwa hi Vayisrayele lava va nga tshika Xikwembu; swi nga yendleka a xikwembu lexi xa xisati a va pimisa swaku xi yendla vanhu va kota ku psala.
^ Hi Xiheberu: “siku ni siku a ni pfuka nimpundzu ni rhuma.”
^ Hi Xiheberu: “va tiyise tinhamu ta vona”.
^ Vona Ntlhamuselo ka rito “Gehena”.
^ Vona Ntlhamuselo ka rito “Gehena”.
^ Kumbe: “li ta va rhumbi.”