Yobo 15:1-35
15 Elifazi+ wa Mutemani a hlamula a ku:
2 “Munhu wa ku tlhariha a nga hlamula hi marito ya ku kala ma nga pfuni nchumu,Kumbe a nga tata mbilu ya yena hi ku navela ka ku biha?*
3 Ku laya hi marito ntsena a swi pfuni nchumu,Ni ku vulavula ntsena a swi pfuni nchumu.
4 Hikusa u yendla swaku Xikwembu xi nga hloniphiwi,Naswona u pfalela van’wani swaku va nga pimisi hi Xikwembu.
5 Hikusa leswi u swi vulaka u xengeteliwa hi xidjoho xa wena,Naswona u langa mavulavulelo ya wukanganyisi.
6 Nomo wa wena hi wona wu ku yavanyisaka, a hi mina;Nomo wa wena wa ku kaneta.+
7 Ko va wena munhu wa ku sungula a psaliwa,Kumbe u psaliwe na maganga ma nga se va kona?
8 U yingisela swihundla swa Xikwembu,Kumbe u tivona na ku li wena ntsena lweyi a nga tlhariha?
9 I yini lexi u xi tivaka lexi hina hi kalaka hi nga xi tivi?+
I yini lexi u xi twisisaka lexi hina hi kalaka hi nga xi twisisi?
10 Hi ni vanhu lava nga ni misisi ya ku basa ni lava nga kula,+Vavanuna lava nga vakulu hintamu ku tlula papayi wa wena.
11 Ku tiyisiwa hi Xikwembu a swi yeneli,A swi yeneli loko va vulavula na wena va ku tiyisa?
12 Hi mhaka muni u pfumela ku kongomisiwa hi mbilu ya wena,Naswona hi mhaka muni matihlo ya wena ma tale hi ku kwata?
13 Hikusa u kwatele Xikwembu,Hi leswo swi ku yendlaka u vulavula hi ndlela leyi.
14 Kasi munhu o va yini swaku a nga pfumala nandzu,Kumbe munhu lweyi a nga psaliwa hi wansati o va yini swaku a nga va munhu wa ku lulama?+
15 Phela a xi va tshembi vakwetsimi va xona,Hambi hi matilo a ma basanga ka matihlo ya xona.+
16 A ha ha hlayi munhu lweyi a nyenyentsaka, lweyi a kanganyisaka,+Lweyi a lavaka ku yendla swilo swa ku biha ku fana ni leswi munhu a ma lavisaka swona mati loko a twa torha!
17 Ni yingise; ni ta ku byela!
Ni ta ku byela leswi ni nga swi vona,
18 Leswi vanhu va ku tlhariha va nga swi twa ka vapapayi va vona,+Swilo leswi va kalaka va nga swi fihlanga.
19 Hi vona ntsena va nga nyikiwa tiko,A ku na munhu wa ku ta lweyi a nga hundza hi ka vona.
20 Munhu wa mona lweyi a yendlaka swa ku biha wa hlupheka masiku ya yena hinkwawu,A vona swikarhatu wutomi la yena hinkwalu.
21 A ta twa guwa la ku chavisa;+Hi nkama wa ku rhula valala va ta lwa na yena.
22 A nga swi tshembi swaku a ta wu baleka munyama;+A nyimeliwe hi xipada.
23 Wa kayakaya a lava swakudla, swi kwini?
A swi tiva kahle swaku siku la munyama li kola kusuhi.
24 Swikarhatu ni ku hela ntamu swi tshamela ku mu chavisa;Swi mu heta ntamu ku fana ni hosi leyi nga tilulamisela ku lwa.
25 Hikusa a tlakusa voko la yena swaku a lwa ni Xikwembu,A zama ku lwa* ni Lweyi Wa Matimba Hinkwawu;
26 A tiwomisa nhloko a tsutsumela ku ya lwa na Yena,A khome xivhikelo xa yena xa ku tiya;
27 Nghohe* ya yena yi nonile,A ni khwirhi lalikulu;
28 A tshama ka madoropa lawa ma nga ta helisiwa,Ka tiyindlo leti vanhu va nga ta kala va nga ha tshami ka tona,Leti nga ta va swidulu swa maribye.
29 A nge ganyi naswona swilo swa yena a swi nge yengeteleki,Swilo swa yena a swi nge tali swi hangalaka atikweni.
30 A nge wu baleki munyama;Ndzilu wu ta womisa xigadjani xa yena,Naswona a ta helisiwa loko Xikwembu xi fufuta moya.+
31 A nga fanelanga a djikisiwa a tshemba leswi kalaka swi nga pfuni nchumu,Hikusa a ta kuma swa ku kala swi nga pfuni nchumu;
32 Swi ta yendleka siku la yena li nga se fika,Naswona tigadja ta yena a ti nge hluki.+
33 A ta fana ni nsinya wa mawuvha lowu wisaka mawuvha lawa ma kalaka ma nga wupfanga,A tlhela a fana ni nsinya wa mawolivhera lowu wu wisaka swiluva.
34 Hikusa nhlengeletanu ya vanhu lava kalaka va nga hloniphi Xikwembu a yi pfuni nchumu,+Ndzilu wu ta hisa matende ya vanhu lava kanganyisaka.
35 Va pimisa swa ku biha, va gama va yendla swa ku biha,Timbilu ta vona ti tshamela ku pimisa swa ku biha.”
Tinhlamunselu ta le hansi
^ Kumbe: “a tata khwirhi la yena hi moya wa le wuxeni?”
^ Kumbe: “ku hlula”.
^ Kumbe: “Kara la”.
