Yobo 29:1-25
29 Yobo a tama a vulavula a ku:
2 “Loko a no tlhelela ka tiwheti leti nga hundza,Ka masiku lawa a ni vhikeliwa hi Xikwembu,
3 Nkama a xi voningela nhloko ya mina hi xa ku voninga hi xona xa xona,Nkama a xi ni voningela swaku ni kota ku famba ka munyama,+
4 Nkama a na ha ni matimba,Nkama a na ha li munghanu wa Xikwembu,+
5 Nkama Lweyi Wa Matimba Hinkwawu a ha li na mina,Ni nkama lowu a na ha li ni vana* va mina,
6 Nkama a na ha hlamba minenge hi mantega,Maribye ma ni humesela mafurha ya manyingi,+
7 Nkama a na ha ya ka nyanghwa wa doropa+Ni fika ni tshama ka tindhawu ta ku pfuleka leti vanhu va rhandzaka ku tshama ka tona* ka doropa,+
8 Loko vafana va ni vona, a va ni nyisela,*Hambi ku li lava nga guga a va sekeleka va nyima.+
9 Varhangeli a va tshika ku khuluma;A va tipfala minomo hi mavoko.
10 Lava hloniphiwaka a va miyela va ku whii;Lirimi la vona a li tata nomo.*
11 Lava a va ni twa a va vulavula kahle hi mina,Ni lava a va ni vona a va ni fakazela.
12 Hikusa a ni pfuna xisiwana lexi kombelaka ku pfuniwa,+Ni n’wana lweyi a kalaka a nga na vapsali* ni hinkwavu lava a va nga na wa ku va pfuna.+
13 A ni katekisiwa hi lweyi a nga kusuhi ni ku fa,+A ni yendla swaku wansati lweyi a nga feliwa hi nuna a tsaka.+
14 A ni yambala ku lulama;Ku lulama ka mina a ku fana ni mpahla ni xilembe.*
15 Ni ve matihlo ka lava nga fa matihloNi minenge ka lava nga limala.
16 A ni li papayi wa swisiwana;+A ni kambisisa mhaka ya lweyi ni kalaka ni nga mu tivi.+
17 A ni tshova tinhlaya* ta lweyi a yendlaka swa ku biha,+Ni mu tekela leswi nga ka nomo wa yena.
18 A ni hamba ni ku: ‘Ni ta fela kaya ka mina,+Ni ta hanya masiku ya manyingi ku fana ni swiribyani swa misava.
19 Timintsu ta mina ti ta nava ti za ti ya fika ka mati,Ni mberha* yi ta heta wusiku hinkwalu ka tigadja ta mina.
20 Vanhu va ta tama va ni hlonipha,Ni ligubu leli ni nga li khoma a li nga ta tshika ku txopa.’
21 Vanhu a va miyela va ku whii,Va nyimela ku twa leswi a ni ta va byela swona.+
22 Loko ni gama ku khuluma a va nga ha na xa ku xi hlaya;Marito ya mina a ma va tsakisa.
23 A va ni nyimela ingaku hiloko va nyimela mpfula;A va fana ni vanhu lava a va nyimela mpfula hi nkama wa timpfula ta wugamu.+
24 Loko ni va hlekelanyana a va nga swi khohlwi;Loko va ni vona na ni tsakile, a va tiya.
25 A ni va kongomisa ku fana ni murhangeli wa vona,Naswona a ni hanya ku fana ni hosi loko yi ni masonchwa ya yona,+Ku fana ni munhu lweyi a tiyisaka lava rilaka.+
Tinhlamunselu ta le hansi
^ Kumbe: “vatirhi”.
^ Kumbe: “ma praça”.
^ Hi Xiheberu: “a va tumbela”.
^ Kumbe: “va nga ha swi koti ku vulavula.”
^ Hi Xiheberu: “papayi”.
^ Kumbe: “xidloko; xigqoko.”
^ Ku nga marhambu lawa ma khomaka matinyu.
^ Kumbe: “mub’etho”.
