Yobo 3:1-26
3 Hi ku famba ka nkama, Yobo a sungula ku vulavula a rhuka siku leli a nga psaliwa hi lona.+
2 Yobo a ku:
3 “A li helisiwe siku leli ni nga psaliwa hi lona,+Ni wusiku leli mun’wani a nga te: ‘Ku psaliwe n’wana wa mufana!’
4 Siku lolelo a li mphume.
Xikwembu lexi nga henhla xi nga vi ni mhaka na lona;Li nga voningeliwi.
5 A li mbhonyiwe hi ku mphuma kakukulu.
A li mbhonyiwe hi marhefu ya mpfula.
A li mbhonyiwe hi munyama wa ku chavisa.
6 Wusiku la kona a li ve ni munyama wawukulu;+Li nga tshuki li tsaka ka masiku ya lembe,Li nga tshuki li kontiwa xikarhi ka tiwheti.
7 A swi ta yampsa loko a ku nga psaliwanga munhu hi wusiku lolelo;Ku nga twali minkulungwani ka lona.
8 A li rhukiwe hi lava va rhukaka siku,Lava kotaka ku pfuxa Levhiyatani.*+
9 Tinyeleti ta lona ta nimixo a ti mphume;A li rindze mixo, kambe wu nga fiki,Naswona li nga voni masana loko li xa.
10 Hikusa a li pfalanga nyanghwa wa khwirhi la mamani;+Li yendle swaku ni vona swikarhatu.
11 Hi mhaka muni ni nga fanga nkama na ni psaliwa?
Hi mhaka muni ni nga fanga nkama na ni huma ka khwirhi?+
12 Hi mhaka muni ku ve ni matsolo lawa ma nga ni yamukelaNi mavele lawa ma nga ni yan’wisa?
13 Hikusa swoswi a ni ta va na ni yetlelile, ni nga karhatiwi hi nchumu;+A ni ta va na ni yetlelile ni humula+
14 A ni ta va ni tihosi ta misava ni vatsundzuxi va tona,Lava va nga tiyakela tindhawu leti swoswi se ti nga hohloka,*
15 Kumbe ni varhangeli lava a va ni woru,Lava tiyindlo ta vona a ti yo tala hi prata.
16 Hi mhaka muni ni nga vanga nyimba leyi nga huma,Ku fana ni vana lava kalaka va nga ku vonanga ku vonakala?
17 Asirheni hambi lava a va yendla swa ku biha a va ha karhati munhu;Ni lava nga hela matimba va humulile.+
18 Kolanu swib’ochwa hinkwaswu swi humulile;A swa ha twi rito la lweyi a swi sindzisaka ku tirha.
19 Vavatsongo ni vavakulu va fana sirheni,+Ni xikarawa xi chunsekile ka n’winyi wa xona.
20 Hi mhaka muni Xikwembu xi nyika lava xanisekaka ku vonakalaNi wutomi ka lava hluphekaka?+
21 Hi mhaka muni va navela lifu, kambe va nga li kumi?+
Va li txela ku tlula xuma lexi xi nga fihliwa,
22 Lava tsakaka swinene,Lava tsakaka loko va kuma sirha.
23 Hi mhaka muni Xikwembu xi nyika lweyi a nga lahleka ku vonakala,Lweyi xona xi nga mu pfalela?+
24 Hikusa ku hefemuteka se swi fana ni swakudla ka mina,+Ni ku konya ka mina+ swi fana ni ku halaka ka mati.
25 Hikusa leswi a swi ni chavisa swi ni kumile;Ni leswi a ni swi chava swi ni humelelile.
26 A ni vanga ni ku rhula kumbe ku humula,Kambe swikarhatu a swi suki ka mina.”
Tinhlamunselu ta le hansi
^ Swi tikomba ku vulavuliwa hi ngwenya kumbe xiharhi xin’wani xaxikulu xa ku tshama matini.
^ Kumbe: “marhumbi”.
