Yobo 30:1-31
30 “Swoswi vavanuna lava nga vatsongo ka mina,Va ni hleka,+Lava a ni nga ta pfumela ku veka vapapayi va vonaVa va xikan’we ni timbyana leti vonelelaka swifuyu swa mina.
2 Matimba ya vona a ma ni pfuna hi yini?
Ntamu wa vona wu helile.
3 A va ha na matimba hi mhaka ya wusiwana ni ndlala;Va handza ka ndhawu leyi kalaka yi nga na mati,Leyi nga wonheteliwa yi tlhela yi sala yi nga ha li na munhu.*
4 Va tshovela swinsinyani swa munyu amakhwatini;Va dla timintsu ta nsinya wa nkukulu.
5 Va va hlongola ka doropa;+Vanhu va va bongela ku fana ni loko va bongela muyivi.
6 Va tshama ka mimhakwa,*Ka swikhele ni le ka maribye.
7 Va huwelela na va li makhwatiniVa tshama xikan’we xikarhi ka swikhwatani.
8 Va hlongoliwile atikweni,Ku fana ni vana va xiphunta ni vana va ku kala va nga tiviwi.
9 Kambe swoswi va yimbelela tinsimu hi mina va ni poyila;+Ni hundzuke xipoyilo ka vona.+
10 Va ni nyenya va tlhela va fambela kule na mina;+A va chavi ku ni pshitela* matihlweni.+
11 Leswi Xikwembu xi nga ni tekela tlharhi la mina xi tlhela xi ni veka hansi,Va yendla leswi va swi lavaka hi mina.
12 Va ni hlengela* va lwa na mina hi tlhelo la xinene;Va ni hlongolisaVa ni vekela mintlhamu atindleleni.
13 Va wonhetela tindlela ta mina,Va yengesela swikarhatu swa mina,+Naswona a ku na munhu lweyi a va sivelaka.*
14 Va ta ku fana ni loko va nghena hi mbhovo wawukulu ka khumbi;Na va tela ku ta hi helisa.
15 Na chava hintamu;Ku hlonipheka ka mina ku susiwile ingaku hiloko ku yo biwa hi moya,Ntshembo wa mina wa ku ponisiwa wa hela ku fana ni rhefu leli nyamalalaka.
16 Ni le kusuhi ni ku fa;+Na xaniseka+ siku ni siku.
17 Marhambu ya mina ma vava niwusiku;+Ku vava loku ni ku twaka a ku nyimi.+
18 Mpahla ya mina yi kokiwa hi matimba yamakulu;Yi ni tlimba nkolo ku fana ni nkolo wa banchi la mina.
19 Xikwembu xi ni txukumetele ka madaka;Ni txintxe ni va wuthulu ni nkuma.
20 Na ku rilela swaku u ni pfuna, kambe a wu ni hlamuli;+Na nyima, kambe wo ni txuvuka kunene.
21 U ni tshike hi ndlela ya mona;+U ni be hi voko la wena la matimba.
22 U ni tlakule hi moya wa wena;Kutani u ni yisa hala ni hala hi xidzedze.
23 Hikusa na swi tiva swaku u ta ni tshika ni fa,Ni ta ya lani hinkwavu lava hanyaka va nga ta tlhangana kona.
24 Kambe a nga kona munhu lweyi a nga baka munhu lweyi a nga vaviseka+Loko a kombela ku pfuniwa hi nkama wa swikarhatu.
25 A ni nga rili ni lava nga kumana ni swikarhatu?
A ni nga rili ni swisiwana?+
26 Hambileswi a ni nyimele swaswinene, ku fike swa ku biha;A ni nyimele ku vonakala, kambe ku fike munyama.
27 Khwirhi la mina la duma a li miyeli;Masiku ya ku karhata ma ni kumile.
28 Ni famba na ni karhatekile;+ dlambu a li ni voningeli.
Ni nyima xikarhi ka xitshungu ni kombela ku pfuniwa.
29 Ni txintxile ni va makwavu wa timbyana ta khwati*Ni munghanu wa vana va yintxa.*+
30 A xikhumba xa mina se i xa ntima naswona xa kwamukela;+Marhambu ya mina ma psha hi mhaka ya ku hisa.
31 Haripa ya mina yi tirhiseliwa ku chaya tinsimu ta nkosi ntsena,Ni flawuta* la mina li tirhiseliwa ku chaya tinsimu ta xirilo.
Tinhlamunselu ta le hansi
^ Kumbe: “yi sala na yi li rhumbi.”
^ Ku nga mimbhovo leyi kumekaka ka tintshava ni ka maribye.
^ Kumbe: “thukela”.
^ Kumbe: “hlangamela”.
^ Kumbexana: “a ku na munhu lweyi a va pfunaka.”
^ Lani ku vulavuliwa hi timhungubye.
^ Kumbe: “avestruz.”
^ Kumbe: “xitiringo”.
