Mahungu Ya Ku Tsakisa Ya Ku Tsaliwa Hi Yohani 1:1-51
1 A ku sunguleni Rito+ a a li kona, Rito a a li ni Xikwembu+ naswona Rito a a li xikwembu.*+
2 Ku sukela ku sunguleni a a li ni Xikwembu.
3 Xikwembu xi tirhise yena swaku xi yendla swilo hinkwaswu+ naswona a ku na nchumu ni xin’we lexi nga yendliwa loko ku nga li hi yena.
4 Xi tlhele xi tirhisa yena swaku xi yendla wutomi naswona wutomi li ve ku vonakala ka vanhu.+
5 Ku vonakala ku voningela munyama,+ kambe munyama a wu swi kotanga ku hlula ku vonakala.
6 Ku te wanuna lweyi a nga rhumiwa hi Xikwembu; vito la yena a a li Yohani.+
7 Wanuna lweyi a tile ku ta byela* vanhu hi ku vonakala+ leswaku vanhu va mixaka hinkwayu va ta kholwa hi mhaka ya yena.
8 Yena a a nga li ku vonakala koloko,+ kambe a tile swaku a ta byela vanhu hi ta ku vonakala.
9 Ku vonakala ka ntiyiso loku voningelaka vanhu va mixaka hinkwayu a ku li kusuhi ni ku ta misaveni.+
10 A tile misaveni+ naswona Xikwembu xi tirhise yena swaku xi yi yendla,+ kambe misava a yi mu tivanga.
11 A tile akaya ka vanhu va yena, kambe vona a va mu yamukelanga.
12 Lava nga mu yamukela a va nyike mfanelo ya ku va vana va Xikwembu+ hikusa va ve ni lipfumelo ka vito la yena.+
13 Naswona a va psaliwanga hi vanhu* kumbe hi ku rhandza ka munhu, kambe hi ku rhandza ka Xikwembu.+
14 Rito a ve munhu*+ kutani a tshama na hina, naswona hi ku vonile ku phatima ka yena, ku phatima loku fanelaka n’wana lweyi a nga psaliwa a li yexe+ hi Papayi wa yena; naswona a a ni timpsalu tatikulu ta Xikwembu ni ntiyiso.
15 (Yohani a fakaze hi ta yena, a huwelela a ku: “Lweyi hi yena lweyi a ni vulavula hi yena nkama ni nga ku: ‘Lweyi a taka i mukulu ka mina, hikusa a ve kona na ni nge se va kona.’”)+
16 Hi mhaka ya leswi a a ni timpsalu tatikulu ni ntiyiso, na hina a hi nyike timpsalu tatikulu.
17 Hi ku tirhisa Moxe,+ Xikwembu xi hi nyike Nawu, kambe hi ku tirhisa Yesu Kreste,+ xi hi nyike timpsalu tatikulu+ ni ntiyiso.
18 A ku na munhu lweyi a nga tshama a vona Xikwembu;+ kambe n’wana lweyi a nga psaliwa a li yexe,+ lweyi a fanaka ni Xikwembu* a tlhela a tshama tlhelweni* ka Papayi wa yena,+ hi yena a tlhamuselaka swaku Xikwembu i mani.+
19 Hi leli wufakazi leli Yohani a nga li nyikela nkama Vayuda va nga rhuma vaprista ni Valevhi lava taka hi Yerusalema leswaku va ya mu vutisa va ku: “Hi wena mani?”+
20 A va byele ntiyiso a ku: “A hi mina Kreste.”
21 Kutani va mu vutisa va ku: “Hi wena mani? Hi wena Eliya?”+ A va hlamula a ku: “A ni yena.” “Hi wena Muprofeta?”+ A tlhela a va hlamula a ku: “Ihim!”
22 Se va ku: “Hi wena mani ke? Hi byeli swaku hi ta kota ku ya tlhamusela lava va nga hi rhuma. Hi byeli hi ta wena.”
23 Se a ku: “Mina ni munhu lweyi a huwelelaka amananga a ku: ‘Khulani ndlela ya Yehovha* yi basa,’+ hi ku landza leswi muprofeta Esaya a nga swi hlaya.”+
24 Vanhu lava a va yendla swivutiso a va rhumiwe hi Vafarisi.
25 Kutani va mu vutisa va ku: “Hi mhaka muni u tsakamisa vanhu kuve a wu Kreste, a wu Eliya kumbe Muprofeta?”
26 Yohani a va hlamula a ku: “Mina ni tsakamisa hi mati. Xikarhi ka n’wina ku ni munhu lweyi mi kalaka mi nga mu tivi,
27 lweyi a taka hi le ndzhaku ka mina, lweyi swi kalaka swi nga ni faneli ku tlhantlha tingoti ta masandaliya ya yena.”+
28 Timhaka leti ti yendleke Betaniya, awuxeni la Yordani, lomu Yohani a a tsakamisa vanhu kona.+
29 Hi mundzuku ka kona, a vone Yesu na a ta ka yena a gama a ku: “Vonani Xinyempfani+ xa Xikwembu lexi susaka xidjoho+ misaveni!+
30 Hi yena lweyi ni nga mi byela hi ta yena nkama ni nga ku: ‘Wanuna lweyi a nga ta ta ndzhaku ka mina i mukulu, hikusa a ve kona na ni nge se va kona.’+
31 Na mina a ni nga mu tivi, kambe ni tsakamise vanhu hi mati leswaku va ta mu tiva aIsrayele.”+
32 Yohani a tlhela a fakaza a ku: “Ni vone moya wa ku kwetsima wu xika ku fana ni xituvani na wu huma hi tilweni, wu fika wu tshama henhla ka yena.+
33 Na mina a ni nga mu tivi, kambe Lweyi a nga ni rhuma ku tsakamisa vanhu hi mati a te: ‘Lweyi u nga ta vona moya wa ku kwetsima wu xika wu tshama henhla ka yena,+ hi yena lweyi a tsakamisaka hi moya wa ku kwetsima.’+
34 Ni swi vonile naswona na fakaza swaku lweyi i N’wana wa Xikwembu.”+
35 Hi mundzuku ka kona, Yohani a tlhela a nyima kolahayani ni vadjondzisiwa va yena vambirhi,
36 se nkama a nga vona Yesu na a hundza a ku: “Vonani Xinyempfani+ xa Xikwembu!”
37 Nkama vadjondzisiwa volavo va nga mu twa na a vula leswo, va landzela Yesu.
38 Se loko Yesu a ndzuluka, a va vona na va mu landzela a ku: “Mi lava yini?” Vona va ku: “Rabi, (ku nga vito leli loko li hundzuluxeliwa li vulaka “Mudjondzisi”), u tshama kwini?”
39 A va hlamula a ku: “A hi fambeni mi ya ku vona.” Se va famba va ya vona lomu a tshamaka kona, se va tshama na yena siku lolelo; a ku li kolomuyani ka ma 16.*
40 Andre,+ makwavu wa Simoni Pedru, a a li mun’we wa lavambirhi lava nga twa leswi Yohani a nga swi vula va gama va landzela Yesu.
41 A rhange hi ku ya lava makwavu Simoni, a gama a ku: “Hi kume Mesiya”+ (ku nga vito leli loko li hundzuluxeliwa li vulaka “Kreste”),
42 se a famba na yena ka Yesu. Kutani Yesu a mu languta a gama a ku: “Wena u Simoni+ n’wana wa Yohani; u ta vitaniwa Khefasi” (ku nga vito leli loko li hundzuluxeliwa ku nga “Pedru”).+
43 Hi mundzuku ka kona, Yesu a a lava ku ya Galileya. Kutani a tlhangana na Filipi+ a gama a ku: “Ni landzeli.”
44 Filipi a a li wa Betisayida, lomu Andre na Pedru a va huma kona.
45 Filipi a kume Nataniyeli,+ kutani a ku: “Hi kume Yesu n’wana wa Yosefa,+ lweyi a humaka Nazareta. Ku vulavuliwe hi yena ka Nawu wa Moxe ni ka leswi nga tsaliwa hi Vaprofeta.”
46 Kambe Nataniyeli a ku: “Indjhe ku nga huma nchumu xaxinene aNazareta?” Filipi a mu hlamula a ku: “Tani u ta swi vona hi wexe.”
47 Yesu a vone Nataniyeli na a ta, se a ku: “Vonani Muyisrayele wa ntiyiso, lweyi a kalaka a nga kanganyisi.”+
48 Nataniyeli a ku: “U ni tivela kwini?” Yesu a mu hlamula a ku: “Ni ku vone na u li hansi ka nsinya wa nkuwa, na Filipi a nge se ku vitana.”
49 Nataniyeli a ku: “Rabi, wena u N’wana wa Xikwembu, u Hosi ya Israyele.”+
50 Yesu a mu hlamula a ku: “U za u pfumela hileswi ni nga ku byela swaku ni ku vonile hansi ka nsinya wa nkuwa? Wa ha ta vona swilo swaswikulu ku tlula leswi.”
51 A tlhela a ku: “Ni mi byela ntiyiso: Mi ta vona matilo ma pfuleka kutani tintsumi ta Xikwembu ti ta ka N’wana wa munhu+ na ti huma hi le matilweni, ti tlhela ti tlhatukela kona.”
Tinhlamunselu ta le hansi
^ Kumbe: “a li fana ni Xikwembu.”
^ Kumbe: “nyikela wumboni ka”.
^ Hi Xigriki: “ngati ni nyama”.
^ Hi Xigriki: “nyama”.
^ Hi Xigriki: “xikwembu lexi ku nga N’wana”.
^ I ndhawu leyi kombisaka leswaku munhu wa rhandzeka.
^ Vona Xiyengetelo A5.
^ Hi Xigriki: “kolomuyani ka wora la wu 10.”
