Mahungu Ya Ku Tsakisa Ya Ku Tsaliwa Hi Yohani 21:1-25
21 Loko leswo se swi hundzile, Yesu a tlhele a humelela ka vadjondzisiwa, ka lwandle la Tiberiya. A humelelise leswi:
2 A ku na Simoni Pedru, Tomasi (lweyi a a vitaniwa Hahla),+ Nataniyeli+ lweyi a a li wa Kana aGalileya, vana va Zebedewu+ ni vadjondzisiwa vambirhi van’wani va yena.
3 Se Simoni Pedru a ku: “Ni ya ku phaseni ka tihlampfi.” Va mu byela va ku: “Hi famba na wena.” Kutani va huma va ya khwela boti, kambe a va phasanga nchumu wusiku lolelo.+
4 Kambe na li ya ku xeni, Yesu a a nyime tlhelweni ka lwandle, kambe vadjondzisiwa a va swi tsumbulanga swaku i Yesu.+
5 Se Yesu a ku: “Vananga, mi ni swakudla?”* Va mu hlamula va ku: “A hi na nchumu!”
6 Kutani a ku: “Hoxani redi* ka tlhelo la xinene la boti swaku mi ta phasa.” Se va li hoxa, kambe a va swi kotanga ku li koka hileswi a li ni tihlampfi ta tinyingi.+
7 Kutani mudjondzisiwa lweyi Yesu a a mu rhandza swinene+ a byela Pedru a ku: “I Hosi!” Nkama Simoni Pedru a nga swi twa, a yambale mpahla ya yena hikusa a a nga yambalanga nchumu,* kutani a pela lwandle.
8 Kambe vadjondzisiwa lavan’wani va te hi boti lalitsongo, na va koka redi leli a li tale hi tihlampfi, hikusa a va nga li kule ngopfu ni misava; mpfhuka wa kona a wu li kolomuyani ka 90 wa mametru.*
9 Nkama va nga fika ka misava va kume ndzilu wa makhala na ku woxiwa hlampfi ni pawu ka wona.
10 Se Yesu a ku: “Pambulani tihlampfi tin’wani ka leti mi nga ti phasa, mi ti tisa halenu.”
11 Se Simoni Pedru a khwela boti a koka redi a ta na lona ka misava na li tale hi 153 wa tihlampfi tatikulu. Hambileswi a ti li tinyingi, redi a li handzukanga.
12 Yesu a ku: “Tanani mi ta dla.” A nga kona ni mun’we wa vadjondzisiwa lweyi a nga tiyela ku mu vutisa a ku: “Hi wena mani?” Hikusa a va swi tiva swaku i Hosi.
13 Se Yesu a va nyika pawu ni tihlampfi.
14 Leli a ku li khambi la wunharhu+ na Yesu a humelela ka vadjondzisiwa va yena loko se a pfuxiwe ku feni.
15 Nkama va nga gama ku dla, Yesu a vutise Simoni Pedru a ku: “Simoni n’wana wa Yohani, u ni rhandza ku tlula leswi ke?” Se Pedru a ku: “Ina Hosi, wa swi tiva swaku na ku rhandza.” Yesu a ku: “Phamela swinyempfani swa mina.”+
16 A tlhela a mu vutisa ka wumbirhi a ku: “Simoni n’wana wa Yohani, wa ni rhandza ke?” Pedru a hlamula a ku: “Ina Hosi, wa swi tiva swaku na ku rhandza.” Yesu a ku: “Risa swinyempfani swa mina.”+
17 A tlhela a mu vutisa ka wunharhu a ku: “Simoni n’wana wa Yohani, wa ni rhandza ke?” Se Pedru a xukuvala hileswi a nga mu vutisa ka wunharhu a ku: “Wa ni rhandza ke?” Kutani a ku: “Hosi u tiva swilo hinkwaswu; wa swi tiva swaku na ku rhandza.” Yesu a ku: “Phamela swinyempfani swa mina.+
18 Ni ku byela ntiyiso: Loko wa ha kula a wu yambala hi wexe u tlhela u ya lomu u lavaka ku ya kona. Kambe loko se u gugile, u ta tlakusa mavoko swaku u yambexiwa hi munhu mun’wani naswona a ta ku yisa lomu u kalaka u nga lavi ku ya.”
19 Yesu a a kombisa swaku Pedru a ta dlayiwa hi mhaka ya ku tshembeka ka yena ka Xikwembu naswona ku fa ka yena a ku ta dzunisa Xikwembu. A gama a ku: “U nga tshiki ku ni landzela.”+
20 Nkama Pedru a nga ndzuluka, a vone mudjondzisiwa lweyi a a rhandziwa swinene hi Yesu+ na a ta; hi lweyi nkama na va li ku dleni nimadlambu a nga ha khigele ka xifuva xa Yesu naswona a nga vutisa a ku: “Hosi, i mani lweyi a nga ta ku xavisa?”
21 Nkama Pedru a nga mu vona, a vutise Yesu a ku: “Hosi, ku ta yendleka yini hi wanuna lweyi?”
22 Yesu a mu hlamula a ku: “Loko ni swi lava, a nga hanya anze ni vuya; se hi mhaka muni swi ku karhata ke? Wena tama u ni landzela.”
23 Se ku va ni mavalivali ya leswaku mudjondzisiwa yelweyo a a nga ta fa. Kambe Yesu a nga vulanga swona leswo, kambe a te: “Loko ni swi lava, a nga hanya anze ni vuya; se hi mhaka muni swi ku karhata ke?”
24 Mudjondzisiwa lweyi,+ hi yena a vulaka wufakazi la timhaka leti, a tlhela a ti tsala naswona ha swi tiva swaku leswi a nga swi hlaya i ntiyiso.
25 Phela ku ni swilo swin’wani swa swinyingi leswi Yesu a nga swi yendla, leswi loko a swi yo tsaliwa hi xin’we hi xin’we, ni pimisa swaku misava a yi nga ta va ni ndhawu ya ku veka mabuku* lawa a ma ta tsaliwa.+
Tinhlamunselu ta le hansi
^ Kumbe: “tihlampfi.”
^ Kumbe: “likoka”.
^ Kumbe: “a a nga yambalanga hi ku helela”.
^ Hi Xigriki: “kolomuyani ka 200 swa swisungunu.” Vona Xiyengetelo B14.
^ Ku nga mabuku ya xikhale lawa a vo yendla hi ku ma songa.
