Mahungu Ya Ku Tsakisa Ya Ku Tsaliwa Hi Yohani 6:1-71
6 Se Yesu a gama a tsemakanya Lwandle la Galileya kumbe la Tiberiya.+
2 A a landzeleliwa hi xitshungu xaxikulu,+ hikusa a xi vona masingita lawa a a ma yendla loko a hanyisa lava vabyaka.+
3 Se Yesu a khwela henhla ka ntshava, a fika a tshama kona ni vadjondzisiwa va yena.
4 Naswona fexta la Paxkwa+ la Vayuda, a li li kusuhi.
5 Nkama Yesu a nga vona xitshungu xaxikulu na xi ta, a vutise Filipi a ku: “Hi nga va xavela kwini mapawu vanhu lava swaku va dla?”+
6 Kambe a a mu vutisa hi ku lava ku tiva leswi a a swi pimisa, hikusa Yesu a a swi tiva swaku a a lava ku yendla yini.
7 Filipi a mu hlamula a ku: “Loko hi xava mapawu ya 200 wa tidenari* a ma nge va ringani, hambiloko mun’wani ni mun’wani o dla swaswitsongo.”
8 Mun’we wa vadjondzisiwa va yena Andre, makwavu wa Simoni Pedru a ku:
9 “Hi lweyi mufana lweyi a nga ni 5 wa mapawu* ni swihlampfani swimbirhi. Kambe swi nga va yendla yini vanhu va ku talisa leswi?”+
10 Yesu a ku: “Byelani vanhu va tshama hansi.” Leswi ndhawu ya kona a yi tale hi byanyi, kolomuyani ka 5.000 wa vavanuna va tshame hansi.+
11 Se Yesu a teka mapawu, a khongela a gama a phakela lava a va tshamile; a yendlise swoleswo ni ka swihlampfani; va dle va xurha.
12 Se loko va xurhile, Yesu a byela vadjondzisiwa va yena a ku: “Hlengeletani leswi nga sala swaku ku nga tlangiwi hi swakudla.”
13 Kutani va hlengeleta swikhemu leswi nga siyiwa hi lava nga dla 5 wa mapawu, se va tata 12 wa mindzhava.
14 Nkama vanhu va nga vona singita leli Yesu a nga li yendla va ku: “Impela lweyi hi yena Muprofeta lweyi a a fanele a ta misaveni.”+
15 Kambe Yesu hi ku tiva swaku a va lava ku mu khoma va mu yendla hosi, a suka+ a ya ka ntshava na a li yexe.+
16 Nimadlambu vadjondzisiwa va yena va ye lwandle,+
17 va fika va khwela boti, va tlulela lwandle va ya Kapernawume. Se a ku mphumile naswona Yesu a a nge se kumana na vona.+
18 Lwandle se a li sungula ku kwata hi mhaka ya leswi a ku ba moya wawukulu swinene.+
19 Kambe loko se va fambe kolomuyani ka 5 kumbe 6 wa makilometru,* va vona Yesu na a famba henhla ka mati a ta kusuhi ni boti; se va sungula ku chava.
20 Kambe a ku: “Mi nga chaveni! Hi mina.”+
21 Se va mu yamukela ka boti, kutani va ya fika lomu a va ya kona.+
22 Ka siku li nga landzela, xitshungu lexi a xi sale ka tlhelo lelin’wani la lwandle, xi vone swaku a ku nga ha na boti lin’wani kolanu kambe a ku yo sala boti lin’we lalitsongo, ni swaku Yesu a nga fambanga ni vadjondzisiwa va yena hi boti leli va nga famba hi lona.
23 Ku fike maboti lawa a ma ta hi Tiberiya kusuhi ni ndhawu leyi va nga dla mapawu ka yona loko Hosi yi ma khongelelile.
24 Nkama xitshungu xi nga vona swaku Yesu ni vadjondzisiwa va yena a va nga li kona, xi khwele maboti ya xona xi ya Kapernawume xi ya mu lavetela.
25 Nkama xi nga mu kuma ka tlhelo lelin’wani la lwandle xi te: “Rabi,*+ u fike siku muni lani?”
26 Yesu a xi hlamula a ku: “Ni mi byela ntiyiso: A mi ni lavi hi leswi mi nga vona masingita, kambe hi leswi mi nga dla mapawu mi xurha.+
27 Mi nga tirheli swakudla leswi bolaka, kambe tirhelani swakudla leswi nyikaka wutomi la ku kala li nga heli,+ ku nga leswi N’wana wa munhu a nga ta mi nyika swona; hikusa Papayi, ku nga Xikwembu, xi mu tiyisekisile swaku xa mu rhandza.”+
28 Se xitshungu xi mu vutisa xi ku: “Hi fanele hi yendla yini swaku mintirho ya hina yi yamukeleka ka Xikwembu?”
29 Yesu a xi hlamula a ku: “Xikwembu xi lava swaku mi pfumela ka lweyi xi nga mu rhumela.”+
30 Kutani xi ku: “Hi lihi singita leli u nga ta hi komba lona+ swaku hi ta kholwa ka wena ke? U ta hi yendlela yini?
31 Vavhovho va hina va dle mana amananga,+ hilaha swi nga tsaliwa hi kona va ku: ‘A va nyike pawu la ku ta hi le tilweni swaku va dla.’”+
32 Yesu a ku: “Ni mi byela ntiyiso: Moxe a nga mi nyikanga pawu leli taka hi le tilweni, kambe Papayi wa mina a mi nyika pawu la ntiyiso leli taka hi le tilweni.
33 Hikusa pawu la Xikwembu hi lweyi a xikaka hi le tilweni a tisa wutomi misaveni.”
34 Se xitshungu xi ku: “Hosi, hi nyiki pawu la kona masiku hinkwawu.”
35 Yesu a ku: “Hi mina pawu la wutomi. Lweyi a taka ka mina a nge tshuki a twa ndlala naswona lweyi a pfumelaka ka mina a nge tshuki a twa torha.+
36 Kambe ni mi byelile swaku hambileswi mi nga ni vona a mi kholwi.+
37 Hinkwavu lava Papayi a ni nyikaka vona va ta ta ka mina naswona a ni nge va hlongoli;+
38 hikusa ni xike hi le tilweni+ swaku ni ta yendla ku rhandza ka lweyi a nga ni rhuma ku nga li ka mina.+
39 Ku rhandza ka lweyi a nga ni rhuma hi leswaku ni nga lahlekeliwi ni hi mun’we ka lava a nga ni nyika vona, kambe ni fanele ni va pfuxa+ ka lava nga fa hi siku la wugamu.
40 Hikusa Papayi wa mina a lava swaku lweyi a yamukelaka N’wana a tlhela a va ni lipfumelo ka yena, a va ni wutomi la ku kala li nga heli;+ naswona ni ta mu pfuxa ka lava nga fa+ hi siku la wugamu.”
41 Se Vayuda va sungula ku ngurangura hileswi a nga te: “Hi mina pawu leli taka hi le tilweni.”+
42 Se va ku: “A hi Yesu lweyi, n’wana wa Yosefa, lweyi vapsali va yena hi va tivaka?+ Se hi mhaka muni a ku: ‘Ni ta hi le tilweni’?”
43 Yesu a va hlamula a ku: “Tshikani ku ngurangura.
44 A ku na munhu lweyi a nga taka ka mina loko a nga tisiwanga hi Papayi lweyi a nga ni rhuma,+ kutani ni ta mu pfuxa ku feni hi siku la wugamu.+
45 Vaprofeta va tsale va ku: ‘Hinkwavu va ta djondzisiwa hi Yehovha.’*+ Lweyi a nga yingisa Papayi a tlhela a djondza ka yena, wa ta ka mina.
46 A ku na munhu lweyi a nga tshama a vona Papayi,+ loko ku nga li lweyi a taka hi ka Xikwembu; yelweyo a mu vonile Papayi.+
47 Ni mi byela ntiyiso: Lweyi a nga ni lipfumelo a ta kuma wutomi la ku kala li nga heli.+
48 “Hi mina pawu la wutomi.+
49 Vavhovho va n’wina va dle mana amananga kambe va file.+
50 Pawu leli li ta hi le tilweni, lweyi a li dlaka a nge fi.
51 Hi mina pawu leli nyikaka wutomi leli taka hi le tilweni. Loko munhu a dla pawu leli, a ta hanya hi masiku ni masiku. Phela pawu leli i muzimbha wa mina lowu ni nga ta wu nyikela swaku ni ponisa wutomi la vanhu.”+
52 Se Vayuda va sungula ku holovisana va ku: “Wanuna lweyi a nga hi nyikisa ku yini nyama ya yena leswaku hi yi dla?”
53 Yesu a ku: “Ni mi byela ntiyiso: Loko mi nga dli nyama ya N’wana wa munhu mi tlhela mi nwa ngati ya yena, a mi na wutomi.*+
54 Lweyi a dlaka nyama ya mina a tlhela a nwa ngati ya mina, a ta kuma wutomi la ku kala li nga heli, naswona ni ta mu pfuxa ka lava nga fa+ hi siku la wugamu;
55 hikusa nyama ya mina i swakudla swa ntiyiso ni ngati ya mina i swakunwa swa ntiyiso.
56 Lweyi a dlaka nyama ya mina a tlhela a nwa ngati ya mina wa twanana na mina, na mina na twanana na yena.+
57 Ku fana ni leswi Papayi a nga ni nyika wutomi a tlhela a ni rhuma naswona ni hanyaka hi mhaka ya Yena, na yena lweyi a dlaka nyama ya mina a ta hanya hi mhaka ya mina.+
58 Pawu leli li ta hi le tilweni. A li fani ni pawu leli vavhovho va n’wina va nga li dla va tlhela va fa. Lweyi a dlaka pawu leli a ta hanya hi masiku ni masiku.”+
59 A vule timhaka leti na a djondzisa ka sinagoga* la le Kapernawume.
60 Nkama ku tala ka vadjondzisiwa va yena va nga twa mhaka leyi va ku: “Mhaka leyi ya chavisa; i mani lweyi a nga swi yingisaka swoleswo?”
61 Kambe leswi Yesu a a swi tiva swaku vadjondzisiwa va yena va ngurangura hi mhaka leyi, a va vutisa a ku: “Mhaka leyi ya mi kwatisa ke?
62 Se a mi ta ku yini loko a mo vona N’wana wa munhu a tlhatuka a ya lomu a a li kona ku sunguleni?+
63 Moya wa ku kwetsima hi wona lowu nyikaka wutomi;+ kasi nyama a yi pfuni nchumu. Marito lawa ni nga mi byela wona ma huma ka moya wa ku kwetsima naswona ma ta mi nyika wutomi.+
64 Kambe van’wani xikarhi ka n’wina a va na lipfumelo.” Ku sukela ku sunguleni Yesu a a va tiva lava kalaka lipfumelo ni lweyi a a ta mu xavisa.+
65 Se a tlhela a ku: “Hi leswo swi nga yendla ni mi byela ni ku: A ku na munhu lweyi a nga taka ka mina loko a nga pfumeleliwanga hi Papayi.”+
66 Hi mhaka ya leswo, ku tala ka vadjondzisiwa va yena va tlhelele ka minchumu leyi va nga yi siya ndzhaku+ va gama va nga ha mu landzeli.
67 Kutani Yesu a vutisa lava 12 a ku: “Se n’wina ke, a mi lavi ku famba?”
68 Simoni Pedru a mu hlamula a ku: “Hosi, hi ta ya ka mani ke?+ Hi wena lweyi a nga ni marito lama nga ni wutomi la ku kala li nga heli.+
69 Ha ku tshemba naswona ha swi tiva swaku u Mukwetsimi lweyi a taka hi ka Xikwembu.”+
70 Yesu a va hlamula a ku: “A hi mina ni nga mi langa n’wina va 12 ke?+ Kambe mun’we ka n’wina a ta ni wonha vito.”*+
71 Phela a a vulavula hi Yudasi n’wana wa Simoni Skariyota, hikusa hi yena lweyi a a ta mu xavisa, hambileswi a a li mun’we wa lava 12.+
Tinhlamunselu ta le hansi
^ Vona Xiyengetelo B14.
^ Ku nga mapawu ya ku hambiwa hi maxalani.
^ Hi Xigriki: “kolomuyani ka 25 kumbe 30 wa switadiyu”. Vona Xiyengetelo B14.
^ Kumbe: “Mudjondzisi”.
^ Vona Xiyengetelo A5.
^ Hi Xigriki: “a mi na wutomi ka n’wina.”
^ Kumbe: “lomu ku tlhanganaka vanhu”. Sinagoga i ndhawu leyi Vayuda a va kumana kona swaku va khongela va tlhela va lerha matsalwa.
^ Kumbe: “a ta va davulosi.”
