Yoxuwa 10:1-43
10 Hi ku hantlisa loko Adonizedeki hosi ya Yerusalema a twe swaku Yoxuwa a teke doropa la Ayi a tlhela a li helisa kutani a yendle doropa la Ayi ni hosi ya kona+ leswi a nga swi yendla ka doropa la Yeriko ni hosi ya kona,+ ni swaku lava tshamaka Gibiyoni va yendle ntwananu wa ku rhula ni Vayisrayele+ naswona va tshama na vona;
2 a sungula ku chava swinene+ hikusa doropa la Gibiyoni a li li likulu ku fana ni madoropa yamakulu lawa a ma ni tihosi. Phela a li li likulu ku tlula doropa la Ayi+ naswona vavanuna va kona hinkwavu a va li tinhenha.
3 Kutani Adonizedeki hosi ya Yerusalema a rhuma vanhu ka Ohami hosi ya Hebroni,+ Pirami hosi ya Yarmuti, Yafiya hosi ya Lakixi na Debiri hosi ya Egiloni a ku:+
4 “Tanani mi ta ni pfuna, a hi hlaseleni Vagibiyoni hikusa va yendle ntwananu wa ku rhula na Yoxuwa ni Vayisrayele.”+
5 Se 5 wa tihosi ta Vaamori,+ hosi ya Yerusalema, hosi ya Hebroni, hosi ya Yarmuti, hosi ya Lakixi ni hosi ya Egiloni, ti hlengeletanile ni masonchwa hinkwawu ti famba ti fika ti rhendzela doropa la Gibiyoni swaku ti lwa na lona.
6 Kutani vavanuna va le Gibiyoni va rhumela rito ka Yoxuwa lomu yena ni vanhu va yena a va gwimbe kona matende aJiligali+ va ku: “U nga hi khohlwi hina swikarawa swa wena.+ Tani hi ku hantlisa! Hi lamuleli, hi pfuni! Phela tihosi hinkwatu ta Vaamori leti taka hi ka ndhawu ya tintshava ti hlengeletanile swaku ti ta lwa na hina.”
7 Se Yoxuwa a suka Jiligali ni vavanuna hinkwavu va nyimpi ni tinhenha ta matimba.+
8 Yehovha a byela Yoxuwa a ku: “U nga va chavi,+ hikusa va le ka mavoko ya wena.+ A nga kona ni mun’we lweyi a nga ta nyimisana na wena.”+
9 Yoxuwa a fambe wusiku hinkwalu na a suka aJiligali a fika a va hlasela na va nga swi nyimelanga.
10 Kutani Yehovha a dunga tinhloko ta Vaamori phambheni ka Vayisrayele,+ se Vayisrayele va dlaya vanhu va vanyingi aGibiyoni, va va txatxa ka ganga leli yaka aBeti-Horoni, va va dlaya anze Azeka ni le Makeda.
11 Nkama lowu Vaamori va nga baleka Vayisrayele va ngirimela Nkova wa Beti-Horoni, Yehovha a nisa marhalala* yamakulu ma va dlayetela ku ya fika aAzeka. Phela lava va nga dlayiwa hi marhalala a va li vanyingi ku tlula lava nga dlayiwa hi Vayisrayele hi xipada.
12 Hi siku leli Yehovha a nga hlula Vaamori phambheni ka Vayisrayele, Yoxuwa a byele Yehovha phambheni ka Vayisrayele a ku:
“Dlambu, nyima+ ahenhla ka Gibiyoni,+Ni n’weti, a wu nyime ka Nkova wa Ayiyaloni.”
13 Kutani dlambu ni n’weti swi vhela swi nyima swi nga fambi, anze Vayisrayele va dlaya valala va vona. Leswi a swi tsaliwanga ka buku la Yaxari ke?+ Dlambu li nyima li nga peli xikarhi ka matilo naswona li hlwele ku pela siku hinkwalu.
14 A ku se tshama ku va ni siku la ku fana ni lolelo, hambi hi ka masiku lawa ma nga landzela a li zanga li va kona la ku fana na lona, leli Yehovha a nga yingisa rito la munhu+ hikusa Yehovha a a lwela Israyele.+
15 Loko leswo swi yendlekile, Yoxuwa ni Vayisrayele hinkwavu va tlhelela lomu a va gwimbe kona matende aJiligali.+
16 Hi nkama wolowo, 5 wa tihosi ti baleka ti ya tumbela ka mhakwa* aMakeda.+
17 Se va ya byela Yoxuwa va ku: “Ku kumiwe 5 wa tihosi na ti tumbelile ka mhakwa aMakeda.”+
18 Yoxuwa a ku: “Tekani maribye yamakulu mi pfala lomu va nga nghena hi kona, mi tlhela mi langa vavanuna swaku va va vonelela.
19 Kambe n’wina van’wanyani, mi nga nyimeni. Txatxani valala va n’wina, mi va hlasela.+ Mi nga va tshikeni va nghena ka madoropa ya vona, hikusa Yehovha Xikwembu xa n’wina a va nyikele ka mavoko ya n’wina.”
20 Yoxuwa ni Vayisrayele va dlaye vanhu va vanyingi swinene, phela va va dlaye hinkwavu, ku yo sala ntsena lava nga baleka va nghena ka madoropa lawa ma nga ni mimuru ya ku tiya,
21 vanhu hinkwavu va tlhelela ka Yoxuwa lomu a va gwimbe kona matende aMakeda na va hlayisekile. A nga kona ni mun’we lweyi a nga tiya a chavisela Vayisrayele.
22 Se Yoxuwa a ku: “Susani maribye ka mhakwa lomu 5 wa tihosi ti nga tumbela kona mi ti tisa halenu.”
23 Kutani va teka 5 wa tihosi leti a ti tumbele ka mhakwa va ti yisa ka yena: Hosi ya Yerusalema, hosi ya Hebroni, hosi ya Yarmuti, hosi ya Lakixi ni hosi ya Egiloni.+
24 Loko va tise tihosi leto ka Yoxuwa, a vitana vavanuna hinkwavu va Vayisrayele, kutani a byela varhangeli va vavanuna va nyimpi lava a a fambe na vona a ku: “Tanani halenu. Psanyani tinhamu ta tihosi leti.” Se va tshinela va fika va ti psanya tinhamu.+
25 Yoxuwa a va byela leswi: “Mi nga chavi naswona mi nga rhurhumeli.+ Mi nga chavi, tiyani nhlana hikusa Yehovha a ta yendla swoleswi ka valala va n’wina hinkwavu lava mi lwaka na vona.”+
26 Se Yoxuwa a dlaya tihosi a gama a ti hayeka ka 5 wa timhandzi* naswona ti tshame kolahayani anze nimadlambu.
27 Loko li pela, a rhuma vanhu va ya hawula tihosi ka timhandzi,+ ti lahliwa ka mhakwa lowu a ti tumbele ka wona. Ku gama ku pfaliwa hi maribye yamakulu naswona maribye lawa ma ha li kona ni namuntlha.
28 Hi siku lolelo Yoxuwa a teka doropa la Makeda,+ a li hlasela hi xipada. A dlaya hosi ya lona ni vanhu hinkwavu lava tshamaka ka lona, a ku salanga munhu.+ A dlaye hosi ya Makeda+ ku fana ni leswi a nga yi dlayisa swona hosi ya Yeriko.
29 Kutani Yoxuwa ni Vayisrayele hinkwavu va suka aMakeda va ya lwa ni doropa la Libina.+
30 Na lona Yehovha a li nyikele ka Vayisrayele ni hosi ya lona,+ se va dlaya hinkwavu lava a va tshama ka lona hi xipada, a va siyanga munhu. Phela va dlaye hosi ya doropa leli ku fana ni leswi va nga yi dlayisa swona hosi ya Yeriko.+
31 Loko va suka Libina, Yoxuwa ni Vayisrayele hinkwavu va ye Lakixi+ va fika va gwimba matende va lwa ni doropa lolelo.
32 Yehovha a nyikela doropa la Lakixi ka mavoko ya Vayisrayele, va li teka hi siku la wumbirhi. Va dlaya hinkwavu lava tshamaka ka lona hi xipada,+ va yendle swa ku fana ni leswi va nga swi yendla ka doropa la Libina.
33 Se Horami hosi ya Jezeri+ a ya pfuna Lakixi, kambe Yoxuwa a mu hlasela a mu dlaya ni vanhu ya yena hinkwavu anze va hela va ku jii.
34 Loko Yoxuwa ni Vayisrayele hinkwavu va suke Lakixi va ye Egiloni,+ va fika va gwimba matende va lwa ni doropa lolelo.
35 Va li teka hi siku lolelo, va li hlasela hi xipada. Phela hi siku lolelo va dlaye vanhu hinkwavu lava va tshamaka ka doropa lolelo, ku fana ni leswi va nga swi yendla ka doropa la Lakixi.+
36 Yoxuwa ni Vayisrayele hinkwavu va gama va suka Egiloni va ya lwa ni doropa la Hebroni.+
37 Va li hlula hi xipada va gama va li teka, lona, hosi ya lona, swidoropani swa lona ni vanhu lava tshamaka ka lona, a va siyanga munhu. Va li yendle swa ku fana ni leswi va nga yendla doropa la Egiloni. Va li helisile xikan’we ni vanhu hinkwavu lava tshamaka ka lona.
38 Hi wugamu, Yoxuwa ni Vayisrayele hinkwavu va ya ka doropa la Debiri+ va ya lwa na lona.
39 A li teka, a teka hosi ya lona ni swidoropani hinkwaswu swa lona, va gama va li hlasela hi xipada, va helisa vanhu hinkwavu lava tshamaka ka lona,+ naswona a va siyanga munhu.+ A helise doropa la Debiri ni hosi ya lona ku fana ni leswi a nga swi yendla ka doropa la Hebroni ni la Libina ni hosi ya lona.
40 Yoxuwa a hlula madoropa hinkwawu lawa ma nga ka ndhawu ya tintshava, aNegebi, Xefela,+ tindhawu hinkwatu leti nga ka tlhelo la tintshava ni tihosi ta kona hinkwatu, naswona a nga siyanga munhu; a helise swilo hinkwaswu leswi hanyaka,+ hi ku ya hi leswi Yehovha Xikwembu xa Israyele a nga mu byela swona.+
41 Yoxuwa a va hlula ku sukela aKadexi-Barneya+ ku ya fika aGaza,+ ni tiko hinkwalu la Goxeni+ anze Gibiyoni.+
42 Se Yoxuwa a hlula tihosi hinkwatu ni matiko ya tona hi nkama wun’we, hikusa Yehovha Xikwembu xa Israyele hi yena a a va lwela.+
43 Kutani Yoxuwa ni Vayisrayele hinkwavu va tlhelela lomu a va gwimbe kona matende aJiligali.+
Tinhlamunselu ta le hansi
^ Kumbe: “marhalani”.
^ Ku nga mbhovo lowu kumekaka ka ntshava kumbe ka ribye.
^ Kumbe: “minsinya”.
