Yoxuwa 13:1-33
13 Yoxuwa se a a gugile naswona se a a ni malembe ya manyingi.+ Yehovha a gama a byela Yoxuwa a ku: “Se u gugile naswona se u ni malembe ya manyingi; kambe ntirho wa ku teka tiko wa ha li wukulu.
2 Hi lawa matiko lawa ma nga sala:+ Tindhawu hinkwatu ta Vafilista ni ta Vajesuri+
3 (ku sukela ka Nambu wa Nilu* lowu wu nga ka tlhelo la le wuxeni ka Gibita anze lomu tiko la Ekroni li tsemaka hi kona a norte,* lani ku vitaniwaka tiko la Vakanana)+ ku patsa ni tindhawu ta 5 wa tihosi ta Vafilista,+ ku nga Vagaza, Vaaxidodi,+ Vaaxikeloni,+ Vagati+ ni Vaekroni;+ ni tindhawu ta Vaavhimi+
4 ku ya fika a sul;* tiko hinkwalu la Vakanana; tiko la Mera, leli nga la Vasidoni+ ku ya fika aAfeki, anze lomu tiko la Vaamori li tsemaka hi kona;
5 tiko la Vajebali+ ni tiko hinkwalu la Lebanoni ka tlhelo la le wuxeni, ku sukela aBali-Gadi hansi ka Ntshava ya Hermoni ku ya fika aLebo-Amati;+
6 hinkwavu lava tshamaka ka ndhawu ya tintshava, ku sukela aLebanoni+ ku ya fika aMizirefoti-Mayimi;+ ni Vasidoni hinkwavu,+ ni ta va hlongola aphambheni ka Vayisrayele.+ Ntsena u fanele u yavela Vayisrayele tiko lolelo swaku li va tshomba la vona hi ku landza leswi ni nga ku byela swona.+
7 Swoswi u fanele u yavela tiko leli li va tshomba la 9 wa tinxaka ta Vayisrayele ni hafu ya lixaka la Manasi.”+
8 Hafu leyin’wani ya lixaka la Manasi, va ka Rubeni ni va ka Gadi va teke tshomba la vona, leli Moxe a nga va nyika awuxeni ka Yordani. Va yendle leswo hi ku landza leswi Moxe mutirheli wa Yehovha a nga va nyikisa swona:+
9 Ku sukela ka tiko la Arowa+ leli nga kusuhi ni Nkova wa Arinoni,+ ni doropa leli nga xikarhi ka nkova ni tiko hinkwalu leli nga ni maganga la Medeba anze Diboni;
10 ni madoropa hinkwawu ya Sihoni hosi ya Vaamori lweyi a a fuma aExiboni, anze lomu tiko la Vaamoni li tsemaka hi kona;+
11 ni tiko la Jiliyadi ni la Vajesuri ni Vamakati+ ni Ntshava hinkwayu ya Hermoni ni tiko hinkwalu la Baxani+ anze Saleka;+
12 ndhawu hinkwayu ya Baxani leyi fumiwaka hi Ogi, lweyi a a fuma aAxiteroti ni le Edreyi. (Lweyi a a li mun’we wa lava nga sala ka Varefayimi.)+ Moxe a va hlulile a tlhela a va hlongola.+
13 Kambe Vayisrayele a va va hlongolanga+ Vajesuri ni Vamakati, hikusa Vajesuri ni Vamakati va ha tshama ni Vayisrayele ku fikela swoswi.
14 Ko va lixaka la ka Levhi ntsena li kalaka li nga nyikiwanga tshomba.+ Hikusa tshomba la vona i magandzelo lawa ma hiseliwaka Yehovha Xikwembu xa Israyele,+ ku nga leswi a nga va tshembisa swona.+
15 Se Moxe a nyika lixaka la Rubeni tshomba hi ku ya hi mindjangu ya vona,
16 tiko la vona a li sukela Arowa, akusuhi ni Nkova wa Arinoni, a li tlhela li sukela ka doropa leli nga xikarhi ka nkova li famba li patsa ni tiko hinkwalu* la Medeba;
17 tiko la Exiboni ni madoropa ya lona hinkwawu+ lawa ma nga magangeni, Diboni, Bamoti-Bali, Beti-Bali-Meyoni,+
18 Yahazi,+ Kedemoti,+ Mefata,+
19 Kiriyatayimi, Xibima,+ Zereti-Xahari, ku nga doropa leli nga henhla ka ntshava leyi yi nga kusuhi ni nkova,
20 Beti-Peyori, maganga ya Pisiga,+ Beti-Yeximoti,+
21 madoropa hinkwawu lawa ma nga magangeni ni tiko hinkwalu leli fumiwaka hi Sihoni hosi ya Vaamori, lweyi a a fuma aExiboni.+ Moxe a mu hlulile+ a tlhela a hlula ni tihosi ta Vamidiyani, ku nga Evhi, Rekemi, Zuri, Huri na Reba.+ Tihosi leti a ti tshama ka tiko lolelo naswona a ti fumiwa hi Hosi Sihoni.
22 Balamu+ n’wana wa Beyori, lweyi a a hlahluva,+ na yena a dlayiwile ni lava van’wani hinkwavu lava va nga dlayiwa hi xipada hi Vayisrayele.
23 Tiko la va ka Rubeni a li sukela ka Nambu wa Yordani; naswona lona ni madoropa ni swidoropani swa kona a ku li tshomba la vona ni mindjangu ya vona.
24 Kutani Moxe a nyika lixaka la Gadi tshomba hi ku ya hi mindjangu ya vona,
25 ndhawu ya vona a yi patsa Yazeri+ ni madoropa hinkwawu ya Jiliyadi ni hafu ya tiko la Vaamoni+ anze Arowa, ku nga doropa leli nga txuvukana ni Raba;+
26 ni ku sukela aExiboni+ ku ya aRamati-Mizipe ni Betonimi li tlhela li sukela aMahanayimi+ anze lomu doropa la Debiri li tsemaka hi kona;
27 ni ka nkova wa Beti-Harani, Beti-Nimira,+ Sukoti,+ Zafoni ni tiko hinkwalu leli a li fumiwa hi Sihoni hosi ya Exiboni,+ ndhawu ya vona a yi tsema hi Yordani ku sukela lomu Lwandle la Galileya*+ li gamaka kona awuxeni ka Yordani.
28 Leli a ku li tshomba la Gadi hi ku ya hi mindjangu ya vona, ni madoropa ya kona ni swidoropani swa kona lomu a va tshama kona.
29 Kutani Moxe a nyika hafu ya lixaka la Manasi tshomba, ka hafu ya lixaka la ka Manasi hi ku ya hi mindjangu ya vona.+
30 Ndhawu ya vona a yi sukela Mahanayimi+ ku ya ka doropa hinkwalu la Baxani, ni tiko hinkwalu leli a li fumiwa hi Ogi hosi ya Baxani, ni swidoropani hinkwaswu swa matende swa Yayiri+ leswi a swi li Baxani, ku patsa ni 60 wa madoropa.
31 Se hafu ya Jiliyadi, Axiteroti ni Edreyi+ ni madoropa ya Baxani lawa a ma fumiwa hi Ogi yi nyikiwe vana va Makiri n’wana wa Manasi, hafu ya vana va Makiri+ hi ku ya hi mindjangu ya vona.
32 Leli i tshomba leli Moxe a nga va yavela lona amananga ya Mowabu akusuhi ni Yordani ka tlhelo la le wuxeni la Yeriko.+
33 Kambe Moxe a nga li nyikanga tshomba lixaka la Valevhi.+ Yehovha Xikwembu xa Israyele i tshomba la vona, hi ku ya hi leswi a nga va tshembisa swona.+
Tinhlamunselu ta le hansi
^ Kumbe: “Xihori”.
^ Kumbe: “n’walungu”.
^ Kumbe: “dzongeni.”
^ Kumbe: “tiko hinkwalu leli nga ni maganga”.
^ Kumbe: “Kinereti”.
