Yoxuwa 3:1-17
-
Vayisrayele va tsemakanya aYordani (1-17)
3 Yoxuwa a pfuka nimpundzu swinene, yena ni Vayisrayele hinkwavu va suka Xitimi+ va ya fika Yordani. Na va nga se tsemakanya nambu, va yetlele kolahayani.
2 Loko se ku hundze masiku manharhu, a varhangeli+ va famba hi tende ni tende,
3 va byela vanhu va ku: “Loko mi vona vaprista lava nga Valevhi+ va tlakule areka ya ntwananu wa Yehovha Xikwembu xa n’wina, va landzeni.
4 Kambe ku fanele ku va ni mpfhuka wa kolomuyani ka 890* wa mametru, xikarhi ka n’wina na yona; mi nga tshuki mi tshinela ka yona. Hi ku yendla leswo mi ta tiva ndlela ya ku famba hi yona hikusa a mi yi tivi ndlela ya kona.”
5 Kutani Yoxuwa a byela vanhu a ku: “Tibasiseni+ hikusa mundzuku Yehovha a ta yendla swilo swa ku hlamalisa axikarhi ka n’wina.”+
6 Yoxuwa a byela vaprista a ku: “Rhangani mi famba aphambheni ka vanhu na mi tlakule areka+ ya ntwananu.” Se va yi tlakula va famba.
7 Se Yehovha a byela Yoxuwa a ku: “Ku sukela namuntlha Vayisrayele+ va ta sungula ku ku hlonipha, hikusa mina ni ta va komba swaku ni na wena+ ku fana na Moxe.+
8 Byela vaprista lava nga tlakula areka ya ntwananu u ku: ‘Loko mi fika lani mati ya Yordani ma sungulaka kona, nghenani ka mati mi nyima mi nga tsekatseki.’”+
9 Se Yoxuwa a byela Vayisrayele a ku: “Tanani halenu mi ta twa marito ya Yehovha Xikwembu xa n’wina.”
10 Yoxuwa a tlhela a ku: “Mi ta swi tiva swaku ku ni Xikwembu lexi hanyaka xikarhi ka n’wina+ ni leswaku Xikwembu xi ta hlongola Vakanana, Vaheti, Vahivhi, Vaperezi, Vagirgaxa, Vaamori ni Vayebusi+ na mi swi vona.
11 Naswona Areka ya ntwananu wa Hosi ya misava hinkwayu yi ta hundza hi ka n’wina yi ya Yordani.
12 Swoswi langani 12 wa vavanuna va tinxaka ta Israyele, mi ta langa mun’we ka lixaka ha lin’we.+
13 Se loko vaprista lava nga tlakula Areka ya ntwananu ya Yehovha Hosi ya misava hinkwayu va peta minenge ka mati ya Yordani, mati ya Nambu wa Yordani lawa ma taka hi henhla ma ta nyima ma fana ni muru.”+
14 A nkama vanhu va nga suka ka matende ya vona na va nga se tlulela Nambu wa Yordani, vaprista lava a va tlakule areka+ ya ntwananu a va li phambheni ka vona.
15 Loko vaprista lava nga tlakula Areka va fika Yordani, va peta minenge ya vona ka mati (hikusa loko ku fika nkama wa ku tshovela a Nambu wa Yordani wu tshama+ na wu tale hi mati),
16 mati lawa ma taka hi henhla ma nyima, ma nyime ku fana ni muru hi le kule ka doropa la Adamu leli li nga kusuhi ni Zaretani, kasi mati lawa ma ngirimelaka ma ya Lwandle la Araba, ku nga Lwandle la Munyu, na wona ma woma. Ma pshile,* se vanhu va tsemakanya kusuhi ni Yeriko.
17 A nkama vaprista lava nga tlakula areka ya ntwananu wa Yehovha va nga nyima lani a ku womile+ xikarhi ka Nambu wa Yordani, Vayisrayele hinkwavu va sungule ku tsemakanya ka misava ya ku woma,+ anze tiko hinkwalu li gama ku tsemakanya Yordani.
Tinhlamunselu ta le hansi
^ Hi Xiheberu: “kolomuyani ka 2.000 wa swisungunu”. Vona Xiyengetelo B14.
^ Kumbe: “khwile”.
