Yoxuwa 4:1-24
-
Maribye lawa a ma ta khumbukisa Vayisrayele (1-24)
4 Nkama tiko hinkwalu li nga gama ku tsemakanya Yordani, Yehovha a byele Yoxuwa a ku:
2 “Langa 12 wa vavanuna xikarhi ka vanhu, u langa mun’we ka lixaka ha lin’we,+
3 kutani u va byela u ku: ‘Tekani 12 wa maribye axikarhi ka Nambu wa Yordani, lani vaprista va nga nyima kona,+ se mi famba na wona mi ya ma veka lani mi nga ta yetlela kona.’”+
4 Kutani Yoxuwa a vitana 12 wa vavanuna lava a nga va langa ka Vayisrayele, wanuna mun’we ka lixaka ha lin’we,
5 a gama a ku: “Hundzani hi phambheni ka Areka ya Yehovha Xikwembu xa n’wina mi ya xikarhi ka Yordani, mun’wani ni mun’wani a fanele a teka ribye a li tlhateka ka katla la yena, hi ku ya hi numeru ya tinxaka ta Vayisrayele;
6 leswaku ma ta va xikombiso xikarhi ka n’wina. Loko vana va n’wina va mi vutisa ka nkama lowu taka va ku: ‘Maribye lawa mi nga na wona i ya yini?’+
7 Mi fanele mi va hlamula mi ku: ‘Hikusa mati ya Yordani ma yavanile aphambheni ka areka+ ya ntwananu wa Yehovha. Nkama yi nga tsemakanya Yordani, a mati ma yavanile. Maribye lawa ma ta va xitsundzuxu ka Vayisrayele hi nkama wa ku kala wu nga heli.’”+
8 Vayisrayele va yendla leswi Yoxuwa a nga va byela swona. Va teka 12 wa maribye axikarhi ka Yordani, hi ku ya hi leswi Yehovha a nga mu byelisa swona Yoxuwa, leswaku ma ringana ni numeru ya tinxaka ta Vayisrayele. Va fambe na wona va fika va ma veka lomu a va ta yetlela kona.
9 Na yena Yoxuwa a veka 12 wa maribye axikarhi ka Yordani lani vaprista lava a va rhwale areka ya ntwananu a va nyime kona+ naswona ma ha li kolanu ni namuntlha.
10 Vaprista lava a va rhwale Areka va nyime xikarhi ka Yordani anze ku yendliwa hinkwaswu leswi Yehovha a nga rhuma Yoxuwa swaku a swi byela vanhu swaku va swi yendla, hi ku landza hinkwaswu leswi Moxe a nga swi byela Yoxuwa. Hi nkama wolowo, vanhu a va li ku tsemakanyeni.
11 Hi ku hantlisa loko vanhu hinkwavu va gamile ku tsemakanya, vaprista lava a va rhwale Areka ya Yehovha va tsemakanya na va voniwa hi vanhu.+
12 Kutani va ka Rubeni, va ka Gadi ni hafu ya lixaka la Manasi, va tsemakanya na va tilulamisele ku lwa nyimpi+ aphambheni ka Vayisrayele lavan’wani, hi ku ya hi leswi Moxe a nga va byela swona.+
13 Kolomuyani ka 40.000 wa masonchwa lawa a ma tilulamisele ku lwa nyimpi, ma hundza phambeni ka Yehovha ma ya mananga lawa ma nga Yeriko.
14 Ku sukela hi siku lelo Yehovha a veka Yoxuwa swaku a va murhangeli wamukulu phambheni ka Vayisrayele hinkwavu;+ va mu hloniphe hintamu* Yoxuwa wutomi la yena hinkwalu, ku fana ni leswi a va swi yendla ka Moxe.+
15 Yehovha a byela Yoxuwa a ku:
16 “Byela vaprista lava nga rhwala areka+ ya Wumboni swaku va huma Yordani.”
17 Kutani Yoxuwa a byela vaprista a ku: “Humani Yordani.”
18 Loko vaprista lava nga rhwala areka+ ya ntwananu wa Yehovha va huma xikarhi ka Nambu wa Yordani kutani minkondzo ya vona yi psanya lani ku nga woma, mati ya Yordani ma tlhele ma sungula ku famba ku fana ni ku sunguleni.+
19 Vanhu va tsemakanye Yordani hi siku la wu 10 ka wheti ya ku sungula, kutani va gwimba matende aJiligali+ kusuhi ni lani tiko la Yeriko li sungulelaka kona ka tlhelo la le wuxeni.
20 Kutani Yoxuwa a teka 12 wa maribye lawa va nga ma teka aYordani, a ma veka aJiligali.+
21 Se a byela Vayisrayele a ku: “Loko vana va n’wina va mi vutisa ka nkama lowu taka va ku: ‘Kasi maribye lawa i ya yini?’+
22 mi fanele mi va hlamula mi ku: ‘Vayisrayele va tsemakanye Nambu wa Yordani ka misava ya ku woma,+
23 nkama Yehovha Xikwembu xa n’wina a nga womisa mati ya Yordani phambheni ka vona anze va gama ku tsemakanya, ku fana ni leswi Yehovha Xikwembu xa n’wina a nga swi yendla ka Lwandle la Ku Pshuka loko a li womisa phambheni ka hina anze hi tsemakanya.+
24 A yendle leswo swaku vanhu va misava hinkwayu va ta swi tiva swaku voko la Yehovha li ni matimba,+ ni leswaku mi ta chava Yehovha Xikwembu xa n’wina minkama hinkwayu.’”
Tinhlamunselu ta le hansi
^ Hi Xiheberu: “chave”.
