Yoxuwa 7:1-26
7 Kambe Vayisrayele a va tshembekanga ka leswi Xikwembu xi nga va byela swona swaku va nga teki swilo leswi a swi fanele swi helisiwa, hikusa Akani+ n’wana wa Karimi, ntukulu wa Zabidi, wa ndjangu wa Zera wa lixaka la Yuda, a teke swilo leswi a swi fanele swi helisiwa.+ Yehovha a gama a va kwatela swinene Vayisrayele.+
2 Se Yoxuwa a rhuma vavanuna va suka Yeriko va ya ka doropa la Ayi,+ leli nga kusuhi ni Beti-Avheni, awuxeni ka Betele,+ a va byela leswi: “Fambani mi ya kambela tiko.” Se vavanuna va famba va ya kambela tiko la Ayi.
3 Nkama va nga tlhelela ka Yoxuwa va fike va mu byela leswi: “A swi zi swi lava u rhuma vanhu hinkwavu. Kolomuyani ka 2.000 kumbe 3.000 wa vanhu ntsena va nga swi kota ku hlula doropa la Ayi. Va nga zi va famba hinkwavu, van’wani a va humule hikusa vanhu va Ayi a hi vanyingi.”
4 Se ku fambe kolomuyani ka 3.000 wa vavanuna, kambe nkama va nga kumana ni vavanuna va Ayi va balekile.+
5 Vavanuna va Ayi va dlaye kolomuyani ka 36 wa vavanuna, va va txatxa ku sukela ka nyanghwa wa doropa anze va ya fika aXebarimi, va tame va va dlaya anze ka nkova. Vanhu va sungule ku chava va tlhela va hela ntamu.*
6 Kutani Yoxuwa a handzula mpahla ya yena, a wa, nghohe* ya yena yi khumba hansi phambheni ka Areka ya Yehovha anze nimadlambu, yena ni madoda ya Israyele, va tama va ticheletela misava ka tinhloko.
7 Yoxuwa a gama a ku: “Yowee! Wena Yehovha Hosi Leyikulu, hi mhaka muni u yendle swaku vanhu va wena va tsemakanya Nambu wa Yordani, a ku li leswaku u hi nyikela ka Vaamori swaku va hi helisa ke? A swi ta va swi yampsile loko a hi titshamelile ka tlhelo lelin’wani la Yordani!
8 Yehovha Xikwembu xa mina ni rivaleli, ni ta yendla yini leswi Vayisrayele va nga baleka phambheni ka valala va vona ke?
9 Phela loko Vakanana ni vanhu van’wani lava va tshamaka ka tiko leli vo swi twa leswi, va ta hi rhendzela va susa vito la hina amisaveni. Se u ta yendla yini hi vito la wena lalikulu ke?”+
10 Yehovha a hlamula Yoxuwa a ku: “Pfuka! Kasi hi mhaka muni u khizamile?
11 Vayisrayele va djohile. Va tlule ntwananu+ lowu ni nga va byela swaku va fanele va wu yingisa. Va teke swilo swin’wani leswi a swi fanele swi helisiwa,+ va swi yivile+ va ya swi fihla ka nhundzu ya vona.+
12 Kutani Vayisrayele a va nge he swi koti ku lwa ni valala va vona. Va ta baleka phambheni ka valala va vona hikusa va tiyendle nchumu lowu faneleke wu helisiwa. A ni nge he tlheli ni va na n’wina anze mi susa leswi faneleke swi helisiwa xikarhi ka n’wina.+
13 Pfuka, basisa vanhu!+ Va byeli u ku: ‘Tibasiseni mundzuku, hikusa Yehovha Xikwembu xa Israyele a li: “Ku ni nchumu lexi faneleke xi helisiwa xikarhi ka n’wina, n’wina Vayisrayele. A mi nga ta swi kota ku hlula valala va n’wina anze mi susa nchumu lexi faneleke xi helisiwa xikarhi ka n’wina.
14 Mi fanele mi hlengeletana nimixo, lixaka hi lixaka, kutani lixaka leli Yehovha a nga ta li langa+ li ta tshinela phambheni ka yena, ndjangu hi ndjangu naswona ndjangu lowu Yehovha a nga ta wu langa wu ta tshinela, munti hi munti, munti lowu Yehovha a nga ta wu langa wu ta tshinela, munhu hi munhu.
15 Lweyi a nga ta kumiwa ni swilo leswi faneleke swi helisiwa a ta hisiwa hi ndzilu,+ yena ni swilo swa yena hinkwaswu, hi mhaka ya leswi a nga tlula ntwananu+ wa Yehovha ni hi mhaka ya leswi a nga yendla nchumu wa ku nyenyentsa aIsrayele.”’”
16 Hi mundzuku ka kona Yoxuwa a pfuke nimpundzu, a vitana Vayisrayele hi ku ya hi tinxaka ta vona, ku gama ku langiwa lixaka la Yuda.
17 Se ku vitaniwa mindjangu ya Yuda, ku gama ku langiwa ndjangu wa Vazera,+ loko a hetile a game a vitana hi mun’we hi mun’we ka ndjangu wa Vazera, se ku langiwa Zabidi.
18 Hi wugamu a vitana munti wa Zabidi, munhu hi munhu se ku langiwa Akani n’wana wa Karimi, ntukulu wa Zabidi, wa ndjangu wa ka Zera, wa lixaka la Yuda.+
19 Yoxuwa a byela Akani a ku: “N’wananga, ni kombela u dzunisa Yehovha Xikwembu xa Israyele hi ku vula swidjoho swa wena. Ni kombela u ni byela leswi u nga swi yendla. U nga ni fihleli nchumu.”
20 Akani a hlamula Yoxuwa a ku: “Ku vula ntiyiso hi mina ni nga djohela Yehovha Xikwembu xa Israyele, ni yendle leswi:
21 Phela nkama ni nga vona mpahla ya ku saseka ya ku hlawuleka leyi taka hi Xinara+ ni prata la ku tlula makilu mambirhi* ni woru leli a li peza hafu ya kilu* ni swi navelile ni gama ni swi teka. Ni swi fihle hansi ka tende la mina ni male hansi ka swona.”
22 Hi ku hantlisa Yoxuwa a rhuma vanhu va tsutsuma va ya ka tende la yena, kutani va fika va kuma mpahla leyi a nga yi fihla ni male hansi ka yona.
23 Se va swi humesa ka tende la yena va swi yisa ka Yoxuwa ni ka Vayisrayele hinkwavu, va gama va swi veka phambheni ka Yehovha.
24 Kutani Yoxuwa ni Vayisrayele hinkwavu va teka Akani+ n’wana wa Zera, prata, mpahla ya lisima ni woru+ ku patsa ni vana va yena va madjaha ni va tintombhi, tihomu ni timbongolo ni swifuyu hinkwaswu, tende la yena ni swilo hinkwaswu leswi a a li na swona va swi yisa ka Nkova wa Akori.+
25 Yoxuwa a ku: “Hi mhaka muni u hi dlayisile ke?+ Yehovha a ta ku khatisa namuntlha.” Kutani Vayisrayele hinkwavu va mu ba hi maribye,+ va gama va va hisa hi ndzilu.+ Phela hinkwavu va dlayiwile hi ku biwa hi maribye.
26 Se va hlengeleta xidulu xaxikulu xa maribye henhla ka yena, naswona xa ha li kona ni namuntlha. Ku kwata ka Yehovha ku gama ku b’ohla.+ Hi leswo swi nga yendla swaku ndhawu yoleyo yi vitaniwa Nkova wa Akori* anze namuntlha.
Tinhlamunselu ta le hansi
^ Hi Xiheberu: “timbilu ta vanhu ti sungula ku deretera ku fana ni mati.”
^ Kumbe: “kara la”.
^ Hi Xiheberu: “200 wa tixikele”. Xikele yin’we a yi peza 11,4 wa magrama. Vona Xiyengetelo B14.
^ Hi Xiheberu: “50 wa tixikele”.
^ Leswi vulaka: “Khombo”.
