Zakariya 4:1-14
4 Ntsumi leyi a yi khuluma na mina yi tlhele yi vuya yi ta ni pfuxa, ingaku hi loko yo pfuxa munhu awurhongweni.
2 Kutani yi ni vutisa yi ku: “U vona yini?”
Se ni yi hlamula ni ku: “Ni vona xa ku tlhoma swa ku voninga hi swona xa ku yendliwa hi woru,+ lexi nga ni xitijelani henhla ka xona. Xi ni 7 wa swa ku voninga hi swona,+ ina, 7 wa swona, naswona leswi swa ku voninga hi swona swi nga henhla ka xona swi ni 7 wa switubani.*
3 Ka matlhelo ya xona ku ni minsinya yimbirhi ya mawolivhera,+ wun’wani wu ka tlhelo la xinene la tijela kasi lowun’wani wu ka tlhelo la ximatsi.”
4 Kutani ni vutisa ntsumi leyi a yi vulavula na mina ni ku: “Kasi minchumu leyi yi lava ku hlaya swa ku yini hosi ya mina?”
5 Ntsumi leyi a yi khuluma na mina yi ni vutisa yi ku: “A wu swi tivi swaku swilo leswi swi lava ku vula yini?”
Ni yi hlamula ni ku: “A ni swi tivi hosi ya mina.”
6 Kutani yi ni byela yi ku: “Leswi hi leswi Yehovha a swi byelaka Zerubabele: ‘“A ni nga ta tirhisa masonchwa, kumbe matimba ya munhu,+ kambe ni ta tirhisa moya wa mina wa ku kwetsima,”+ ku vula Yehovha murhangeli wa tintsumi.
7 Wo va mani, wena ntshava yayikulu? Zerubabele+ a ta ku txintxa u va ndhawu ya ku ringanana.*+ Hambi ribye la wena la wugamu la ku yaka hi lona a ta li teka funtshi vanhu va ta huwelela va ku: “Li xonge ndjhani! Li xonge ndjhani!”’”
8 Yehovha a tlhela a vulavula na mina a ku:
9 “Zerubabele hi yena a nga sungula ku yaka yindlo leyi,+ funtshi a ta yi heta.+ Mi ta swi tiva swaku Yehovha murhangeli wa tintsumi hi yena a nga ni rhuma ka n’wina.
10 Hikusa i mani lweyi a nga li vonela hansi siku la minchumu yayitsongo?+ Hikusa va ta tsaka loko va vona Zerubabele na a khome ngoti ya ku pima hi yona. Se leswiyani swa 7 swa ku voninga hi swona i matihlo ya Yehovha lama txuvukaka hinkwaku amisaveni.”+
11 Ni gama ni mu vutisa ni ku: “A minsinya yayimbirhi ya mawolivhera leyi nga ka tlhelo la xinene ni la ximatsi la xa ku tlhoma swa ku voninga hi swona yi vula swaku yini?”+
12 Ni tlhele ni mu vutisa ni ku: “Se a tinyandza timbirhi ta matluka* ya minsinya ya mawolivhera, lawa ma humesaka mafurha ma nga ni kori ya woru hi switubani* swimbirhi swa woru ma vula yini?”
13 Kutani yi ni vutisa yi ku: “A wu swi tivi swaku swilo leswi swi lava ku hlaya swaku yini?”
Ni gama ni yi hlamula ni ku: “Ihim, a ni swi tivi hosi ya mina.”
14 Yi ni hlamula yi ku: “Swi fanekisela vanhu vambirhi lava nga langiwa, lava nga nyima tlhelweni ka Hosi ya misava hinkwayu.”+
Tinhlamunselu ta le hansi
^ Kumbe: “swiphayiphani.”
^ Kumbe: “ndhawu ya ku pfumala tintshava ni maganga.”
^ Ku nga matluka lama nga tala hi mihandzu.
^ Kumbe: “swiphayiphani”.
