Xikwembu xi vulavula na hina hinkwerhu hi ku tirhisa Bibele la Ku Kwetsima. Hi fanele hi li djondza leswaku hi ta tiva Lweyi a nga Li Tsala. (Yohani 17:3; 2 Timotiya 3:​16) Ka Bibele, Yehovha Xikwembu a hi byela xikongomelo xa yena hi vanhu ni hi kaya la vona ku nga misava. — Genesa 3:​15; Nhlawutelo 21:​3, 4.

A ku na buku lin’wani leli nga khumba wutomi la vanhu ku fana ni Bibele. Li hi pfuna ku tekelela wumunhu la Yehovha ku nga lirhandzu, timpsalu ni ntwelawusiwana. Li yendla swaku vanhu va va ni ntshembo, li va pfuna swaku va tiyisela hambiloko va hlupheka hintamu. Naswona li hi byela swilo swa misava leyi leswi kalaka swi nga fambisani ni ku rhandza ka Xikwembu ka ku lulama. — Tipisalema 119:105; Vaheberu 4:​12; 1 Yohani 2:​15-​17.

A ku sunguleni, Bibele a li tsaliwe hi Xiheberu, Xiaramu ni Xigriki naswona li hundzuluxeliwile hinkwalu kumbe mabuku man’wani ya lona hi tirimi ta ku tlula 3.000. A ku na buku leli nga tshama li hundzuluxeliwa li tlhela li nyikeliwa ka vanhu ku fana ni Bibele. Hi fanele hi tinyimisela ku kuma swilo swa swinyingi ka lona. Wuprofeta la Bibele li li: “Mahungu lawa ya ku tsakisa ya Mfumu [ku nga timhaka ta lisima leti kumekaka ka Bibele] ma ta chumayeliwa amisaveni hinkwayu leswaku ma va wumboni ka matiko hinkwawu, kutani hi kona magamu ma nga ta fika.” — Matewu 24:14.

Hi ku vona lisima leli Bibele li nga na lona, xikongomelo xa hina a ku li ku humesa wuhundzuluxeli leli vulaka leswi matsalwa ya ku sungula ma vulaka swona li tlhela li twisiseka naswona swi vevuka ku li lerha. Tinhlokomhaka leti ti nga ka Xiyengetelo leti nge “Minawu Ya Ku Hundzuluxela Bibele,” “Leswi Nga Ka Bibele Leli” ni leyi nge “Leswi Hi Nga Li Kumisa Xiswona Bibele” ti tlhamusela minawu leyi nga landzeliwa ku patsa ni tintlhamuselo tin’wani ta swiyenge swa Bibele leli.

Lava rhandzaka Yehovha Xikwembu va tlhela va mu tirhela va navela ku va ni wuhundzuluxeli la Rito la Xikwembu leli nga ntiyiso ni leli twisisekaka. (1 Timotiya 2:4) Hi mhaka leyo, hi hundzuluxele Bibele leli hi Xichangana hi ku pfumelelana ni xikongomelo xa hina xa ku hundzuluxela Bibele la Wuhundzuluxeli La Misava Ya Nyuwani hi tirimi ta tinyingi swinene. Ha tshemba hi tlhela hi khongela swaku wena mulerhi lweyi a rhandzekaka u ta pfuneka hi Bibele leli la Matsalwa ya Ku Kwetsima, loko u lwela ‘ku lava Xikwembu u tlhela u xi kuma.’ — Mintirho 17:27.