Ku nga li khale, Yehovha a ta tshika ku yi lehisela mbilu misava leyi. Wukhongeli la mavunhwa li ta helisiwa. Matiko ma ta dumela vanhu va Xikwembu naswona Yehovha a ta dlaya lava yentxaka swa ku biha ka nyimpi ya Armajedoni. Vakreste va wu nyimelile nkama lowu swilo swoleswo swi nga ta hetiseka hi wona.

A hi swi tivi hi ku helela leswi nga ta yentxeka ka nhlomulu wa wukulu. Hi xikombiso, a hi swi tivi swaku wu ta sungula siku muni. A hi swi tivi swaku i yini lexi nga ta yentxa mimfumu yi dumela wukhongeli. A hi swi tivi swaku ntlawa wa matiko wu ta dumela vanhu va Xikwembu ku ringana nkama muni ni swaku ku ta yentxeka yini hi vanhu va Xikwembu ka nkama wolowo. Naswona a hi swi tivi swaku Yehovha a ta tirhisa yini swaku a dlaya vanhu va ku biha ka nyimpi ya Armajedoni.

Kambe Bibele li hi byela hinkwaswu leswi hi swi lavaka swaku hi tama hi tiya hi tlhela hi nga chavi leswi nga ta yentxeka ka nkama lowu taka. Hi xikombiso, ha swi tiva swaku hi hanya ka “masiku ya wugamu.” (2Tm 3:1) Ha swi tiva swaku ku ta pumbiwa nkama lowu wukhongeli la mavunhwa li nga ta helisiwa hi wona, swaku wukhongeli la ntiyiso li nga tshuki li helisiwa. (Mt 24:22) Ha swi tiva swaku Yehovha a ta ponisa vanhu va yena. (2Pe 2:9) Naswona a hi kanakani swaku lweyi Yehovha a nga mu langa swaku a helisa vanhu lava yentxaka swa ku biha a tlhela a ponisa vanhu va yena, a lulamile naswona a ni matimba. — Nhl 19:11, 15, 16.

Leswi swi nga ta yentxeka ka nkama lowu taka, swi ta yentxa swaku vanhu va “titivala hi mhaka ya ku chava.” Kambe ku djondza hi leswi Yehovha a nga va ponisisa xiswona vanhu va yena va khale ni leswi a vulaka swaku swi ta yentxeka ka nkama lowu taka, swi ta hi pfuna ku ‘nyima hi tiya hi tlakusa tinhloko’ na hi tiva swaku ku ponisiwa ka hina ku le kusuhi. — Lk 21:26, 28.