NDZIMA 15
Gandzela Xikwembu hi Ndlela Leyi Xiyi Yamukelaka
1. I mani lweyi angahi byelaka ndlela ya kahle yogandzela Xikwembu?
WUKHONGELI lotala li vula leswaku li djondzisa ntiyiso hi Xikwembu. Kambe leswo aswinge koteki hikusa li djondzisa swilo leswi hambaneke swinene hi leswi Xikwembu xinga swona ni ndlela leyinene leyi hi faneleke hixi gandzela hi yona. Hingayi tivisa kuyini ndlela ya kahle yogandzela Xikwembu? Yehovha hi yena ntsena lweyi angahi pfunaka.
2. Unga djondzisa kuyini ndlela ya kahle yogandzela Xikwembu?
2 Yehovha ahi nyike Bibele leswaku hi kota kudjondza ndlela ya kahle ya kumu gandzela hi yona. Hi mhaka leyo, loko u djondza Bibele, Yehovha ataku pfuna leswaku u pfuneka hi tidjondzo ta yena hikusa a ni mhaka swinene na wena. — Esaya 48:17.
3. Xikwembu xi lava leswaku hi yendla yini?
3 Vanhu van’wana va vula leswaku Xikwembu xi yamukela wukhongeli hinkwalu, kambe leswo ahi swona leswi Yesu angahi djondzisa swona. A te: “Ahi hinkwavu lavango ka mina: ‘Hosi, Hosi’ vangatanghena Mfun’wini wa matilo, kambe kutanghena lavayendlaka kurhandza ka Tatana wa mina lweyi anga matilweni.” Kutani, kulaveka leswaku hi djondza leswaku hi kwihi kurhandza ka Xikwembu hi tlhela hi kuyendla. Leyi i mhaka ya lisima hikusa Yesu a fananise lava kalaka vanga yendli kurhandza ka Xikwembu ni swigevenga, kumbe ni “lavayendlaka leswobiha.” — Matewu 7:21-23.
4. Yesu a vule yini hi kuyendla kurhandza ka Xikwembu?
4 Yesu ahi tsundzuxe leswaku loko hi lava kuyendla kurhandza ka Xikwembu, hita kumana ni swikarhatu. A te: “Nghenani hi nyangwa lowu wokhuma, hikuva nyangwa lowuyisaka kuloveni wuyanamile, ni ndlela leyi yiyaka kona, yiyanamile, kutani lavanghenaka hi yona vatele. Kasi nyangwa lowuyisaka vuton’wini wukhumile swinene, ni ndlela leyi yiyaka kona yikamanile swinene, kutani lava vayikumaka avatalanga.” (Matewu 7:13, 14) Nyangwa wokhuma (nyangwa wa kulala), kumbe ndlela leyinene yogandzela Xikwembu, yihi yisa ka wutomi lelinga heliki. Nyangwa woyanama, kumbe ndlela leyi hoxeke yogandzela Xikwembu, yi yisa ka lifu. Kambe Yehovha anga lavi leswaku kufa munhu ni mun’we. A nyika mun’wana ni mun’wana mukhandlu wa kudjondza hi yena. — 2 Petro 3:9.
NDLELA YA KAHLE YOGANDZELA XIKWEMBU
5. Ungava tivisa kuyini lava gandzelaka Xikwembu hi ndlela ya kahle?
5 Yesu a vule leswaku hingava tiva lava gandzelaka Xikwembu hi ndlela ya kahle. Hinga yendla leswo hi kukambisisa leswi va kholwaka ka swona ni leswi vaswi yendlaka. Yesu a te: “Mitavativa hi mintirho ya vona.” Naswona a tlhele a ku: “Nsinya lowunene wupsala mihandzu leyonandziha.” (Matewu 7:16, 17) Leswi aswi vuli leswaku lava gandzelaka Xikwembu va hetisekile kumbe ava phazami. Kambe swi vula leswaku minkama hinkwayu va zama kuyendla leswi lulameke. Swoswi hita kambisisa leswingatahi pfuna kuvona lava gandzelaka Xikwembu hi ndlela ya kahle.
6, 7. Hi mhaka muni wugandzeli la ntiyiso li sekeliwe ka Bibele? Xikombiso xa Yesu xihi djondzisa yini?
6 Wugandzeli la vona li sekeliwa ka Bibele. Bibele li vula leswi: ‘Matsalwa lawa hinkwawu mahuhuteliwile hi Xikwembu, mapfuna kudjondzisa, ni kulaya, ni kululeka, ni kutolovetisa leswolulama, leswaku mutirheli wa Xikwembu ava lweyi ahetisekeke, atilulamisela kuyendla ntirho wini na wini lowunene.’ (2 Timotiya 3:16, 17) Mupostola Pawulo a tsalele Vakreste a ku: ‘Loko himitisele rito la Xikwembu, miliyingisile ni kuliyamukela, kungali kukota mahungu ya kuhuma ka vanhu, kambe tani hi mahungu ya kuhuma ka Xikwembu.’ (1 Vatesalonika 2:13) Wugandzeli la ntiyiso li sekeliwa ka Rito la Xikwembu ntsena, kunga Bibele. Ali sekeliwanga ka mavonelo ya vanhu, swihena kumbe ka xilo xin’wana.
7 Hinkwaswu leswi Yesu aswi djondziseke aswi sekeliwa ka Rito la Xikwembu. (Lerha Yohane 17:17.) Minkama yotala a tshahe Matsalwa. (Matewu 4:4, 7, 10) Vagandzeli va Xikwembu va ntiyiso va landzela xikombiso xa Yesu naswona hinkwaswu leswi vaswi djondzisaka swi sekeliwe ka Bibele.
8. Yesu ahi djondzise yini hi mhaka yogandzela Yehovha?
8 Va gandzela Yehovha ntsena. Buku la Tipisalema 83:18 li li: “Vanhu avaswi tivi leswaku wena, lweyi vito unga Yehovha, hi wena ntsena lweyi a Tlakukeke ahenhla ka misava hinkwayu.” Yesu a alava leswaku vanhu va tiva leswaku i mani hakunene Xikwembu xa ntiyiso, naswona a djondzise vanhu vito la Xikwembu. (Lerha Yohane 17:6.) Yesu a te: “Utagandzela Hosi [“Yehovha,” NM], Xikwembu xa wena, utirhela xona ntsena.” (Matewu 4:10) Hi mhaka leyo, tani hi vagandzeli va Xikwembu, hi landzela xikombiso xa Yesu. Hi gandzela Yehovha ntsena, hi tirhisa vito la yena, naswona hi djondzisa van’wana vito la Xikwembu ni leswi xingatahi yendlela swona.
9, 10. Hiswi kombisa kuyini leswaku ha rhandzana?
9 Va kombisa lirhandzu la ntiyiso ka vanhu. Yesu a djondzise vadjondzisiwa va yena leswaku va rhandzana. (Lerha Yohane 13:35.) Kunga khataliseki lomu hi humaka kona, ndhavuku wa hina, kumbe hi tinghamula kumbe hi swisiwana, kurhandzana ka hina kahi tlhanganisa tani hi vamakwerhu vaxinuna ni vaxisati. (Vakolosa 3:14) Hi mhaka leyo, ahi yi nyimpini. Bibele li li: ‘Hikolaho kuvonekaka lava vanga vana va Xikwembu ni lava vanga vana va Diyavulosi: Mani na mani lweyi angayendliki leswinene, lweyi angarhandziki makwavu ahi wa Xikwembu.’ Li tlhela li ku: “Hingafaneni na Kayini lweyi aali wa lweyi wobiha, kutani adlaya makwavu.” — 1 Yohane 3:10-12; 4:20, 21.
10 Hi tirhisa nkama, ntamu ni minchumu ya hina leswaku hi pfunana hi tlhela hi tiyisana. (Vaheveru 10:24, 25) Hi ‘yendlela vanhu hinkwavu leswinene.’ — Vagalatiya 6:10.
11. Hi mhaka muni swi li swa lisima kukholwa leswaku Yesu hi yena muponisi?
11 Va kholwa leswaku Yesu hi yena muponisi. Bibele li li: ‘Kutani kuponisiwa aku kumeki ka munhu mun’wana, hikuva vanhu avanyikiwanga vito lin’wana laha misaveni’. (Mintirho 4:12) Ka Ndzima 5 ya buku leyi, hi djondze leswaku Yehovha a rhumele Yesu leswaku ata nyikela wutomi la yena tani hi nkutsulu leswaku kupona vanhu lava yingisaka. (Matewu 20:28) Yehovha a lange Yesu kuva a fuma misava tani hi Hosi. Hi mhaka leyo, Bibele lihi byela leswaku hi fanele hi yingisa Yesu loko hi lava kuhanya hilaha kunga heliki. — Lerha Yohane 3:36.
12. Hi mhaka muni Vakreste va ntiyiso vanga tipeti ka timhaka ta politika?
12 Ava tipeti ka timhaka ta politika. Yesu anga tipetanga ka timhaka ta politika. Loko a ringiwa, a vule leswi ka mufumi wa Murhoma kunga Pilato: “Mfumu wa mina ahi wa misava leyi.” (Lerha Yohane 18:36.) Kufana na Yesu, ha tshembeka ka Mfumu wa Xikwembu, naswona hi mhaka ya leswo, kun’wana ni kun’wana laha hi tshamaka kona, ahi ngheneli ka swa politika. Hambileswo, Bibele lihi byela leswaku hi fanele hi yingisa “vuhosi”, kunga vafumi va misava. (Varhoma 13:1) Hi yingisa minawu ya tiko leli hi tshamaka ka lona. Kambe loko nawu wa tiko wu lwisana ni minawu ya Xikwembu, handle kokanakana hita tekelela vapostola, lavanga vula va ku: ‘Hi fanele hi yingisa Xikwembu kutlula vanhu.’ — Mintirho 5:29; Marka 12:17.
13. Vakreste va ntiyiso va chumayela yini hi Mfumu wa Xikwembu?
13 Va chumayela leswaku i Mfumu wa Xikwembu ntsena lowunga lulamisaka swikarhatu swa vanhu. Yesu a vule leswaku “Evhangeli leyi ya Mfumu” ayita chumayeliwa amisaveni hinkwayu. (Lerha Matewu 24:14.) Aku na mfumu wa vanhu lowunga kotaka kuyendla leswi Mfumu wa Xikwembu wungatahi yendlela swona. (Tipisalema 146:3) Yesu ahi djondzise kukhongelela Mfumu wa Xikwembu loko a ku: “Akute kufuma ka wena; kurhandza ka wena akuyendliwe misaveni, tani hi loko kuyendliwa tilweni.” (Matewu 6:10) Bibele lihi byela leswaku Mfumu wa Xikwembu wuta helisa mimfumu hinkwayu ya vanhu kutani “hi wona ntsena wungata va kona hilaha kunga heliki.” — Daniyele 2:44.
14. I vamani lava u kholwaka leswaku va gandzela Xikwembu hi ndlela leyinene?
14 Ndzhaku ka kudjondza hi timhaka leti, ti vutisi: ‘I vamani lava tidjondzo ta vona ti sekeliwaka Bibeleni? I vamani lava djondzisaka van’wana hi vito la Xikwembu? I vamani lava kombanaka lirhandzu naswona va kholwaka leswaku Yesu a te misaveni leswaku atahi ponisa? I vamani lavanga tipetiki ka politika? I vamani lava djondzisaka leswaku i Mfumu wa Xikwembu ntsena lowungata lulamisa swikarhatu swa vanhu?’ I Timboni ta Yehovha ntsena. — Esaya 43:10-12.
SE UTA YENDLA YINI?
15. Hi fanele hi yendla yini loko hi lava leswaku Xikwembu xi yamukela wugandzeli la hina?
15 Aswi yenelanga kukholwa ntsena leswaku Xikwembu xi kona. Phela hambi madimona ma kholwa leswaku Xikwembu xi kona kambe amaxi yingisi. (Yakobo 2:19) Loko hi lava kuva Xikwembu xi yamukela wugandzeli la hina, ahi fanelanga hi kholwa ntsena leswaku xi kona, kambe hi fanele hi yendla leswi xiswi vulaka.
16. Hi mhaka muni hi fanele hi tshika wukhongeli la mavunhwa?
16 Leswaku Xikwembu xi yamukela wugandzeli la hina, hi fanele hi tshika wukhongeli la mavunhwa. Muprofeta Esaya a tsale leswi: “Humani xikarhi ka vona, mi hambana na vona”. (Esaya 52:11; 2 Vakorinto 6:17) Hi mhaka leyo, hi fanele hi tshika minchumu hinkwayu leyi fambisanaka ni wukhongeli la mavunhwa.
17, 18. I yini “Babilona Lwenkulu”, naswona hi mhaka muni swi li swa xihantla kuhuma ka yena?
17 I yini wukhongeli la mavunhwa? I wukhongeli hinkwalu leli djondzisaka kugandzela Xikwembu hi ndlela leyi kanetaka leswi Rito la xona liswi vulaka. Bibele li vula leswaku wukhongeli la mavunhwa i “Babilona Lwenkulu”. (Nhlavutelo 17:5) Hi mhaka muni? Ndzhaku ka Ndhambhi ya masiku ya Nowa, kusungule tidjondzo totala ta mavunhwa ka doropa la le Babilona. Tidjondzo toleto ti hangalake amisaveni hinkwayu. Hi xikombiso, vanhu votala lava ava tshama Babilona ava kholwa ka djondzo ya leswaku Xikwembu i swikwembu swinharhu ka xin’we. Ni namuntlha, tikereke totala ti djondzisa leswaku Xikwembu i swikwembu swinharhu ka xin’we, kambe Bibele liswi veka livaleni leswaku ku ni Xikwembu xin’we ntsena xa ntiyiso, kunga Yehovha, ni leswaku Yesu i N’wana wa xona. (Yohane 17:3) Vanhu lava ava tshama Babilona ava kholwa leswaku ku ni nchumu lexi tamaka xi hanya ndzhaku ka loko miri wu file naswona xinga hisiwaka ndzilweni. Leswo ahi ntiyiso. — Vona Tinhlamuselo 14, 17 ni 18.
18 Xikwembu xi profete leswaku kungali khale wukhongeli la mavunhwa lita helisiwa. (Nhlavutelo 18:8) Hi mhaka leyo i swa lisima kutshika wukhongeli la mavunhwa hi xihantla. Hikuva Yehovha a lava leswaku u yendla leswo lingase chona. — Nhlavutelo 18:4.
Loko u tirhela Yehovha xikan’we ni vanhu va yena, uta va xirho xa ndjangu wa misava hinkwayu
19. Yehovha ataku hlayisisa kuyini loko u yendla xiboho xomu tirhela?
19 Loko u yendla xiboho xotshika wukhongeli la mavunhwa naswona u gandzela Yehovha, swingaha yendleka vanghanu ni maxaka ya wena vangaxi twisisi xiboho xa wena kutani va sungula kuku tshikelela. Kambe Yehovha angataku tshika. Uta va xirho xa ndjangu wa misava hinkwayu lowu vumbiwaka hi mamiliyoni ya vanhu lava kombisanaka lirhandzu la ntiyiso naswona vanga ni ntshembo wohanya hilaha kunga heliki amisaveni leyimpsha ya Xikwembu. (Marka 10:28-30) Kumbexana lava lwisanaka ni xiboho xa wena xa kutirhela Yehovha hi kufamba ka nkama na vona vanga sungula kudjondza Bibele.
20. Hi mhaka muni swi li swa lisima kugandzela Xikwembu hi ndlela leyi xiyi lavaka?
20 Kungali khale, Xikwembu xita helisa wubihi hinkwalu naswona Mfumu wa Xikwembu wuta fuma misava hinkwayu. (2 Petro 3:9, 13) Lowu kuta va nkama wotsakisa! Vanhu hinkwavu vata gandzela Yehovha hi ndlela leyi ayi lavaka. Hi mhaka leyo, i swa lisima kuva u yendla swokarhi swoswi naswona u gandzela Xikwembu hi ndlela ya kahle.
